Read Navajo I CORINTHIANS 6 Bible Online

I CORINTHIANS 6 - Navajo bible

I CORINTHIANS 6

¹Nihí ła' oodlání danohłíinii, nihik'is ła' bił ałch'į' saad dahonoł'į́įgo ándahwii'aahii doo da'oodlání danilíinii baa dadidooh'áałgoósh doo hódzą' bee ádadoohnííł? Nidi da'oodlání baa dahidoh'aah.

²Diyin God bidiyį́į́' nihokáá' dine'é yaa nídadóot'įįłígíísh doo nihił béédahózin da? Áko nihokáá' dine'é baa nídadóoht'įįłgo kóníshéhégo haz'ánígíí baa nídadóoht'įįłgi nidiísh bi'oh danooł'ą́?

³Jó, diyingo nidaal'a'í nidi baa nídadíit'įįłígíísh doo nihił béédahózin da? K'ad iiná bídadéét'i'ii baa nídaaht'į́įgo bídeínóhhah.

⁴Áko díí iiná bídadéét'i'ii baa nídadóoht'įįłgo, ha'át'íí biniyé oodlání doo yada'óolíí' át'éii baa dahidoh'aah?

⁵Díí bee nihich'į' hahasdziihígíí binahjį' ádaa yádadínóohdzįįł. Da' diné hóyáanii Christ yee ak'is nilíinii yá k'ééhodoołdǫǫłiísh doo ła' nihitah naagháa da?

⁶Nidi oodlání nohłį́įgo éí doo oodlání ánihwii'aahii nilíinii náánáła' oodlání nilíinii nihá yaa nídóot'įįłgo biniyé bich'į' nidahoh'éésh.

⁷K'ad nidi naaltsoos ahee nidahołtsóosgo ts'ídá doo ákǫ́ǫ́ ádaaht'į́į da. Ha'át'éegoshą' doo hanii háni'dii t'óó bąąhági ádanihi'dil'į́į da? Ha'át'éegoshą' doo hanii háni'dii t'óó nihida'ídleeh da?

⁸Nidi t'áá nihí doo ákǫ́ǫ́ ádaaht'į́į da, nihik'isóó nidi binda'ohło'!

⁹Doósh nihił béédahózin da? Doo ákogi ádaat'éii Diyin God bee bóhólníihgo bił haz'áanii ts'ídá doo bíí' dadooleeł da. Éí bąą t'áadoo yóó'adanihinii'áhí: na'ageh bee tsi'dajíkáahii, e'elyaii bich'į' nidahojiłáii, dazhdiléii, hats'íís bee adádazhnoolníinii, diné t'óó baa yáhásingo t'áá hó ahaa ninájíldeehii,

¹⁰doodaii' dazhni'įįhii, adádazhnoolníinii, da'jidláanii, da'dzódziihii, aghada'jii'níiłii éí Diyin God bee bóhólníihgo bił haz'áanii łá'í nidi doo hóó' dadooleeł da.

¹¹Áko łah nihí ła' ákódanoht'éé nít'éé'. Nidi nihibąąhági át'éii nihąąh tánásgiz, Diyin God bich'į' nihi'doolzį́į́', índa Bóhólníihii Jesus bízhi' bee áádóó nihiDiyin God biNíłch'i Diyinii bee ts'ídá t'áá ákogi ádanoht'éego nihá ha'oodzíí'.

¹²T'áá ałtsoní bee shá haz'ą́ą nidi, doo t'áá ałtsoní shá yá'át'éeh da. T'áá ałtsoní bee shá haz'ą́ą nidi, doo ła' binaalte' deeshłeeł da.

¹³Ch'iyáán éí abid bá át'é índa abid éí ch'iyáán bá át'é, jiníi nidi Diyin God éí t'áá áłah íidoołdįįł. Áko lą́ą hats'íís éí na'ageh bee tsi'adoodááł doo bá át'ée da, nidi Bóhólníihii bá át'é, áádóó Bóhólníihii éí hats'íís bee bóhólnííh.

¹⁴Diyin God éí Bóhólníihii néidiisá, áko nihí ałdó' bibee adziilii yee náánihididoołjah.

¹⁵Danihits'íís Christ yee hadít'éii danilínígíísh doo nihił béédahózin da? Da' ákoósh shits'íís Christ yee ádíhólníhígíí nahjį' nidideesh'áałgo ałjiłniida yee ádíhólníihgo baa dideesh'ááł? Ts'ídá dooda lą́ą!

¹⁶Da' doósh díí nihił béédahózin da, ła' ałjiłnii bił jiináago éí bił ats'íís t'ááłá'íígíí jileeh? Háálá Diyin God ání, T'ááłá'í ats'íís jidooleeł.

¹⁷Nidi Bóhólníihii bizhdiiyáago baa ázhdeet'ánígíí éí bił łá'í dzizlį́į́'.

¹⁸T'áadoo na'ageh bee tsi'naohkaií. Bąąhági ájooníłígíí ła' hats'íís doo bídadéét'i' da, nidi na'ageh bee tsi'joogáałgo hats'íís bihozhdidoołt'ih.

¹⁹Diyin God éí Níłch'i Diyinii nihainíł'a', áko nihits'íís éí Níłch'i Diyinii yii' hináago bikin bii' sohodizin át'éegoósh doo nihił béédahózin da? Doo t'áá ádíí' danohłį́į da,

²⁰háálá ayóó át'éego ílį́įgo nihik'é niná'ílyá. Éí bąą nihits'íís bee Diyin God yee ayóó át'éii yit'íní ádoohłííł. [Nihii' sizíinii ałdó' bee Diyin God yee ayóó át'éii yit'íní ádoohłííł, jó, nihits'íís áádóó nihii' sizíinii Diyin God bí.]