Read Navajo I CORINTHIANS 12 Bible Online

I CORINTHIANS 12 - Navajo bible

I CORINTHIANS 12

¹Shik'isóó, k'ad éiyá Níłch'i Diyinii aidii'aahii nihił béédahózin doo nihósh'ní.

²T'ah doo oodlání daahłeeh yę́ędą́ą́' yóó'adanihi'diit'éeshgo eda'alyaii doo yáłti'ii bich'į' nidahohłáá nít'ée'go nihił béédahózin.

³Éí bąą díí baa ákodanohsin doo nihósh'ní, diné ła'da Diyin God biNíłch'i Diyinii yee yáłti'go, Jesus wódziihii nilį́, doo didooniił da, nidi diné ła'da Níłch'i Diyinii bee yájíłti'go t'éiyá, Jesus éí Bóhólníihii nilį́, jididooniił.

⁴Níłch'i Diyinii aidii'aahii t'áá da'níł'ąą át'éego da'oodlání yeidii'aah, nidi Níłch'i Diyinii éí t'ááłá'í.

⁵T'áá da'níł'ąą át'éego bee Bóhólníihii bá nidajil'a', nidi Bóhólníihii éí t'ááłá'í.

⁶Áádóó t'áá da'níł'ąą át'éego bee nidajilnish, nidi Diyin God t'ááłá'íígíí t'áá ádzíłtso t'áá ałtsoní hwee ła'yoolííł.

⁷T'ááłá'í jinítínígo Níłch'i Diyinii aidiyii'aahii oodlání danilíinii t'áá ałtso bá chodayooł'į́į doo biniyé haidiyii'aah.

⁸Níłch'i Diyinii hódzą́ągo saad bee yáti' ła' haidiyii'aah, náánáła' éí ił ééhózingo saad bee yáti' haidiyii'aah,

⁹náánáła' éí oodlą́ bee a'ódlí t'áá éí Níłch'i Diyinii haidiyii'aah, náánáła' éí Níłch'i Diyinii bee hadaałt'é áná'oolníiłii haidiyii'aah,

¹⁰náánáła' Diyin God bibee adziilii bee éédahózinii álílee k'ehgo ázhdoolíłígíí haidiyii'aah, náánáła' Diyin God bá hojilne' doogo haidiyii'aah, náánáła' éí níłch'i danilíinii nijiłkaah bízhneel'ą́ą doogo haidiyii'aah, náánáła' éí álílee k'ehgo saad bee yájíłti' doogo haidiyii'aah, náánáła' éí saadígíí bee ata' hojilne'go haidiyii'aah,

¹¹Níłch'i Diyinii t'ááłá'íígíí kót'éego naalnish, t'áá bí íinízinii bik'ehgo diné t'ááłá'í jinítínígo haidiyii'aahii hataidi'a'.

¹²Háálá ats'íís éí t'ááłá'í, ákondi bee hadilyaii lą'í bee hadilyaa; bee hadilyaii azhą́ lą'í nidi éí t'ááłá'í. T'áá ákót'éego ałdó' Christ daboodláanii yił t'ááłá'í nánídlį́.

¹³T'áá áníiltso, Jew dine'é índa doo Jew dine'é daniidlį́į da nidi, naalte' índa doo naalte' daniidlį́į da nidi t'ááłá'í niidlį́į dooleełgo Níłch'i Diyinii t'ááłá'íígíí bee danihi'doolzį́į́', áádóó Níłch'i Diyinii t'ááłá'íígíí nihiih dahwiizle'go bee dahinii'ná.

¹⁴Jó, ats'íís bee hadilyaii doo t'ááłá'í bee hadilyaa da, nidi lą'í bee hadilyaa.

¹⁵Akee' nilíinii, Shí doo ála' nishłį́į dago ats'íís doo bídíínísht'i' da, dííniid nidi doo ats'íís t'áá a'ohgo yídéét'i'go ábíléeh da.

¹⁶Ajaa' ałdó', Shí doo anáá' nishłį́į dago ats'íís doo bídíínísht'i' da, dííniid nidi doo ats'íís t'áá a'ohgo yídéét'i'go ábíléeh da.

¹⁷Ats'íís éí anáá' t'éí nilį́įgoshą' ha'át'íísh yee adiits'a' doo? Ats'íís éí ajaa' t'éí nilį́įgoshą' ha'át'íísh yee ałchin doo?

¹⁸Nidi Diyin God t'áá bí íinízinígíí bik'ehgo ats'íís yee hadít'éii t'ááłá'í ní'ánígo ats'íís yee haidiilaa.

¹⁹Ats'íís t'ááłá'íígíí t'éí bee hadilyaago éí doo ats'íís át'ée da doo.

²⁰Jó, ats'íís bee hadilyaii lą'í nidi ats'íís éí t'ááłá'í.

²¹Éí bąą anáá' éí ála' doo kwíididooniił da, Doo chonoosh'į́į́' ánít'ée da; náá'ákóne' atsiits'iin éí akee' doo kwíididooniił da, Doo chonoosh'į́į́' ánít'ée da.

²²Dooda shį́į́, doo ákót'ée da, háálá nihits'íís bee hadadilyaii azhą́ doo hózhǫ́ bidziil da nidi éí t'áá ákónéehee ádaat'é,

²³áádóó nihits'íís bee hadadilyaii doo hózhǫ́ baa nitsídeiikeesígíí éí agháago nihił danilį́, áádóó nihits'íís bee hadadilyaii doo ííshjání ájóle' ádaat'éii éí hazhó'ó baa ádahwiilyą́,

²⁴háálá nihits'íís bee hadadilyaii danizhónígíí t'áadoo aláahgo baa áháyą́ągo baa nitsídeiikeesí doo. Háálá Diyin God nihits'íís áyiilaago yee haidiilaii t'áá a'ohgo baa nitsáhákeesígíí t'áá íiyisí bił nilį́įgo áyósin.

²⁵Áko nihits'íís bee hadadilyaii nizhónígo ahídadínéelnáa doo áádóó ahaa ádahalyą́ągo nidaalnish dooleeł.

²⁶Ats'íís bee hadadilyaii ła' ti'hooníihgo t'áá ałtso yił ti'hoonííh, doodaii' ła' ił nilį́įgo t'áá ałtso bił dahózhǫ́.

²⁷Jó, nihí Christ bits'íís nohłį́, áko t'ááłá'í nootínígo yee hadít'éii ła' danohłį́.

²⁸Áko Diyin God éí da'oodlání áłah nídaadleehígíí bitahgi ła' niinínil, átséhé góne' daal'aadii, naakií góne' Diyin God yá dahalne'ii, táá' góne' nida'nitinii, áádóó Diyin God bibee adziilii bee éédahózinii álílee k'ehgo yaa nidaakaii, índa hadaałt'é ánída'oodlíiłii, áádóó áká anídaajahii, áádóó ándaha'áii, índa álílee k'ehgo yáti' yee yádaałti'ii.

²⁹Da' t'áásh ałtso daal'aadii danilį́? Da' t'áásh ałtso Diyin God yá dahalne'ii danilį́? Da' t'áásh ałtso nida'nitinii danilį́? Da' t'áásh ałtso Diyin God bibee adziilii bee éédahózinii álílee k'ehgo yaa nidaakaii danilį́?

³⁰Da' t'áásh ałtso hadaałt'é ánída'oodlíiłgo baa dahideest'ą́? Da' t'áásh ałtso álílee k'ehgo yáti' yee yádaałti'? Da' éísh t'áá ałtso ata' dahalne'? Doo lá t'áá ałtso da ni.

³¹Nidi Níłch'i Diyinii aidii'aahii aláahdi ádaat'éii bídin danohłį́į le'. Ákondi agháadi yá'át'ééhjí honít'i'ii bee nihił hashne'.