Read Navajo I CORINTHIANS 8 Bible Online

I CORINTHIANS 8 - Navajo bible

I CORINTHIANS 8

¹K'ad éí eda'alyaii bich'į' ch'iyáán náádahaaznii'ii beinísht'į́. T'áá áníiltso ił ééhózinii nihee hólǫ́ǫgo béédahoniilzin: ił ééhózinii éí bee ádaa dahoji'niih, nidi ayóó'ó'ó'ní t'éí bee daznéeséeh doo.

²Diné ła'da shił ééhózin lą́ą jinízinii hoł bééhodoozįįł yę́ę t'ah doo t'áá yíní át'éegi hoł bééhoozįįh dago át'é.

³Nidi t'áá háiida Diyin God ayóó'áyó'níigo t'áá éí Diyin God bééhósin.

⁴Áko eda'alyaii bich'į' ch'iyáán náádahaaznii'ii yidą́ą́jí baa náánéinísht'į́. Eda'alyaii éí ts'ídá t'áadoo nilíní da, nidi Diyin God t'éiyá t'ááłá'í hólǫ́ǫgo nihił béédahózin.

⁵Háálá diné ádeinízingo éí yá'ąąshdi, doodaii' nahasdzáán bikáa'gi diyin daolyéhígíí t'óó adahayóí áádóó bídahólníihii dabidi'nínígíí ałdó' t'óó adahayóí dahólǫ́ danízin.

⁶Nidi nihí nihił béédahózingo Diyin God t'ááłá'í hólǫ́, éí aTaa', t'áá ałtsoní bits'ą́ą́dóó hólóonii áádóó t'áá éí bá dahinii'ná. Áádóó Bóhólníihii t'ááłá'í hólǫ́, Jesus Christ wolyéii, éí bee t'áá ałtsoní dahólǫ́ índa t'áá éí bee dahinii'ná.

⁷Nidi diné doo t'áá ałtso éí bił béédahózin da. Ła' díí jį́įdi eda'alyaii yídaneesdinígíí biniinaa e'elyaii bich'į' ch'iyáán nááhaaznii'ii át'é t'ahdii danízingo deiyą́, áko t'áá íídą́ą́' doo ál'į́į da danízin nidi ádayoolíiłgo bąą t'ą́ą́' anídabii'nííł.

⁸Nidi ch'iyáán deiidánígíí éí doo Diyin God hólǫ́ǫjį' áhánígo yich'į' kóhodoolíił da. Azhą́ ch'iyáán doo deiidą́ą da nidi, doo a'ohgo nihaa nitsíkees da, doodaii' deiidą́ą nidi éí doo t'ah aláhídi ániit'éego ánihidi'doolníił da.

⁹Nidi bi'oodlą' doo dabidziilii doo dadínóołtł'ahígíí bąą nihá ashjada'ósin nidi bits'ąą ádaa ádahołyą́.

¹⁰Háálá ni, díí t'áá ałtso nił bééhózingo, e'elyaii bich'į' nahadlá bá haz'ą́ą́ góne' ííníyą́ą'go diné ła'da bi'oodlą' t'ah doo yiłdziłígíí niiłtsą́ągo éí eda'alyaii bich'į' ch'iyáán náádahaaznii'ii yidooyį́įłgi bił t'áá áko ádíílííł.

¹¹Áko shił ééhózin nínízinígíí bąągo nik'is bi'oodlą' doo bidziil daígíí Christ bá daaztsánígíí t'ą́ą́' anídootłish.

¹²Áko Christ bee nihik'isóó danilíinii doo hózhǫ́ bił éédahózinígíí t'ą́ą́' anídínóodahgo ádadoohłííł, áko éí bee bich'į' nida'iyohsííh, áádóó Christ ałdó' bich'į' nida'iyohsííh.

¹³Áko eda'alyaii bich'į' ch'iyáán náádahaaznii'ii yishánígíí biniinaa shik'is t'ą́ą́' anáátłizhgo ts'ídá yoołkááłgóó éí ch'iyánígíí doo náádeeshdį́įł da, áko shik'is doo shiniinaa t'ą́ą́' anídootłish da.