Read Navajo I CORINTHIANS 7 Bible Online

I CORINTHIANS 7 - Navajo bible

I CORINTHIANS 7

¹K'ad t'éiyá bee ak'eda'shoołchíinii baa nídéesht'įįł: diné t'áadoo asdzání bił ahaa nijit'aashígo há yá'át'ééh.

²Nidi doo adázhdínóolniiłígíí biniinaa diné t'ááłá'í jinítínígo t'áá hó hwe'asdzą́ą́ dahólǫ́ǫgo yá'át'ééh, áádóó asdzání t'ááłá'í jinítínígo t'áá hó hahastiin dahólǫ́ǫgo yá'át'ééh.

³Ahastiin jílíinii hwe'asdzą́ą́ bíni' bi'jósingo baa ninájídaah doo, t'áá ákót'éego ałdó' e'asdzą́ą́ jílíinii hahastiin bíni' bi'jósingo haa ninádaah doo.

⁴Háálá e'asdzą́ą́ jílíinii doo t'áá ádíighahígo hats'íís bee hóhólníih da, nidi hahastiin ałdó' bee bóhólnííh; t'áá ákót'éego ałdó' ahastiin jílíinii doo t'áá ádíighahígo hats'íís bee hóhólníih da, nidi hwe'asdzą́ą́ ałdó' bee bóhólnííh.

⁵T'áadoo ałch'į' ádaa danohchį'í, t'áá hazhó'ó t'áá haada nízahjį' sodidoołzįįłgo biniyé bee ahadi'dooht'ááł, áádóó índa ałt'áádooht'ash, áko doo hada'íínółnínígíí biniinaa níłch'i bida'iiníziinii binanit'a'í Séítan wolyéii nihídínóotahígíí doo bá ashja doohłíił da.

⁶Nidi éidíígíí doo bee haz'áanii bik'ehgo ádíshníi da, nidi díí bee nanihinishtingo ádíshní.

⁷Diné t'áá ałtso shígi ádajít'ée laanaa nisin. Nidi diné t'ááłá'í jinítínígo Diyin God há íinízinii bik'ehgo dajiináa doo, ła' shígi át'éego, áádóó náádaała' hwe'asdzą́ą́ dahólǫ́ǫgo dajiiná.

⁸Áko doo da'ayéhígíí áádóó asdzání bąąh ádahasdįįdii ábidishní, Shí t'áá sáhí naasháhígi ádajít'éego há yá'ádaat'ééh nisin.

⁹Nidi doo hada'jólnínígíí éí hwe'asdzą́ą́ dahólǫ́ǫ́jí há yá'át'ééh, háálá adáhonooní hayi' dahodiłidjí éí doo há yá'át'éeh da.

¹⁰Nidi da'ayéhígíí t'éiyá k'ad kót'éego bá haasdziih, nidi shí dooda, Bóhólníihii éí haadziih, éí e'asdzą́ą́ jílíinii hahastiin doo yóó'azhdidoo'áał da,

¹¹nidi yóó'azhdíí'ą́ągo doo hánáá'doogeh da, doodaii' bił k'é ná'ahizhdidoo'niił, áádóó ahastiin jílíinii hwe'asdzą́ą́ doo yóó'azhdidoo'áał da.

¹²K'ad éiyá shí bee nitséskeesígíí náádaała'ígíí bee bich'į' haasdziih, díí Bóhólníihii doo bits'ą́ą́dę́ę' da: ak'is jílíinii ła' éí hwe'asdzą́ą́ doo oodląąhgóó, nidi bił dzizkéego bił yá'át'éehgo, hwe'asdzą́ą́ doo yóó'azhdidoo'áał da.

¹³Asdzání jílíinii ła' éí hahastiin doo oodląąhgóó, nidi bił jiinánígíí bił yá'át'éehgo, hahastiin doo yóó'azhdidoo'áał da.

¹⁴Háálá ahastiin doo ajoodlánígíí hwe'asdzą́ą́ oodlánígíí binahjį' diyingo ats'áho'deeltį́į doo, t'áá ákót'éego e'asdzą́ą́ doo ajoodlánígíí hahastiin oodlánígíí binahjį' diyingo ats'áho'deeltį́į doo. Doodago éí ha'áłchíní danilíinii doo da'oodlání ba'áłchínígi ádaat'ée doo, nidi k'ad éiyá diyingo ats'á'nil.

¹⁵Nidi doo oodlání nilíinii yoodeeshááł nízingo háni'dii yoodighááh, kwe'é haz'ą́ągi ak'is oodlání nilíinii, doodaii' alah oodlání nilíinii doo bóho'diistł'ǫ́ǫ da. Háálá Diyin God éí, Hózhǫ́ǫgo ahił dahinohná, nihidííniid.

¹⁶E'asdzą́ą́ oodlání nílíinii, niniit'aa daats'í nahastiin yisdádooltééł. Da' éísh doo nił bééhózin da? Ni ałdó', ahastiin oodlání nílíinii, niniit'aa daats'í ne'asdzą́ą́ yisdádooltééł.

¹⁷T'ááłá'í jinítínígo Diyin God háká ádííniid yę́ędą́ą́' Bóhólníihii hataadeideez'ánígíí bik'ehgo dajiináa doo. Ákót'éego da'oodlání áłah nídaadleehgóó t'áá ałtsogo bee hoséł'ą́.

¹⁸Diné éí Diyin God háká ádííniid yę́ędą́ą́' t'áá íídą́ą́' hąąh náhineeshgizhgo, éí hąąh náhineeshgizhígíí háni'dii doo k'éézh'doołchxǫǫł da. Háká ádííniid yę́ędą́ą́' doo hąąh náhineeshgizh dago, éí háni'dii doo hąąh náhidínóolgish da.

¹⁹Ąąh náhinilgish éí t'áadoo nilíní da, índa doo ąąh náhinilgish ałdó' t'áadoo nilíní da, nidi Diyin God yee has'áanii bik'eh hól'į́ t'éiyá ílį́.

²⁰T'ááłá'í jinítínígo Diyin God háká ádííniid yę́ędą́ą́' ádajít'éé nít'é'ígi éí bíni' t'áá ákódajít'ée doo.

²¹Da' naalte' nahaaznii'ii nílį́įgoósh níká áhodoo'niid? Éísh bik'ehdii, nidi néédidoochiłgo ná ashja'iilaa ládą́ą́' bíni'dii néédíchííd.

²²Naalte' nahaaznii'ii nilį́į nidi Bóhólníihii háká ániihgo éí Bóhólníihii béidííchidii jileeh. T'áá ákót'éego diné doo naalte' nahaaznii'ii nilíinii bíká áhodoo'niidii éí t'áá aaníí Christ yíí' yileeh.

²³Jó, ayóó át'éego nihik'é niná'ílyá, áko t'ááká diné doo yá'át'éehii yich'į' nihił'áago bida'oohłe' yíila'.

²⁴Shik'isóó, t'ááłá'í nootínígo t'áá Diyin God nihíká ádííniidą́ą́' ádanoht'é yę́ęgi át'éego áhánígo bił dahonohłǫ́ǫgo áda'díínółzin.

²⁵K'ad doo da'ayéhígíí bił haz'ą́ągi baa nídéesht'įįłgi Bóhólníihii doo yee shá has'ą́ą da, nidi Bóhólníihii shaa a'ááh nízinii binahjį' sha'ahódlíigo beinísht'į́.

²⁶K'ad nihich'į' nidahwiiłnánígíí biniinaa diné t'áá ájít'éhígi át'éego nijigháago há yá'át'ééh nisin.

²⁷Ne'asdzą́ą́ hólǫ́ǫgo yóó'adideesh'ááł t'áadoo níníziní. Asdzání nee ádingo t'áadoo she'asdzą́ą́ hodooleeł níníziní.

²⁸Nidi asíníyehgo doo bąąhági íinidzaa da, áádóó ch'ikę́ę́h nilíinii diné bee hazlį́į'go éí doo bąąhági ádzaa da. Nidi da'ohéehii nihich'į' nidahwii'náa dooleełígíí bits'ąą nihaa hą́ą́h nisin.

²⁹Shik'isóó, ááhdishníinii éí díí, koshídę́ę́' hadziih, áko k'ad kodóó be'asdzą́ą́ dahazlį́'ígíi nidi, t'óó doo be'asdzą́ą́ dahólǫ́ǫ da nidahalingo dahináa doo,

³⁰áádóó daachaígíí t'óó doo daacha da nidahalin doo, áádóó bił dahózhónígíí t'óó doo bił dahózhǫ́ǫ da nidahalin doo, áádóó nida'iiłniihígíí t'óó doo bee dahólóní da nidahalin doo,

³¹áádóó nihokáa'gi dahólóonii chodayooł'ínígíí doo chodayooł'į́į da nidahalingo dahináa doo. Háálá díí nihokáá' áhoot'éhígíí bił yóó'ahodoogááł.

³²T'áadoo ádił nídahodołchiłí doo nihósh'ní. Diné doo ayéhígíí Bóhólníihii bá na'anish yíneedlį́įgo haash yit'éegoda yił hóshǫ́ǫ dooleełgo yaa nitsíkees,

³³nidi ajiyéhígíí éí nihokáá' bił nidahazt'i'ii bízhneedlį́įgo haash yit'éegoda hwe'asdzą́ą́ bił hojíshǫ́ǫ dooleełgo baa nitsídzíkees,

³⁴áádóó ałdó' asdzání ajiyéehii índa asdzání doo diné bee haleehii ał'ąą át'éego hayi' honít'i'. Asdzání doo ajiyéehii éí Bóhólníihii bá na'anish bízhneedlį́įgo hats'íís índa hwii' sizíinii t'áá áłah diyin dooleełgo baa nitsídzíkees, nidi asdzání éí diné hwee hólóonii haash yit'éegoda hahastiin bił hojíshǫ́ǫ dooleeł biniyé nihokáá' bił nidahazt'i'ii bízhneedlį́įgo baa nitsídzíkees.

³⁵Díí nihá yá'át'éeh dooleeł biniyé ádíshní, nihidínéeshtł'ah biniyé éí dooda. Nidi beełt'éego índa t'áadoo nihiníłtł'aaígóó Bóhólníihii bá nidaał'a'go ánihideeshłííł biniyé ádíshní.

³⁶Diné ła'da, hatsi' t'ah doo diné bee haleehii doo la' ákwii bich'į' ánísht'ée da jinízingo áádóó bá'doogeh yilááh níísą́ągo, áko ts'ídá bá'doogehgo, bíni'dii íinízinígíí bá bizh'doolíiłgo bíni'dii bá'iigeh, éí doo bąąhági át'éii át'ée da.

³⁷Nidi diné ła' doo bił na'ii'náanii, t'áá íinízinígíí yik'ehgo ádooníiłgo bóhólníihgo, t'áá bijéí tł'ááhdę́ę́' shitsi' t'ah doo diné bee haleehii doo bá'doogeh da niizį́į'ii, éí yá'át'éehgi ádoonííł.

³⁸Áko bitsi' t'ah doo diné bee haleehii bíni'dii bá'doogeh niizį́į'ii éí t'áá ákogi ádoonííł, nidi hatsi' doo bá'doogeh da jiniizį́į'ii éí t'ah aláhídi át'éego yá'át'éehgi ázhdoonííł, áko t'áá ájíłah t'áá ákogi ázhdoonííł.

³⁹E'asdzą́ą́ jílíinii hahastiin ni'níłdįįd bijį́įjį' bíí' jílį́. Nidi hahastiin hats'ą́ą́' daaztsą́ągo béédoochidii jileeh, áko t'áá hó jinízinígíí bił ahaa náázhdoot'ash, nidi Bóhólníihii íinízinii bik'ehgo t'éiyá.

⁴⁰Nidi diné t'áágééd nijigháago éí t'ah aláhídi át'éego hoł hózhǫ́ǫ dooleeł nisin. Áádóó shí ałdó' Diyin God biNíłch'i Diyinii shee hólǫ́ nisingo ádíshní.