Read Navajo I CORINTHIANS 15 Bible Online

I CORINTHIANS 15 - Navajo bible

I CORINTHIANS 15

¹K'ad éí shik'isóó, hane' yá'át'éehii bee nihił hweeshne'ii deisoohdląądígíí áádóó bee nidasoozínígíí béénihiyiishnííh.

²Éí bee yisdáhóhkááh, hane' yá'át'éehii bee nihił hweeshne'ígíí t'áá dayínóhtą', t'áá hazhó'ó doo t'áá aaníí da'iisoohdląądgóogo éí t'áadoo nánídlíní da.

³Háálá alą́ąjį' á si'áanii, t'áá éí shí shaa deet'ánígíí nihaa náádiní'ą́; jó, éí ádił nida'ayeelzíi'ii yiniyé Christ daaztsą́, t'áá Diyin God bizaad bee ak'eda'ashchíinii ánínígíí bik'ehgo,

⁴áádóó yóó'áho'diilyaa, áádóó Diyin God bizaad bee ak'eda'ashchíinii ánínígíí bik'ehgo tágí jį́ aleeh góne' nááho'diilzá,

⁵índa Peter bich'į' yit'íní ízh'diilyaa, áádóó bik'ijį' hódahooł'aahii naakits'áadahígíí ałdó' bich'į' yit'íní ízh'diilyaa.

⁶Áádóó náábík'ijį' hakéé' tádadookaii ashdladi neeznádiindóó t'ah nówehgo t'áá łahjį' bich'į' yit'íní ínáázh'diilyaa, éí k'asdą́ą́' t'áá ałtso k'ad t'ahdii dahiná, nidi ła' éí bikéé' ádahasdįįd.

⁷Ákóne' James bich'į' yit'íní ízh'diilyaa, náá'ákóne' daal'aadii t'áá ałtso bich'į' yit'íní ínáázh'diilyaa.

⁸Akée'di índa, awéé' hanoodzáhígíí nahonishłingo, shí ałdó' shich'į' yit'íní ízh'diilyaa.

⁹Háálá daal'aadii ts'ídá a'ohgo nilíinii nishłį́įgo bee ádaa nitséskees, yil'aadii bee shi'dójíii dooleełígíí doo bą́ą́h nishłį́į da, háálá Diyin God dayoodláanii áłah nádleehígíí atésh'į́į́ nít'éé'.

¹⁰K'ad ánísht'éhígíí éí Diyin God shaa jooba'go ánísht'é, áko bibee ajooba' sheidiní'ánígíí doo t'áá ádzaaí silį́į' da, háálá daal'aadii t'áá ałtso biláahgo nisis'a', nidi t'áá shí éí dooda, jó, Diyin God bibee ajooba' shił hólǫ́ǫgo nisis'a'.

¹¹Áko shí áádóó náádaała' daal'aadii danilínígíí éí hane' t'ááłá'íígíí baa dahwiilne', áko éí bee nihił dahwiilne'ígíí deisoohdląąd.

¹²Christ daaztsą́ą́dę́ę́' náábi'diilzáago baa hóóne'go, ha'át'éegoshą' nihitahgóó ła' ádaaní, Daneeznáanii doo náádidoojah da?

¹³Daneeznáanii doo náádabi'diiljeehgóogo Christ ałdó' doo náábi'diilzáa da doo nít'éé'.

¹⁴Áádóó Christ doo náábi'diilzáágóogo hane' yá'át'éehii t'áadoo biniyéhígóó baa dahwiilne' doo nít'éé', índa t'áadoo biniyéhígóó da'iisoohdląąd doo nít'éé'.

¹⁵Áko ałdó' t'áá ádzaagóó Diyin God baa dahwiilne'go nihéédahoozin doo nít'éé', háálá Diyin God éí Christ néidiisá dadii'níigo dahwiilne'. Jó, daneeznánígíí t'áá aaníí doo náábi'diiljeehgóogo, Diyin God éí Christ doo néidiisáa da doo nít'éé'.

¹⁶Háálá daneeznánígíí doo náádabi'diiljeehgóogo Christ ałdó' doo náábi'diilzáa da doo nít'éé'.

¹⁷Áádóó Christ doo náábi'diilzáágóogo t'áadoo biniyéhígóó da'iinohdlą́ągo t'ahdii ádił nida'iyohsíih doo nít'éé'.

¹⁸Áko Christ dayoodlą́ągo ada'iishhaazhígíí ałdó' t'áá ádaasdįįdgi ádaasdįįd doo nít'éé'.

¹⁹Díí k'ad iinánígíí t'éiyá biyi' Christ bee nihił chodahoo'į́įgo, diné t'áá ałtso biláahdi hojooba' ádaniit'é.

²⁰Nidi t'áá aaníí Christ daaztsą́ą́dę́ę́' náábi'diilzá, daneeznáanii nááhididooljahígíí bitahdę́ę́' ts'ídá áłtsé nááhodi'diilzá.

²¹T'áá diné ła' honiinaa aniné hazlį́'ígi át'éego t'áá diné ła' ałdó' hanahjį' daneeznáanii náádiijeehii hazlį́į́'.

²²Háálá Ádam binahjį' diné t'áá ałtso daninéhígi át'éego t'áá ákót'éego ałdó' Christ hanahjį' t'áá ałtso hinááh ánídahodi'doolnííł.

²³Nidi t'áá ałkéé' hasnilígíí bik'ehgo Christ ts'ídá áłtsé náádiidzáii éí átsé, áadi índa t'áá bí náánádzáá góne' daboodlą́ągo daabíhígíí náábidi'dooljah.

²⁴Nidant'áii áádóó dahwée'aahii índa bídahólníihii t'áá ałtso Christ hak'eh deesdlį́į'go ałtso áhásdįįdóó bik'ijį' bee hóhólníihgo bił haz'áanii Diyin God éí aTaa' nilíinii baazhdidoo'ááł, áadi índa nihodoogááł.

²⁵Háálá hwe'ana'í t'áá ałtso bik'i jidées'eez áhoolaajį' nazhnit'áa doo.

²⁶Ana'í akée'di ádooldįįłii éí aniné.

²⁷Jó, Diyin God t'áá ałtsoní Christ yik'eh dahół'į́į doo biniyé yik'i dées'eezgo yee yíhoosníí'. Nidi, T'áá ałtsoní yee hóhoosníí', ha'níigo, t'áá ałtsoní nínígíí éí Diyin God doo atahgo ááhyiłníi da. Diyin God yee' Christ t'áá ałtsoní yee yíhoosníí'.

²⁸Áádóó aYe' jílíinii t'áá ałtsoní bee hóho'doosníí'dóó bik'ijį' haTaa', t'áá ałtsoní yee hóhoosní'ígíí, nát'ą́ą́' bílák'ee ná'ázhdooltį́į doo, áko t'áá ádzíłtso índa t'áá ałtsoní Diyin God há nilį́į doo.

²⁹Éí doo ákót'ée dago, diné daneeznánígíí bá tó bee daho'dilzį́hígíishą' ha'át'íí ááhdeiłní? Daneeznáanii doo t'áá aaníí náábi'diiljeehgóogo ha'át'íí biniyé ła' daneeznáanii bá tó bee daho'dilzį́į́h?

³⁰Ha'át'íísh biniyé ałdó' t'áá ákwíí ahéé'iilkeed bik'eh nihá nahodít'éego neiildeeh?

³¹Shik'isóó, Christ Jesus binahjį' nihaa jííníshłíigo t'áá aaníígóó ánihidishní, T'áá ákwíí jį́ shidiyoołhéełii kǫ́ǫ́ hólǫ́.

³²Éfasasgi nidaaldlooshii báádahadzidii bił da'aheeshgą́'ígi yę́ęgi át'éego diné shits'ą́ą́jí danilíinii hane' yá'át'éehii bee bidááhdóó shidziilgo sézį́įgo, t'áá aaníí daneeznáanii doo náábi'diiljeehgóogo ha'át'íísh bee ła'ishłaa doo? T'áá aaníí daneeznáanii doo náábi'diiljeehgóogo kóhá'nínígíí bik'ehgo, haa'íshą' da'iidą́ áádóó da'iidlą́ą doo, jó, yiską́ągoda dadíníi'néełgo da'át'é.

³³T'ááká nihida'dódleeh yíila': doo yá'át'éehii bee ahééda'diildahígíí iiná yá'át'éehii niyiiłchxǫǫh.

³⁴Ch'éédanohdzííd! T'áá ákogi ádaahnííł; t'áadoo bąąhági ánáádaaht'íní, háálá ła' Diyin God doo béédahonohsin da. Nihaa yáhóósįįdígíí biniinaa kót'éego nihich'į' yáshti'.

³⁵Nidi diné ła' na'ídídóołkiłgo ádidooniił, Haa yit'éegoshą' daneeznáanii náádidooljah? Ha'át'íí ats'íís shį́įshą' bee nináhizhdookah?

³⁶Diné doo hóyáanii nílíinii! Ha'át'íhída k'éédílyéehii bílástsii' łeeh ji'áahgo daatsaah, áádóó ak'ǫ́ǫ́' biyi'dę́ę́' hináanii hanisééh.

³⁷K'éédídléehii doo t'áá áłdįįd nidaneesánígíí k'éididléeh da, nidi tł'oh naadą́ą́' índa t'áá ha'át'íí shį́į́ k'éédílyéhígíí éí bílástsii' t'éiyá k'éididlééh.

³⁸Nidi bílástsii' hadahiniséehgo Diyin God t'áá bí bił yá'át'éhígi át'éego neinise', áko k'eelyéí neinise'go t'áá da'níł'ąą ádaat'éego ádeiile'.

³⁹Jó, ats'íís danilíinii t'áá ał'ąą ádaat'é, diné bits'íís t'áá sahdii át'é, áádóó naaldlooshii, łóó', áádóó tsídii ałdó' bits'íís t'áá sahdii ánáádaat'é.

⁴⁰Yót'ááh hiníláii yee hadadít'éii índa nahasdzáán yee hadadít'éii ałdó' dahólǫ́, nidi yót'ááh hiníláii dahólónígíí yee ayóó ánóolninii índa nahasdzáán bikáa'gi dahólónígíí yee ayóó ánóolninii éí doo aheełt'ée da.

⁴¹Jį́honaa'éí yee bits'ádi'nílíidii éí t'áá sahdii át'é, tł'éhonaa'éí bee bits'ádi'nídíinii éí t'áá sahdii ánáánát'é, índa sǫ' bee bits'áda'deezdíinii ałdó' t'áá sahdii ánáádaat'é; jó, sǫ' yee ayóó ádanóolninígíí t'áá da'níł'ąą ádaat'é.

⁴²Daneeznáanii náádiijeehii ałdó' t'áá ákónáánát'é. Ats'íís k'eelyéigi át'éego łeeh bi'diltéehii éí diłdzi', t'áá éí náábidi'doodláałii éí doo dółdzid át'ée da.

⁴³Hojooba' át'éego łeeh bi'diltééh, nidi ayóó át'éego ił nilį́įgo náábidi'doodlááł. Doo bidziilgóó łeeh bi'diltééh, nidi bidziilii nilį́įgo náábidi'doodlááł.

⁴⁴Ts'ísee k'ehgo ats'íís nilį́įgo łeeh bi'diltééh, diyin k'ehgo ats'íís nilį́įgo náábi'diidlááh. Ts'ísee k'ehgo ats'íís nilíinii hólǫ́ǫgo, diyin k'ehgo ats'íís nilíinii ałdó' hólǫ́.

⁴⁵Jó, Diyin God bizaad bee ak'e'ashchíinii ání, Átsé hastiin Ádam éí bíla' ashdla'ii nilíinii ályaa; Ádam akéédę́'ígíí éí níłch'i, iiná eidii'aahii jílį́.

⁴⁶Áko níłch'i k'ehgo nilínígíí éí doo átsé da, ats'íís k'ehgo nilínígíí éí átsé, áádóó índa níłch'i k'ehgo nilínígíí jiníyá.

⁴⁷Átsé hastiin éí łeezh bits'ą́ą́dóó áho'diilyaa, náá'ákéé' góne'ígíí éí Bóhólníihii yá'ąąshdę́ę́' jiníyá.

⁴⁸Nihokáá' dine'é éí t'áá łeezh bits'ą́ą́dóó ábi'diilyaaígi ádajít'é, áádóó yá'ąąsh bíí' dajílíinii éí t'áá yá'ąąshdę́ę́' jílínígi ádajít'é.

⁴⁹Łeezh bits'ą́ą́dóó áho'diilyaaígi ádaniit'éé nít'é'ígi át'éego yá'ąąshdę́ę́' jílínígi ádaniit'ée dooleeł.

⁵⁰Áko shik'isóó, kónihidishní: ats'íís índa dił éí Diyin God bee bóhólníihgo bił haz'áanii doo bił ałts'ą́ą́' adzóołk'iiz át'ée da, índa diłdzidii éí hool'áágóó hólóonii doo bił ałts'ą́ą́' adzóołk'iiz át'ée da.

⁵¹Jó'akon, na'nitin doo bééhózin da yę́ę bee nihił hashne'. Doo t'áá áníiltso dadíníi'néeł da, nidi t'áá áníiltso łahgo ádanihidi'doolnííł,

⁵²béésh łitsoii dilní akée'di ádííniidgo índa jineesk'ołígi át'éego tsxį́įłgo łahgo ádanihidi'doolnííł. Háálá béésh łitsoii dilní ádidooniił, áádóó daneeznánígíí doo náádadínóo'nééłgóó náádidooljah, áádóó nihí łahgo ádanihidi'doolnííł.

⁵³Háálá díí ats'íís didoołdziłii éí doo diłdzidii nídoodleeł, áádóó díí dadootsaałii éí ats'íís doo daatsaahii nídoodleeł.

⁵⁴Díí didoołdziłii doo diłdzidii násdlį́į'go, áádóó díí dadootsaałii doo daatsaahii násdlį́į'go, áadi índa kót'éego Diyin God bizaad bee ak'e'ashchį́ ha'nínígíí bohodoolnííł: Aniné baa honeeznáago bik'eh hodeesdlį́į́'!

⁵⁵Aniné nílíinii, nizǫ́ǫ́zshą' éí háájí? Jishcháá' nílíinii, bee nihik'eh dídlíiniishą' éí háájí?

⁵⁶Bąąhági át'éii éí aniné bizǫ́ǫ́z át'é, áádóó bąąhági át'éii bibee adziilii éí bee haz'áanii át'é.

⁵⁷Nidi haa'íshą' Diyin God bich'į' ahééh daniidzin doo, jó, nihiBóhólníihii Jesus Christ bee nihá ak'eh hodeesdlį́į́'!

⁵⁸Éí bąągo, shik'isóó ayóó'ánihósh'níinii, danołdzilgo, doo nihízhdóyííł át'éégóó t'áá áłahjį' t'ááłáhígi át'éego Bóhólníihii bá nidaał'a', háálá doo t'áadoo biniyéhígóó Bóhólníihii bá nidaał'a' dago nihił béédahózin.