Read Navajo II CORINTHIANS 11 Bible Online

II CORINTHIANS 11 - Navajo bible

II CORINTHIANS 11

¹T'áá yíní ádinígi át'éego t'áá áłts'íísígo hadeesdzihígíí bich'į' hada'íínółníi doo nisin. T'áá shǫǫdí shich'į' hada'íínółní!

²Ch'ikę́ę́h t'ah doo diné bee haleehii éí bahastiin t'ááłá'í dooleełígi át'éego Christ baa danihidiyé'ą́ągo Diyin God k'ehgo łe'hasin bee nihaa łe'nisin.

³Nidi níłch'i bida'iiníziinii binanit'a'í binahagiz yee átsé asdzą́ą́ Íiv yi'deezlo' yę́ęgi át'éego nihintsíkees t'ááłá'íígíí bee Christ nihił danilíinii bits'ą́ąjį' t'áá ádzaagóó anihidiyoo'ishii éí nihá binásdzid.

⁴Háálá ła'da náánáádáałii éí Jesus baa hwiilne'ii bits'ą́ą́jí Jesus łahgo ánáánát'éii yaa nááhálne'go, doodaléi' Níłch'i Diyinii nihee dahazlį́į'ii bits'ą́ą́jí níłch'i łahgo át'éii nihee náádahadleehgo, náádoodaléi' hane' yá'át'éehii nídadooláhígíí bits'ą́ą́jí łahgo át'éii nínáádadoołéego, jó, éí t'áá chaałída baa ádadiyoht'aah.

⁵Daal'aadii aláahdi ádaat'éii doo t'áá bi'ohgo ánísht'éego ádaa nitséskees da.

⁶Azhą́ yáti' daats'í doo yiishchįįh da nidi, baa yáshti'ígíí éí ts'ídá shił bééhózin; díidíígíí t'áá ałtsoní binahjį' t'áá ałtsojį' nihił ííshjání íishłaa.

⁷Diyin k'ehgo ayóó át'éii ádanihididoolníłígíí biniyé a'ohgo í'diishyaago t'áadoo bideenánígóó Diyin God baa hane' yá'át'éehii bee nihił hweeshne'ígíísh bee ádił asisziih?

⁸Náánáła' da'oodlání áłah nídaadleehii béeso yee shíká anájah nít'éé' yę́ę bee nihinishishnish.

⁹Áádóó nihitahgi naasháago t'áadoo le'é bídin nishłį́ yę́ędą́ą́' t'áadoo ła'da naanish biih yíłt'e' da. Háálá Masedóniyadę́ę́' ałk'isóó danilíinii nidahaaskaígíí bídin nishłíinii éí yee shíká ííjéé'. Áko ła'da t'áá ha'át'éegoda naanish biih hodeesht'eełjį' bił t'ą́ą́' sétį́ áádóó bił t'ą́ą́' sétį́į doo.

¹⁰Christ binahjį' t'áá aaníígóó yáshti'go ádíshní, Akéya hoolyéegi, díí bee aa ha'niihígíí ts'ídá doo didoolyił da.

¹¹Ha'át'éegoshą'? Da' doo ayóó'ánihíínísh'níi daígíí daats'í biniinaa? Jó, ayóó'ánihíínísh'nínígíí Diyin God shá bił bééhózin!

¹²Áko k'ad baa naasháhígíí ts'ídá t'áá éí baa naasháa doo, áko ła' ádeinízingo, Paul éí Diyin God bá joolnishígíí t'áá bił aheełt'éego nideiilnish, danízingo ádaa daha'niihígíí dabiyooch'íidgo béédahodoozįįł.

¹³Háálá t'áá ádzaagóó nidazh' nitinígíí éí t'óó ádahozhdil'į́įgo daal'aadii dajílį́, naalnishí binda'adlo'ii dajílį́, éí Christ yá daal'aadii t'óó béé'ádahozhdil'į́.

¹⁴Áyaanída Séítan t'áá bí níłch'i bida'iiníziinii binanit'a'í nilíinii nidi, łahgo át'éego diyingo naal'a'í bits'ádi'nídínígi át'éego yí'ínídiil'įįh.

¹⁵Éí bąą bá nidaal'a'í ałdó' łahgo át'éego ts'ídá t'áá ákogi é'ét'é yá nidaal'a'í nahalingo yí'ínídadiil'įįhígíí doo t'óó bik'ee ił ahayói da. Yaa nidaaskaígíí bik'ehgo até'él'į́ bii'jį' t'óó bá nidahwiizt'i' doo.

¹⁶K'ad díí bee hanáánásdziih, Ła'da doo la' áhojilyą́ą da, t'áadoo dashijó'níní, nidi nihí ła' ákódashíínóhníigo doo áhályáaniigi ánísht'éego t'óó yéego shił hada'íínółní, éí binahjį' shí ałdó' t'áá áłts'íísígo aa hodeesh'nih.

¹⁷K'ad díí bee yáshti'ígíí doo Bóhólníihii yee has'ą́ą da, nidi doo áhályáanii k'ehgo ádaa ha'niih bee ádaa jóshdlíigo ádíshní.

¹⁸Jó, lą'í nihokáá' bił nidahazt'i'ii yee ádaa daha'niih, éí lá bąą shí ałdó' ádaa hodeesh'nih ni.

¹⁹Jó, t'áá shį́į́ dahonohsą́ągo doo ádahalyáanii bizaad bąą nihił dahózhǫ́ǫgo bich'į' hada'íínółní!

²⁰Háálá diné danilíinii naalte' ádanihósingo, doodaléi' t'óó nihaa nahodikaigo, doodaléi' na'adlo' yee łídanihicháazhgo, doodaléi' ayóó át'éii ída'dil'į́įgo, náádoodaléi' nihizanídadzilts'į́įh nidi éí t'áá ałtso bich'į' hada'íínółní.

²¹Ákónihidiilníłígi doo bíniildzil da, éí baa yániidzin! Ákondi t'áá háiida t'áá ha'át'íhígíida t'áadoo náhoniyésí bee ádaa hoji'niihgo shí ałdó' t'áadoo náhoniyésí t'áá éí bee ádaa hodeesh'nih (doo áhályáanii nahalingo ádíshní).

²²Da' éísh Hííbrew dine'é danilį́? Shí lá ałdó' t'áá éí nishłį́ ni. Da' Ízrel dine'éésh danilį́? Shí lá ałdó' t'áá éí nishłį́ ni. Da' Éíbraham bits'ą́ą́dóó yichíiłiísh danilį́? Shí lá ałdó' t'áá éí nishłį́ ni.

²³Da' Christ yá nidaal'a'iísh danilį́? Shí lá t'ah aláhígo yá'át'éehgo éí nishłį́ ni; naanish t'ah aláhídi ádaat'éii baa naashá, doo jóołta' ánéelą́ą'di náshidi'neesghaal, t'ah aláhídi át'éego awáalyaaí nísísdlį́į́', índa lą'ídi k'asdą́ą́' shi'diisyį́ (doo áhályáanii nahalingo ádíshní).

²⁴Jew dine'é danilíinii tádiindóó ba'aan náhást'éidi nínádashidiiłtsxisgo ashdladi ákónéelą́ą'di nínádashineestsxas.

²⁵Táadi tsin bee náshidi'neesghaal; łah tsé bee k'asdą́ą́' shił nidzílne'. Táadi tsinaa'eełtsoh shił názts'il; ła'a tł'éé' áádóó ła'a jį́ dah naash'eeł nít'éé';

²⁶nídíshdááhgóó díí bee bádahadzidii bitaa séyá, tooh danílíinii, aghada'ii'níiłii, t'áá shí shidine'é nilíinii, doo Jew dine'é danilíinii, kin hadaas'áii dabiyi'góó, dahonoojítahgóó áádóó tónteel bikáá'góó, áádóó ałk'isóó ádahodil'íinii bee bádahadzidii bitaa séyá,

²⁷naanish shiiłhéego áádóó shich'į' nahwii'náago ti'hwiisénii', haa shį́į́ néelą́ą'di tł'éé' bíighah doo ashhoshgóó dichin áádóó dibáá' nishłį́įgo, t'áá ahą́ą́h ch'iyáán t'áágééd tádííyá, yishdlóohgo, éé' bídin nishłį́įgo tádííyá.

²⁸Áádóó náánáła' bik'ee ti'hwiisénii'ígíí t'áadoo ch'ídaash'a'í, da'oodlání áłah nídaadleehii t'áá ałtso baa áháyą́ągi t'áá ákwíí jį́ bich'į' shíni' íí'á.

²⁹Ła'da bi'oodlą' doo bidziilgóó shí éí shił bahojoobá'í. Ła'da adoosihjį' abidi'noot'aa'go éí biniinaa doo shił haldin da.

³⁰Ts'ídá ádaa hash'niih dooleeł ládą́ą́', t'áá ha'át'íhída doo shidziilgóó ásósinígíí t'éí bee ádaa hash'niih doo.

³¹NihiBóhólníihii Jesus Christ biDiyin God t'áá éí biTaa' nilíinii, hool'áágóó baa ha'niihii, bił bééhózingo doo shiyooch'íid da.

³²Damáskasdi kin haal'áhígíí Áretas naat'áanii nilínígíí bá yinanit'a'í nilíinii bisiláo shił nidadoodił biniyé hada'ídół'į́į́', yiłníí nít'éé',

³³nidi kin haal'áii ditą́ągo binaa ahéé'ítł'inígíí tsésǫ' góyaa ts'iizis shił bidaadlo'go biyaa háíyá.