Read Navajo I CORINTHIANS 14 Bible Online

I CORINTHIANS 14 - Navajo bible

I CORINTHIANS 14

¹Diyin God be'ayóó'ó'ó'ni' nihíni' danilį́į le'. Níłch'i Diyinii aidii'aahii ałdó' hádaaht'į́įgo Diyin God bá dahołne' dooígíí éí agháago hádaaht'į́.

²Jó, álílee k'ehgo yáti' bee yájíłti'ígíí doo diné bich'į' yájíłti' da, háálá diné doo hak'i'diitįįh da, nidi Diyin God bich'į' yájíłti'. Na'nitin doo béédahózinii Níłch'i Diyinii bee baa yájíłti'.

³Nidi t'áá háiida Diyin God bá hojilne'ígíí éí saad yee diné dadínóoséełii, áádóó yee chánah danilį́į dooleełii, índa yee hada'ólníi dooleełii bee bich'į' yájíłti'.

⁴Álílee k'ehgo yáti' bee yájíłti'ígíí t'áá hó hwe'oodlą' bidziilgo bee ázhdílnééh, nidi Diyin God bá hojilne'ígíí éí da'oodlání danilíinii áłah nádleehígíí bi'oodlą' dabidziilgo ádajile'.

⁵Áko t'áá ánółtso álílee k'ehgo yáti' bee yádaałti' dooleeł yę́ę nisin nidi, éí t'ah biláhídi át'éego Diyin God bá dahołne'jígo nihá nisin. Diyin God bá hojilne'ígíí éí álílee k'ehgo yáti' yee yáłti'ígíí biláahdi ájít'é, ákondi álílee k'ehgo yáti' yee yáłti'ígíí bá ata' hane'go da'oodlání áłah nádleehii yee dabidziilgo ádeiile'.

⁶Shik'isóó, álílee k'ehgo yáti' bee yáshti'go nihaa níyáago, ha'át'íísh bee nihíká adeeshwoł? Jó, Diyin God shił ííshją́ą́ áyiilaii t'éí bee nihił hodeeshnihgo bee nihíká adeeshwoł ni, doodaii' shił bééhózinígíí lá bee, doodaii' Diyin God bá hashne'go, náádoodaii' na'nitin bee nihaa níyáago lá bee nihíká adeeshwoł ni.

⁷Jó, tsin bee í'dílzoołí, doodaii' tsin tł'óół bąąh daneelzhee'go bee nida'a'néii, azhą́ éí doo hináa da nidi diits'a', áko doo ákwii diits'a'góó haa yit'éegoshą' diits'a'ígíí bééhózin doo?

⁸Siláo bidilnéhígíí doo bééhózingóó diits'a'go háishą' anaa' yiniyé hasht'e'ádidoolnííł?

⁹Nihí ałdó' t'áá ákódanoht'é; álílee k'ehgo yáti' bee yádaałti'go, baa yádaałti'ígíishą' haa yit'éego bééhózin doo? Háálá éí ákót'éego t'óó dzólníígóó yádaałti'go át'é.

¹⁰Nihokáá' dine'é dabizaad daashį́į́ néelą́ą́' t'áá da'níł'ąą át'éego yee yádaałti', áko éí t'áá ałtso t'áá bí bizaad yik'idadi'yiitįįh.

¹¹Nidi saad bee yáti'ii doo shił bééhózin dago, yáłti'ígíí bich'į' náánáła' dine'é nishłį́į doo, áádóó yáłti'ígíí shich'į' náánáła' dine'é nilį́į doo.

¹²Áko nihí Níłch'i Diyinii aidii'aahii t'áá íiyisí bídin danohłį́įgo da'oodlání áłah nádleehii bidziilgo ádeidoolíłígíí yéego bidadoołkaal.

¹³Éí bąą álílee k'ehgo yáti' yee yáłti'ígíí ata' hane'gi yíneel'ą́ą dooleełgo ádá sodilzin doo.

¹⁴Háálá álílee k'ehgo yáti' bee sodiszingo shii' sizíinii t'éí bee sodiszin, shintsíkees éí doo bee sodiszin da.

¹⁵Ákoshą' haa deeshnííł? Jó, shii' sizíinii bee sodiszin doo, shintsíkees ałdó' bee sodiszin doo; shii' sizíinii bee hashtaał doo, shintsíkees ałdó' bee hashtaał doo.

¹⁶Nii' sizíinii t'éiyá bee Diyin God baa hóniihgo diné t'áá azlį́'ígíí ááhdiníinii doo bił bééhózingóó éí, T'áá ákót'ée le', doo didooniił da.

¹⁷Jó, baa ahééh nínízingo yá'át'éehgo sodílzin nidi éí dinéhígíí doo bee bidziilgo ábi'dilnéeh da.

¹⁸T'áá ánółtso nihiláahdi álílee k'ehgo yáti' Níłch'i Diyinii yee yáshiiłti'go bąą Diyin God bich'į' baa ahééh nisin,

¹⁹ákondi da'oodlání áłah nádleehgi saad t'áá ashdla'í bee ak'idi'dootį́įłii bee yáshti'go, ła' diné nidínéeshtįįłjí shił aghá, álílee k'ehgo yáti' bee saad neeznáadi mííl bee yáshti'jí éí shił a'oh.

²⁰Shik'isóó, t'áadoo áłchínígi át'éego nitsídaahkeesí; jó, awée'gi át'éego doo ákǫ́ǫ́ ádaat'éii doo baa ákodanohsin da, nidi hóyáanii k'ehgo nitsídaahkees.

²¹Diyin God bibee haz'áanii bee ak'e'ashchį́įgo kóní: Bóhólníihii ání, Náánáła' dine'é dabizaad bee díí dine'é bich'į' hadeesdzih. Ákondi doo dashíists'ą́ą' da doo.

²²Áko álílee k'ehgo yáti' éí doo da'oodlánígíí bich'į' Diyin God bibee adziilii bee ééhózinii át'é, t'áá íídą́ą́' da'oosdląądígíí bich'į' éí dooda, nidi Diyin God bá hane'ii éí doo da'oodlání doo bá bee ééhózinii át'ée da, da'oodlánígíí éí bá át'é.

²³Éí bąą da'iinohdlánígíí t'áá ánółtso áłah soolį́į'gi t'áá ánółtso álílee k'ehgo yáti' bee yádaałti'go, nít'éé' diné doo ak'i'diitįįhii, doodaii' doo da'oodlánígíí yah ahikáahgo, T'óó dadiigis lá, daats'í danihididooniił.

²⁴Nidi t'áá ánółtso Diyin God bá dahołne'go, nít'éé' ła' doo oodlánígíí, doodaii' doo ak'i'diitįįhii yah ííyáago, éí Diyin God bá dahołne'ígíí t'áá ałtso binahjį' bí ádił ni'iilzíihgo ádaa ákodínóodzįįł, índa bí baa hwiinít'į́įgo yąąh tsídookosgo

²⁵bijéí yii' neinił'inii bééhodoozįįł, áko tsé'yaa dínóoljołgo Diyin God yich'į' sodidoolzįįł, áádóó ádidooniił, T'áá aaníí Diyin God nihitahgóó hólǫ́ǫ́ lá!

²⁶Ákoshą' hait'ée doo, shik'isóó? Jó, áłah nídaahdleehgóó, nihí ła' sin bee dahohtaał doo, ła' nida'nohtin doo, ła' éí nihił ííshją́ą́ ályaii baa dahołne' doo, ła' álílee k'ehgo yáti' yee yádaałti' doo, náánáła' éí ata' dahołne' doo. Kót'éego nidahohłáhígíí bee nihidziilgo dahohkah doo.

²⁷Álílee k'ehgo yáti' yee yádaałti'go bíni'dii nidilt'éegoda, doodaii' tált'éegoda ákódaat'į́į doo, biláahgo éí dooda, t'ááłá'í nítínígo bik'eh hoolzhishgo yádaałti' doo, áádóó bíni'dii ła'da bá ata' halne' doo.

²⁸Nidi há ata' halne'ii ádingo éí da'oodlání áłah nádleehgi t'áadoo yájíłti'í doo, nidi t'áá hayi'ídi yájíłti'go Diyin God bich'į' yájíłti' doo.

²⁹Bíni'dii Diyin God yá dahalne'ii nidilt'éegoda, tált'éegoda hadahadziih doo, áko ła'ígíí bíni'dii t'óó yaa nitsídaakeesgo nideiłkaah doo.

³⁰Nidi náánáła' oodlání nihitah sidáago, nít'éé' t'áá aaníinii ła' bił ííshją́ą́ silį́į'go, bíni'dii áłtsé yájíłti'ii t'óó jididoołhiłgo, oodlání hatah sidáii bazhdi'doo'áałgo bíni'dii hadoodzih.

³¹Áko t'áá ánółtso t'ááłá'í nootínígo Diyin God bá dahołne' doo, áko t'áá ałtso bił éédahodoozįįł, áádóó t'áá ałtso chánah dadooleeł.

³²Diyin God bá hojilne'ii t'áá hó hadziidziihígíí bee ádaa áhojilyą́ągo hadziidziih doo.

³³Háálá Diyin God éí hahóó'á doo bił yá'át'éeh da, nidi Diyin God bidiyį́į́' t'áá ałtsogóó áłah nídaadleehígi át'éego hasht'ediniit'éego bił yá'át'ééh.

³⁴Da'oodlání áłah nídaadleehgi sáanii t'áadoo yádajiłti'í dooleeł, háálá yádajiłti'ígíí doo bee há haz'ą́ą da, nidi t'áá bee haz'áanii Mózes baa deet'áanii ánínígi át'éego t'óó ak'eh hojíł'į́į doo.

³⁵T'áá ha'át'íhída nihił béédahodoozįįł daznízingo háni'dii t'áá dahaghandi hadahastiin éí bíndabízhdíłkid doo. Háálá da'oodlání áłah nádleehgi asdzání yájíłti'go baa yáhásin.

³⁶Da' Diyin God bizaadísh nihits'ą́ą́dóó háát'i'? Da' t'áásh nihí t'éí nihaa nít'i'? Dooda lą́ą!

³⁷Diné ła'da Diyin God yá halne'ii nishłį́ nízingo, éí doodago Níłch'i Diyinii aidii'aahii shaa deet'ą́ nízingo éí bíni'dii nihich'į' bee ak'e'ashchíhígíí t'áá aaníí Bóhólníihii yee has'áanii át'éego yaa ákonízin doo.

³⁸Nidi diné ła'da díí bee ak'e'ashchíhígíí doo yaa ákonízin dago, éí bíni'dii doo haa ákohwiindzin da doo.

³⁹Éí bąą, shik'isóó, Diyin God bá dahołne' doogo t'áá íiyisí bídin danohłį́į le', áádóó álílee k'ehgo yáti' t'áadoo ahąąh daaht'íní.

⁴⁰Bíni'dii t'áá ałtsoní yá'át'éehgo índa hasht'ehodít'éego baa na'aldeeh le'.