Read Navajo II CORINTHIANS 1 Bible Online

II CORINTHIANS 1 - Navajo bible

II CORINTHIANS 1

¹Shí Paul, Diyin God íinízinii binahjį' Jesus Christ yá yil'aadii nishłíinii, áádóó Timothy nihik'is, éí Kórinthdi Diyin God dayoodláanii áłah nádleehígíí bich'į' naaltsoos íilnééh. Akéya hoolyéedi t'áá át'éé nít'éé' Diyin God bidiyį́į́' danilíinii t'áá bił bich'į' naaltsoos íilnééh:

²Diyin God nihiTaa' áádóó Bóhólníihii Jesus Christ bibee ajooba' índa bibee ach'į' hózhǫ́ náhásdlį́į'ii yee nihik'ijidlíi doo.

³Diyin God, nihiBóhólníihii Jesus Christ biTaa' nilíinii t'áá éí aTaa' aa a'ááh nízinii índa diné t'áá ałtsojį' hayi'iyoołníihii, éí baa ha'niih,

⁴éí t'áá ałtsojį' atínihi'dil'į́įgo hanihi'iyoołnííh, áko atídabi'dil'íinii t'áá ałtso nihí ałdó' éí hadabi'iyiilníih doo, Diyin God bee ha'ahóní yee hanihi'iyoosnii'ígíí t'áá éí bee diné hadabi'iyiilníih doogo bídaniil'ą́.

⁵Háálá Christ yik'ee ti'hooznii'ígíí nihí ałdó' lą'ígóó éí bik'ee ti'dahwii'nííh, t'áá ákót'éego ałdó' Christ bee lą'íjį' hada'ííníilní.

⁶Nihí atínihi'dil'į́įgo éí bee hada'íínółní índa yisdáhóhkááh biniyé át'é, índa hanihidi'yoolniihgo éí bee hada'íídóołniił biniyé át'é, jó, éí bee bik'ee ti'hwii'níihii t'áá éí bik'ee ti'dahoohníihgo hada'íínółní índa yisdáhóhkáah doo.

⁷Bee nihá nihił chohoo'íinii éí t'áá íiyisí niłdzil, háálá nihił bééhózingo bik'ee ti'hwii'níhígi át'éego nihí ałdó' bik'ee ti'dahoohnííh, áko bee ha'ííníilnínígi át'éego ałdó' bee hada'íínółníi doo.

⁸Shik'isóó, Éízhadi atínihi'dool'įįdígíí nihił béédahózin doo nihííníi'ní, éí ts'ídá t'áadoo beełt'éhígóó, doo biká'ágóó ti'hwiisii'nii', áko t'áá hinii'náa dooleeł yę́ęgi nidi doo chohóó'įįd da.

⁹Jó'áko, nanihidi'niitseedgo ga' nihá nihoot'ą́ą́ lá niidzį́į́', nidi díí doo t'áá nihí áda'ííníidlíi da doo biniyé ákódzaa, Diyin God éí daneeznáanii néidiyiiłjeehii t'éí ba'ííníidlíi doo biniyé.

¹⁰Díí báhádzidgo adiyoołhéełii yits'ą́ąjį' háánihíínil, áko díí bits'ą́ąjį' háánihiiníiłii t'áá éí hanáánihidoo'niłgo baa náádadzííníidlí,

¹¹nihí ałdó' nihisodizin bee nihíká anáhjahgo, áko lą'í bisodizin binahjį' ak'ihojidlí bee nihik'ihodzisdlí'ígíí lą'í nihá yaa ahééh dadínóozįįł.

¹²Nihokáá' dine'é bitahgóó áádóó t'ah aláhídi át'éego nihí nihich'į'go diyingo índa Diyin God binááł t'áádóo nídí ádaa áhwiilyą́ągo hinii'náago nihił bééhózingo baa nihił dahózhǫ́ǫgo t'áá éí bee nisiidzį́. Éí doo nahasdzáán bikáá'dóó bee hódzáanii bik'ehgo íit'į́į da, nidi Diyin God nihaa joozba'ígíí bik'ehgo íit'į́.

¹³Háálá dayínółta'ígíí áádóó baa ákodanoozį́į'ii t'éiyá bee nihich'į' ak'e'iilchí, áádóó t'áá yíní át'éegi baa ákodanohsin dooleełígíí bíká shił chohoo'į́.

¹⁴T'áá íídą́ą́' doo t'áá át'éegi baa ákodanoozį́'ígíí éí nihaa hwii'niih dooleełígi át'éego nihí ałdó' aadi t'áá ákót'éego nihaa dahohniih dooleełígíí Bóhólníihii Jesus beiníłką́ądi índa ts'ídá t'áá át'éegi nihił béédahodoozįįł.

¹⁵Díidíígíí doo shił naaki nilį́į́góó bąą, naakidi t'áá ałkéé' nihaa náhwiijiidoobaał biniyé átsé nihaa deeshááł niizį́į́' nít'éé',

¹⁶háálá Masedóniyagóó yisháałgo átsé nihaa deeshááł, áádóó Masedóniyadę́ę́' t'ą́ą́' nááshdáałgo ałdó' nihaa náádeeshdááł áádóó índa Judíyagóó nihéénísdzáago shíká adoohjah niizį́į́' nít'éé'.

¹⁷Da' t'óósh ádíshníigo kódeeshnííł jiní, dashíínóh'ní? Da' nihokáá' dine'é k'ehgo naha'áii nahalingo nahash'áagoósh ádíshní, t'áá íídą́ą́', Aoo', aoo', dishníigoósh, Dooda, dooda, náádísh'níi doo?

¹⁸Diyin God ba'ahódlíii nilínígi át'éego saad bee nihich'į' hahasdziihii éí t'óó, Aoo', índa, Dooda, doo dishníi da.

¹⁹Háálá Silvéínas áádóó Timothy índa shí ałdó' nihitahgóó Diyin God biYe' Jesus Christ baa dahwiilne'ígíí éí, Aoo', índa, Dooda, doo ha'níinii át'ée da, nidi bí éí, Aoo' oołeełii nilį́.

²⁰Háálá Diyin God t'áá ałtso yee nihwiiz'áanii Christ bee, Aoo' oołeełgo bohoolnííł, Diyin God baa ha'niih doo biniyé bí bee, T'áá ákót'ée doo, dadii'ní.

²¹Diyin God éí Christ bee ahee daniildzilgo índa diyingo ats'ánihinínil;

²²t'áá éí bíí' niidlį́įgo bééhózingo ánihiilaa, índa biNíłch'i Diyinii t'áádóo nídí bee ééhózinii nilį́į doogo nihijéí yiih yiyííł'a'.

²³Nidi doo yínííł biih dínóohdah da nisingo biniinaa Kórinthdi doo nihaa níyáa da, áko t'áá aaníí ádíshníigo Diyin God yee shá hadoodzihgo yíníshkeed.

²⁴Nihe'oodlą' doo nihits'ą́ą́' bee ádíhwííníilníih da, háálá danołdzilgo nihe'oodlą' bee nisoozį́, nidi nihił dahoniilzhǫ́ biniyé nihineiilnish.