Read Navajo I CORINTHIANS 9 Bible Online

I CORINTHIANS 9 - Navajo bible

I CORINTHIANS 9

¹Da' doósh Jesus Christ bá yil'aadii nishłį́į da? Da' doósh t'áá aaníí doo shohodiit'i' da? Da' doósh t'áá aaníí Jesus Christ nihiBóhólníihii yiiłtsą́ą da? Da' doósh nihí Bóhólníihii bee shinaanish danohłį́į da?

²Ła' shį́į́ doo yil'aadii nishłį́įgo shaa nitsídaakees da, nidi nihí éí nihich'į' yil'aadii nishłį́įgo shaa nitsídaahkees. Háálá yil'aadii nishłį́įgo Bóhólníihii bá dahinohnánígíí bee shá bee ééhózinii danohłį́.

³Shaa nídaat'į́įgo hadasisidígíí bich'į' bee ák'ihadideesdzihgo ádíshní,

⁴Deeshį́łígíí índa deeshdlį́łígíí shaa doolyéełgo doósh bee shá haz'ą́ą da?

⁵She'asdzą́ą́ hólǫ́ǫgo oodlání nilį́įgo bił tádísh'aash dooleełgoósh doo bee shá haz'ą́ą da, t'áá ła' daal'aadii áádóó Bóhólníihii bik'isóó danilíinii índa Peterda éí ákódaat'ínígi át'éego?

⁶Da' Bárnabas índa shí naanishísh t'éiyá bee ák'ineiildzil doo?

⁷Jó, siláo nilíinii doo t'áá bí yik'é asłáago naabaah da. Ch'il na'atł'o'ii k'éididléehii bineest'ą' néídį́įh łeh. Na'niłkaadii na'niłkaadgo yits'ą́ą́dóó abe' yidlą́ą łeh.

⁸Díí t'áá diné ádaat'ínígíí bik'ehgo ádíshní. Da' bee haz'áaniísh ałdó' doo t'áá ákóníi da?

⁹Bee haz'áanii Mózes baa deet'áanii biyi' bee ak'e'ashchį́įgo ání, Béégashii éí tł'oh naadą́ą́' haił'éesgo t'áadoo bíchį́į́h bąąh nida'sooł'ání. Diyin God daats'í béégashii t'éiyá yaa nitsíkeesgo ádííniid?

¹⁰Éí doodago nihaa nitsíkeesgo daats'í ádííniid? Aoo', nihá yá'át'ééh biniyé bee ak'e'ashchį́. Jó, dá'ák'ehgi nihwiiłdlaadii nídí'nóołt'į́įłgo bił chohoo'į́įgo yinaalnish dooleeł, áádóó adoołhałii hééł í'doolíiłgo bił chohoo'į́įgo yinaalnish dooleeł.

¹¹Diyin God bits'ą́ą́dóó hane' yá'át'éehii nihitahgóó baa dahwiilne'go nihijéí biyi' k'idadiilyáago, nihí nihee dahólóonii bee nihíká anídoohjahgoósh doo bee nihá haz'ą́ą da?

¹²Ła' bee bá nahaz'ánígíí bik'ehgo bíká anáhjahgo, da' nihíísh doo t'ah aláhídi bee nihá haz'ą́ą da? T'áá áko nidi díí kót'éego bee nihá haz'áanii t'áadoo nihits'ą́ą́' chodeisiil'įįd da, nidi Christ baa hane' yá'át'éehii doo dadíníiltł'ah da biniyé t'áá ałtsoní t'óó bééda'ii'nííh nít'éé'.

¹³Kin bii' sohodizin góne' nidaal'a'ii t'áá áádóó bich'iyą' nishódayoołt'eehgo, áádóó ałdó' Diyin God bich'į' diné yá nááda'iiłniihii éí náádahaaznii'ii łahjį' bíí' nidahaleehgo, da' éísh doo nihił béédahózin da?

¹⁴T'áá ákót'éego ałdó' hane' yá'át'éehii yaa dahalne'ii éí yaa dahalne'ígíí bits'ą́ą́dóó ada'dilnah doogo Bóhólníihii yee nihoní'ą́.

¹⁵Nidi díí kót'éego bee shá haz'ánígíí doo ła' choiséł'įįd da, doo nidi shá ákódazhdoolííł biniyé bee ak'e'ashchį́į da. Háálá bee shaa hodzosdli'ígíí doo nahjį' nididoot'ááłgóó biniinaa dadeestsaałjígo nidi aláahgo shił t'áá áko.

¹⁶Hane' yá'át'éehii baa hashne'ígíí éí binahjį' ádaa hash'niih dooleełii t'áá shá ádin, háálá t'áá ákónéehee ásht'į́. Áko hane' yá'át'éehii doo baa hashne'góó dooládó' doo hojooba' ájínínígi ánísht'ée da doo!

¹⁷Háálá díidí t'áá shíniik'eh baa naasháago bik'é shich'į' ni'iilyée doo. Nidi doo t'áá shíniik'eh baa naasháa dago, jó, hane' yá'át'éehii baa hashne' dooleełígíí bee sha'ahoosdlíí'.

¹⁸Áko ha'át'íishą' bik'é shich'į' ni'iilyée doo? Díí lą́ą: hane' yá'át'éehii baa hashne'go t'áá jíík'e baa hashne', áko hane' yá'át'éehii baa hashne'ígíí bik'é shich'į' azláa dooleełgo bee shá haz'ą́ą nidi t'áá jíík'e baa naashá.

¹⁹Azhą́ diné doo ła' bá naash'a' da nidi, diné lą'í Christ deidoodląąłgo bíni' bá ádahashłééh biniyé t'áá ałtso bá naash'a'go í'diishyaa.

²⁰Jew dine'é éí Christ deidoodląąłgo bíni' bá ádahashłééh biniyé t'áá bígi át'éego í'diishyaa; azhą́ shí bee haz'áanii Mózes baa deet'áanii doo yiyaa naatłizhii nishłį́į da nidi, éí bee haz'áanii yiyaa nandeehígíí Christ deidoodląąłgo bíni' bá ádahashłééh biniyé t'áá bígi át'éego í'diishyaa.

²¹Doo Jew dine'é danilíinii éí bee haz'ánígíí doo yiyaa sinilii, Christ deidoodląąłgo bíni' bá ádahashłééh biniyé t'áá bígi át'éego í'diishyaa. Jó, bee haz'áanii Mózes baa deet'áanii shee hólǫ́, nidi Christ yee has'áanii t'áá aaníí biyaa naashtłizh.

²²Bi'oodlą' doo dabidziilígíí Christ yéego dayoodlą́ą doo biniyé bíni' bá ádahashłéehgo t'áá bígi át'éego doo shidziilgóó í'diishyaa. T'áá ałtsojį' t'áá ádzíłtso t'áá ha'át'éhígoda ła' Christ yisdádahodiyoonił biniyé t'áá hó ádajít'éhígi át'éego í'diishyaa.

²³Hane' yá'át'éehii hoł béédahodoozįįł biniyé, áádóó hane' yá'át'éehii bee ak'ihojidlíii hoł ałts'ą́ą́' da'nisk'iiz doo biniyé díí t'áá ałtso baa naashá.

²⁴Da' doósh nihił béédahózin da, ałghadikáahii t'áá ałtso deiltih, nidi t'ááłá'í honiłnéehii yoosbáanii bailyééh? Áko wołí bee daołtéehgo woobįįhii deidoołbįįł.

²⁵Nídeiltihii t'ááłá'í nítínígo t'áá ałtsojį' ádaa áháyą́ yee nida'ádínítaah. Éidí woobįįhii ádoodįįłii bee dahodooleeł yiniyé ádaat'į́, nidi nihí woobįįhii hool'áágóó hólóonii biniyé ádeiit'į́.

²⁶Áko doo t'óó dzólníígóó yishwoł da, áádóó adziists'inígíí doo t'óó dzólníígóó adziists'in da.

²⁷Nidi shits'íís doo shik'eh didlį́į da doo biniyé ts'ídá t'áá íiyisí shik'eh hół'į́įgo íínísin, áko diné náádaała' hane' yá'át'éehii bee bił nidahosisne'dóó bik'ijį' doo shidí'nóodzįįłígíí éí dooda.