Read Navajo II CORINTHIANS 5 Bible Online

II CORINTHIANS 5 - Navajo bible

II CORINTHIANS 5

¹Háálá nihits'íís níbaal nahalingo nihokáa'gi bii' kéédahwiit'ínígíí ábi'disdįįd nidi, kin yílá doo bee ályaii, yá'ąąshdi hool'áágóó nihá hólóonii Diyin God bits'ą́ą́dę́ę́' nihee hólǫ́ǫgo nihił béédahózin.

²K'ad yá'ąąshdi bii' kééhwiit'į́į dooleełii biih jóya' laanaa daniidzingo, bíká ádił nídahodiilchił,

³áko éí biih dahisiikaigo doo ats'íís t'áágééd danihidi'dooltséeł da.

⁴Háálá t'ahdii díí nihits'íís níbaal nahalingo bii' kééhwiit'į́įgo ádił nídahodiilchiłgo ádił háádeiidzoł; éí doo bii' hadahidiikah da daniidzin, nidi yá'ąąshdę́'ígíí biih dahidiikah daniidzin, áko iiná ániidíii biniinaa díí ats'íís dadootsaałii yóó'adooldoh.

⁵Ts'ídá díidíígíí biniyé Diyin God hasht'enihiilaago t'áádóo nídí bee ééhózinii t'áá bí Níłch'i Diyinii nihaidiní'ą́.

⁶Éí bąą nihí t'áá áłahjį' nihił dahózhǫ́ǫgo chánah daniidlį́; nihits'íís nihighan át'éego t'ahdii bii' kéédahwiit'į́įgo Bóhólníihii bits'ą́ądi dahoniidlónígíí nihił béédahózin,

⁷háálá oodlą́ bee dayíníikááh, anáá' bee daat'íinii bik'ehgo éí dooda.

⁸Nihił dahózhǫ́ǫgo chánah daniidlį́įgo, danihits'íís bits'ą́ądi, íiyisí danihighandi Bóhólníihii bił dahoniidlǫ́ǫ dooígíí laanaa daniidzin.

⁹Éí bąą azhą́ kwe'é nihits'íís bii' dahoniidlǫ́ǫ nidi, doodaléi' bits'ą́ądi dahoniidlǫ́ǫ nidi, t'áá áłahjį' Christ bił dahoniilzhǫ́ǫ dooleeł biniyé yéego ádeiit'į́.

¹⁰Háálá t'áá áníiltso Christ bibikáá'dóó ánihwiit'aah bidááhdóó nihidiikah, t'ááłá'í niitínígo t'áá nihits'íís bii' kéédahwiit'į́įgo ádeiit'įįdii bik'ehgo, yá'át'éehii éí doodaléi' doo yá'át'éehii ts'ídá bą́ą́h niidlį́į́ góne' nihaa nídahódóot'įįł.

¹¹Áko Bóhólníihii Christ bik'ee yéé' hwiindzin nihił bééhózinígíí bąą, yéego diné bił hwiilne'go bíni' bá ádahwiilne', nidi nihí ániit'éhígíí Diyin God bił bééhózin, t'ah nít'éé' lá nihí ałdó' nihaa ákodanoohsįįh łeh nisingo shił chohoo'į́.

¹²Nihí doo t'óó nihich'į' ch'í'ínáádiyii'nił da, nidi biniyéii hólǫ́ǫgo nihaa dadzíínóhłíi doo biniyé íit'į́, áko diné bijéí biyi' yá'áhoot'éehgo doo ádaa ha'niihii, nidi ats'íís k'ehgo níl'íinii t'éiyá yee ádaa ha'niihii bee bich'į' t'ą́ą́' háádadoohdzihii nihee dahólǫ́ǫ doo biniyé íit'į́.

¹³Doo nihíni' bíighah da nahoniidlingo éí Diyin God bá ákóniit'éé nít'éé', doodaléi' nihíni' bíighahgo éí nihí aají nihá ákóniit'é.

¹⁴Christ be'ayóó'ó'ó'ni' nanihiiłná, háálá éí t'áá łashdilt'éhígíí t'áá ałtso bá dadziztsą́ągo nihił bééhoozin; ákót'éego t'áá ádzíłtso dazneezná.

¹⁵Áko hó t'áá ałtso bá dadziztsą́, dahinánígíí doo t'áá bí ádá dahináa da doo biniyé, nidi bá dadziztsą́ą́dę́ę́' náázdiidzáhígíí há dahináa doo biniyé bá dadziztsą́.

¹⁶Éí bąą k'ad doo diné k'ehgo aa nitsáhákees bee ła'da baa nitsíikees da; azhą́ lá łah Christ t'óó diné nilį́įgo baa nitsíikees nít'éé' nidi, k'ad éí doo ákót'éego baa nitsíikees da.

¹⁷Éí bąą t'áá háiida Christ yił łá'í nilį́įgo, éí diné ániidíii ábi'diil'įįh; t'áá shiidą́ą'dii bee biyi' áhoot'éé nít'éé' yę́ę bits'ą́ąjį' yóó'iildoh, jó'akon, ániidíii bee biyi' honít'i' yileeh.

¹⁸Diyin God bits'ą́ą́dóó díí t'áá ałtsoní bee ayi' honít'i'ii, t'áá bí Christ binahjį' bił k'é da'ahidii'níigo áyiilaa, índa Diyin God yich'į' k'é nídadínóodzįįł biniyé diné bił dahodiilnihgo nihaidiní'ą́.

¹⁹Diyin God éí Christ yii' hólǫ́ǫgo nihokáá' dine'é yił k'é néist'įįd, diné doo yee ákǫ́ǫ́ ádaadzaii t'áá yik'ijį' yis'ą́ągo éí dooda, áádóó hane' bee k'é hwiindzinii yee niha'oozlíi'go nihaidiní'ą́.

²⁰Éí bąą nihí Christ yá naazíinii daniidlį́įgo Diyin God nihee hazhó'ógo ná'ookąąh. Diyin God bił k'é da'ahidohní danihidii'níigo Christ bá nídanihiikąąh.

²¹Háálá bił łá'í daniidlį́įgo Diyin God ts'ídá t'áá ákogi át'éii bee ts'ídá t'áá ákogi ádaniit'ée doo biniyé Christ, bąąhági át'éii doo át'é nízinii, nihibąąhági át'éii bik'i diit'ą́.