Read Navajo II CORINTHIANS 2 Bible Online

II CORINTHIANS 2 - Navajo bible

II CORINTHIANS 2

¹Nidi doo nihíni' deideesh'aał da niizį́į'go doo akǫ́ǫ́ déyáa da.

²Háálá nihíni' deił'a'goshą', háí shił hózhǫ́ǫgo áshidoolííł; jó, nihíni' deił'a'ii nihí t'éí shił nídahodooshǫǫł.

³Aadi níyáago shił dahodooshǫǫłgo doo shíni' deidooł'aał da biniyé nihich'į' naaltsoos íishłaa, háálá t'áádóo nídí t'áá ánółtso baa shił hózhóonii éí nihí ałdó' baa nihił dahózhǫ́ǫ doo.

⁴Háálá shíni' łą́ągo áádóó shijéí neezgaigo índa t'áá íiyisí nihaishchago nihich'į' ak'e'shéłchį́, nihíni' deideesh'aał biniyé éí dooda, nidi t'áá íiyisí ayóó'ádanihósh'níigo bee nihaa nitséskeesígíí nihił béédahodoozįįł biniyé nihich'į' ak'e'shéłchį́.

⁵Nidi hazhó'ó yáshti'go éí kót'é, ła'da áni' yiyiił'a'go, éí doo t'áá shí t'éiyá shíni' jiił'a' da, nidi haa níłtsogo shį́į́ nihí ałdó' t'áá ánółtso nihíni' dajiił'a'go át'é.

⁶Ła'da ákót'ínígíí bee atíbidi'doolníiłgi aghá ánéelą́ą'go yee bá hadaasdzí'ígíí éí bíighah.

⁷Yínííł doo t'áá íiyisí bide ádooníił da biniyé yee ádił asziih yę́ę bá yóó'adadidooh'ááł, áádóó hadabidi'yoołnih.

⁸Éí bąą ayóó'ádeínóh'níigo bich'į' háádadoohdzihgo baa nídanihooshkąąh.

⁹Háálá t'áá ałtsojį' ak'eh dahonoł'į́įgo bee nanihishkaahígíí biniyé nihich'į' naaltsoos íishłaa.

¹⁰T'áá háiida nihich'į' bąąhági át'íinii bá yóó'ahidoh'aahgo, shí ałdó' bá yóó'ahidish'aah; t'áá ha'át'íhída bąąhági át'éii yóó'adíí'ánígíí nihí nihá yá'át'éeh dooleeł biniyé Christ binááł yóó'adíí'ą́.

¹¹Séítan doo łínihidoocháash da biniyé; jó, éí binahagiz nihił béédahózin.

¹²Trówasdi Christ baa hane' yá'át'éehii baa hodeeshnih biniyé níyáago, Bóhólníihii éí shá bohónéedzą́ągo áyiilaa,

¹³nidi shitsilí Táítas ákwii t'áadoo bik'íníyáágóó biniinaa ch'į́į́góó ch'ééh nitséskeesgo shik'isóó t'óó bílák'e dadéshnii' áádóó Masedóniyagóó dah náádiisdzá.

¹⁴Nidi Diyin God bich'į' ahééh hasin, éí t'áá áłahjį' Christ bee ak'eh diidlį́įgo nihoo'ish, áádóó łikání halchinígíigi át'éego Christ bee béého'dílzinii t'áá ałtsogóó nihee náás shoogish.

¹⁵Yisdádaha'níiłii índa dadínóonéełjį' da'íłdįįhígíí bitahgóó Diyin God bich'į' Christ yee łikání halchinii daniidlį́,

¹⁶dadínóonéełjį' da'íłdįįhígíí bich'į' anoonéełjį' aniné halchinii daniidlį́, yisdádaha'níłígíí bich'į' éí iináajį' iiná halchinii daniidlį́. Háishą' kót'éii yíneel'ą́?

¹⁷Háálá lą'í a'ídeeł biniyé Diyin God bizaad yił tádadijeeh, ákondi nihí doo ákódeiit'į́į da; nihí t'áádóo nídí t'áá aaníí ádeiit'į́įgo índa Diyin God dabííł'aadii daniidlį́įgo Diyin God binááł Christ binahjį' dahwiilne'.