Read Navajo I CORINTHIANS 5 Bible Online

I CORINTHIANS 5 - Navajo bible

I CORINTHIANS 5

¹Nihitahgóó na'ageh bee tsi'na'aldeehgo baa dahane' lá, doo da'oodlání bitahgóó nidi doo ákódahooníił da; jó, diné ła' hazhé'é be'asdzą́ą́ hwe'asdzą́ą́ ájiilaa ha'ní.

²Ákondi éí bee nihe'ádadílááh! Bąąh danihíni'go yá'át'éeh doo nít'éé', jó, diné aghahojíltínígíí nihitahdóó ats'áhodi'doolt'eeł.

³Háálá shí doo aadi naasháa da nidi, hóónááł nahalingo baa nitsískees, áko diné aghahojíltíinii ájíít'įįdígíí t'áá íídą́ą́' bee haa nísíst'įįd.

⁴NihiBóhólníihii Jesus Christ bízhi' binahjį' haa nísíst'įįd. Áko áłah soolį́į'gi nihitah honishłǫ́ nahalingo nihiBóhólníihii Jesus Christ bibee adziilii nihił hólǫ́ǫgo,

⁵éí diné bits'íís bich'į' nahodiyoo'naał biniyé Séítan baa dahodidooh'ááł, áko Bóhólníihii Jesus beiníłką́ądi hwii' sizíinii doodzih.

⁶Bee ádaa dahoh'niihígíí éí doo beełt'ée da! Da' doósh nihił béédahózin da, díík'ǫsh áłch'į́į́dígo taos'nii' t'áá át'é yiniisoł?

⁷Díík'ǫsh éí bąąhági át'éii nahalin, áko éí nahjį' kódaahłééh, áko taos'nii' ániidíii díík'ǫsh t'áágédígíí nidahonohłingo bąąhági át'éii nihitah ádin dooleeł. Háálá Christ atis'adeesdzáago bee bééhániihgo dibé yázhí nááhániihii nihá nilį́įgo nááhaaznii'.

⁸Éí bąą haa'íshą' bááh díík'ǫsh t'áá shiidą́ą'dii bił ályaii t'áadoo bił anída'iilzįįhgo ninádahwiidlaahí, háálá díík'ǫsh t'áá shiidą́ą'diígíí éí áká naat'á áádóó doo yá'áshóonii yaa halne', nidi díík'ǫsh t'áágééd bááh ályaii éí t'áádóo nídí áádóó t'áá aaníinii yaa halne', áko éigi át'éego ninádahwiidlaah doo.

⁹Na'ageh yee tsi'nidaakaii t'áadoo bił ałtaołdeehí, nihidishníigo nihich'į' naaltsoos íishłaa ni'.

¹⁰Ákondi doo da'oodlání na'ageh yee tsi'naaldeehii, doodaii' adádanoolníinii, doodaii' t'áá ádzaagóó nidahagizii, doodaii' e'elyaii yich'į' nidahałáii doo bił ałtaołdeeh da dooleełígíí doo ááhdishníi da, háálá nihokáá'dóó hahidoohkahgo doo bohónéedzą́ą da.

¹¹Nidi k'ad nihich'į' bee ak'e'ná'áshchíigo ááhdishníinii éí t'áá háiida ak'is jílį́įgo oodlání bee ho'dééji'ii na'ageh bee tsi'njigháago hwééhoozinii éí t'áadoo hoł ałtaołdeehí doo, adázhnoolníinii, doodaii' e'elyaii bich'į' nahojiłáii, doodaii' ajódziihii, doodaii' ajidláanii, doodaii' t'áá ádzaagóó nahodzigizii ałdó' dooda. Ákódaat'ínígíí nidi t'áadoo bił da'ohsání.

¹²Shíshą' ha'át'íí biniyé doo oodlání danilíinii beinísht'į́į dooleeł? Nihíyee' oodlání danilíinii baa nídaaht'į́.

¹³Diyin God éí doo oodlání danilíinii yeinít'į́. Áko nihitahdóó diné bąąhági ájít'ínígíí nahjį' háádahodoołt'eeł.