Read Navajo I CORINTHIANS 13 Bible Online

I CORINTHIANS 13 - Navajo bible

I CORINTHIANS 13

¹Azhą́ dadine'é índa diyingo nidaal'a'í dabizaad bee yáshti' nidi, bee ayóó'ó'ó'níinii shii' ádingo t'óó béésh łitsoii yilghaałgo índa ahídí'niłgo hahóół'áago diits'a'ígi ánísht'é.

²Áádóó azhą́ Diyin God bá hashne'go shaa deet'ą́ą nidi, áádóó na'nitin doo bééhózin da yę́ę índa ił ééhózin t'áá ałtso bik'idi'yiishtįįh nidi, índa doo naaki nilį́į́góó she'oodlą' bidziilgo bee dził hideeshnáał nidi, bee ayóó'ó'ó'níinii shii' ádingo t'áadoo náníshdlíní da.

³Áádóó azhą́ shee hólóonii t'áá át'é badahojoobá'íígíí bitaashniih nidi, áádóó ashidi'doolk'ą́ąłjį' niná'ádinisht'ą́ą nidi, bee ayóó'ó'ó'níinii shii' ádingo t'áadoo shá nídoodleełí da.

⁴Ayóó'ó'ó'níinii éí nízaadgóó ha'ólní, áádóó jooba'; ayóó'ó'ó'níinii éí doo oołch'į́įd da, doo nidi ádaa ha'niih da, doo ádeidzódlíi da,

⁵doo bee ádíláah da, doo t'áá shí t'éí nízin da, doo nidi báháchįįh da, doo nidi nichǫ́'ígíí ak'ijį' yis'ą́ą da;

⁶doo adaaníinii doo yaa bił hózhǫ́ǫ da, nidi t'áá aaníinii t'éí yaa bił hózhǫ́.

⁷Ayóó'ó'ó'níinii éí t'áá ałtsoní yéé'oo'níihgo t'óó yił át'é, t'áá ałtsojį' oodlą́, t'áá ałtsojį' bił chohoo'į́, t'áá ałtsoní yich'į' ha'ólní.

⁸Ayóó'ó'ó'níinii éí doo nineełnéeh da; Diyin God bá hane'ii dahólǫ́ǫ nidi éí nidahidoot'ih; álílee k'ehgo yáti' yee yádaałti' nidi éí nidahidoot'ih; ił ééhózin hólǫ́ǫ nidi éí doo béédahodoozįįł da.

⁹Háálá t'áá bighąądígi nihił béédahózin, áádóó Diyin God bá hane'ii t'áá bighąądígi nihił béédahózingo baa dahwiilne'.

¹⁰Nidi t'áadoo anáhóót'i'í nihił béédahoozingo, t'áá bighąądígi nihił béédahózin nít'éé' yę́ę bił yóó'ahodoogááł.

¹¹Áłchíní nishłį́į́dą́ą́' áłchínígi át'éego yáshti' nít'éé', áłchínígi át'éego ak'idi'yiishtįįh nít'éé', áłchínígi át'éego nitséskees nít'éé', nidi nininísą́ągo díí t'áá ałtso baa dáádíníisą́.

¹²Jó, k'ad éiyá bii' adéest'į́į́' bii' doo hazhó'ó hoot'íinii bii' dzidéez'į́'ígi át'éego dadíit'į́į́', nidi áadi índa bił da'ahiníil'į́į doo. K'ad t'áá bighąądígi shił ééhózin, nidi áadi índa t'áá Diyin God shééhósinígi át'éego shił bééhodoozįįł.

¹³Áko oodlą́ áádóó ił chohoo'į́ índa ayóó'ó'ó'ní, díí táa'go dahólǫ́, nidi aláahdi át'éii éí ayóó'ó'ó'ní.