Read Navajo II CORINTHIANS 4 Bible Online

II CORINTHIANS 4 - Navajo bible

II CORINTHIANS 4

¹Éí bąągo Diyin God yee a'ááh nízinii nihee hazlį́'ígíí biniit'aa díí bee neiil'a'go doo nihąąh nahwiikaad da.

²Nihí baa yádahasinii índa nanil'ingo ó'oolníiłii yóó'adiit'ą́; nihí doo na'adlo' bee łí'iicháazh da, doo nidi Diyin God bizaad bee nahwiigizgo baa hwiilne' da, nidi Diyin God binááł t'áadoo bahat'aadí t'áá aaníinii baa hwiilne'go diné t'ááłá'í nítínígo yá'át'éehgo nihaa ákodanízin.

³Áko azhą́ hane' yá'át'éehii baa hwiilne'ii doo bééhózin da nidi, éí ádabidi'dooldįįłii bídayéełkaahígíí t'éiyá bich'į' ákót'é.

⁴Éí hoł nahaz'ą́ą́jí díí nihokáá' diyin áhodil'íinii níłch'i bida'iiníziinii binanit'a'í wolyéii doo da'oodlání dabíni' yił ch'aa yishchį́, áko Christ, éí Diyin God yináłt'éii bee bits'ádi'nílíidii baa hane' yá'át'éehii bee adinídíín éí nihokáá' diyin áhodil'íinii doo da'oodlání yik'i diiłdíin dooleełgi yits'ą́ąjį' yélná.

⁵Háálá doo t'áá nihí ádaa hwiilne' da, nidi Christ Jesus éí Bóhólníihii nilį́įgo baa hwiilne', índa nihí éí Jesus bá nihinaal'a'í niidlį́įgo hwiilne'.

⁶Diyin God éí, Chahałheeł biyi'dę́ę́' adinídíin le', dííniidii t'áá éí Christ binii' yik'i diiłdíinii nihił béédahodoozįįł biniyé bee bits'ádi'nílííd bee bééhózinii nihijéí yii' dííłdíín.

⁷Nidi hashtł'ish łeets'aa' nahoniidlingo díí t'áá íiyisí ílíinii nihii' hólǫ́, éí ts'ídá aláahdi át'éego adziil nilíinii Diyin God bits'ą́ą́dę́ę́' át'éego bééhózin doo biniyé, t'áá nihí nihits'ą́ą́dóó éí dooda.

⁸T'áá ałtsojį' nihich'į' nahwii'náa nidi, doo tsístł'ait'aash da; t'óó nihił haada nidi, doo nihił áhádįįh da;

⁹atínihi'dil'į́į nidi, doo nihik'i'nichéeh da, naa'anihínídzílghał nidi, doo nanihidi'tseed da.

¹⁰Jesus bits'ą́ą́dę́ę́' iiná ałdó' t'áadoo bahat'aadí nihits'íís bii' hólǫ́ǫgo yidooltsééł biniyé t'áá áłahjį' aniné bee nahodít'éégóó Jesus bá tádiit'aash.

¹¹Nihits'íís dínóonéłígíí bii' Jesus bits'ą́ą́dę́ę́' iiná t'áadoo bahat'aadí néidooltsééł biniyé t'ah hinii'náago t'áá áłahjį' Jesus bá díníi'néełjį' ninánihi'diit'aah.

¹²Áko nihíjí aniné nihinaalnish, nidi aají nihíjí iiná nihindaalnish.

¹³Ła' oosdląądgo ání, Iisisdląąd, éí bąą haasdzíí', níigo ak'e'ashchínígi át'éego nihí ałdó' Níłch'i Diyinii bee iiniidlą́, éí bąą nihí hahiidziih.

¹⁴Háálá Diyin God éí Bóhólníihii Jesus néidiisáhígíí t'áá éí ałdó' baa hoolzhiizhdi Jesus yee náánihididoołjah, áádóó t'áá ła' bizhi'ee t'áá hó hojílǫ́ǫdi nánihizhdoo'ishgo nihił bééhózin.

¹⁵Éí t'áá ałtsojį' nihá yá'át'ééh biniyé, nihokáá' dine'é bitahgóó Diyin God bibee ajooba' t'áá náás noosééł bik'eh ahééh hwiindzin bilááh yileeł, éí Diyin God baa ha'niih doo biniyé áánííł.

¹⁶Azhą́ ats'íís bee ániit'éii yizhash nidi, doo nihąąh nahakaad da, háálá nihiyi'di bee ániit'éii éí t'áá ákwíí jį́ ániidí ánáálnííł.

¹⁷Háálá díí áłts'íísígo t'óó kónígháníjį' ti'hwii'níhígíí, éí t'áadoo beełt'éhígóó t'áá íiyisí aa ha'niih nihá hasht'eilééh. Áko díí aa ha'niih éí hool'áágóó hólóonii doo niit'éehii át'é.

¹⁸Éí biniinaa nihí daat'íinii doo baa nitsídeiikees da, nidi doo daat'íinii baa nitsídeiikees, háálá daat'íinii éí t'óó kónígháníjį' ádaat'é, nidi doo daat'íinii éí doo bá nidahwiizt'i' da.