Read Navajo II CORINTHIANS 6 Bible Online

II CORINTHIANS 6 - Navajo bible

II CORINTHIANS 6

¹Áko Diyin God bił neiilnishii Diyin God bibee ajooba' t'áadoo biniyéhígóó t'áadoo nídahidoohłéhí nihidii'níigo nánihiikąąh,

²háálá bí ání, Níídéests'įįłjį' ahoolzhiizhgo baa shił hózhǫ́ǫgo nidiséts'ą́ą́', índa yisdá'iildééh beiníłką́ yę́ędą́ą́' níká aashwod. Shoo, k'ad ts'ídá áajį' ahoolzhiizh; k'adyee' yisdá'iildééh bił hoolzhish.

³Bee neiil'a'ígíí doo bik'íhát'áah da doo biniyé, diné ła'da bidínóołtł'ahii doo bidáahjį' ahii'níił da,

⁴nidi t'áá ałtsojį' Diyin God yá naal'a'í niidlį́įgo ádééhoniilzinii, yéego ha'ííníilníigo ti'danihiyoołnííh, nihich'į' naho'diilná, nihich'į' nahwii'ná,

⁵nánihidi'niltsxis, awáalyaaí niidlį́, nihił háhonicha', yéego neiilnish, doo awosh, índa dichin ídlį́ ádaat'éii bich'į' ha'ííníilní,

⁶áádóó t'áadoo bee nihik'íhót'ahígóó, áádóó ałdó' nihił ééhózinígíí, nízaadgóó ha'ííníilnínígíí, nihá áhwiinít'į́'ígíí, Níłch'i Diyinii, t'áá aaníígóó ayóó'í'ííníi'nínígíí bee yá'át'éehgo ádééhoniilzin,

⁷áádóó ałdó' t'áá aaníígóó saad bee yéiilti'go, índa Diyin God bibee adziilii bee; ts'ídá t'áá ákogi át'éii bideezla' nish'náájí índa nishtł'ají bee yíníitą',

⁸áádóó nihił dajílį́ índa doo nihił dajílį́į da, nihíni' nehe'aah índa yá'át'éehgo éého'dílzin bee yá'át'éehgo ádééhoniilzin. Bina'adlo'ii niidlį́įgo nihaa nitsáhákees nidi, t'áá aaníinii bik'ehgo ániit'é;

⁹diné doo béého'dílzinii niidlį́į nidi, yá'át'éehgo nihéého'dílzin; nabi'diztseedii niidlį́į nidi, t'áá hinii'ná; atélyaii niidlį́į nidi, doo naaztseedii niidlį́;

¹⁰yínííł naagháii niidlį́į nidi, t'áá áłahjį' bił hózhóonii niidlį́; té'é'į́ niidlį́į nidi, lą'í da'at'į́įgo ádeile'ii niidlį́; t'áadoo nihee hólónída nidi, t'áá ałtsoní bee hólóonii niidlį́.

¹¹Kórinth dine'é danohłíinii, nihijéí tł'ááhdę́ę́' įįh nihííníi'níigo t'áá ałtsojį' ííshjání ídí'níilzingo nihich'į' yéiilti'.

¹²Nihijéí bii' nihá hosiil'ą́, nidi nihí aají danihijéí bii' doo nihá nidahosooł'ą́ą da.

¹³Nábidinínáádę́ę́' nihí ałdó' danihijéí bee ayóó'ádanihíínóh'níi le'; ha'áłchíní bich'į' yájíłti'ígi át'éego yáshti'go ádíshní.

¹⁴Doo da'oodlání t'áadoo bił ałch'odanoh'níní. Háálá haa yit'éegoshą' diné t'áá ákogi át'éii índa doo ákogi át'éii ałch'oo'níi doo? Doodaléi' haa yit'éegoshą' adinídíín éí chahałheeł yił ahił nidlį́į doo?

¹⁵Ha'át'íísh bee Christ índa níłch'i bida'iiníziinii binanit'a'í yee aheełt'éego nitsíkees? Doodaléi' oodlání índa doo oodláníshą' ha'át'íí t'ááłá'íígíí ałts'ą́ą́' íłk'iiz doo?

¹⁶Diyin God bikin bii' sohodizin índa eda'alyaiishą' ha'át'íí yee t'ááłá'í nilį́įgo aha'didoot'ááł? Jó, nihí Diyin God hináanii bikin bii' sohodizin daniidlį́, háálá Diyin God t'áá bí ádííniid, Hatah kééhasht'į́į doo, áádóó hataasháa doo, áádóó haDiyin God nishłį́į doo, índa hó shidine'é dajílį́į dooleeł.

¹⁷Éí bąą Bóhólníihii ádííniid, Doo oodláanii bitahdę́ę́' wóshdę́ę́' ch'íhóhkááh, áádóó t'áá sahdii bits'ą́ąjį' ahohkááh, áádóó ha'át'íhída t'óó badaa'ihii t'áadoo baa nídaaht'íní, áko nihich'į' k'é nísdzingo shaa hidoohkah,

¹⁸áádóó nihiTaa' nishłį́į doo, áko nihí t'éiyá shiye'ké índa shitsi'ké danohłį́į doo, ní Bóhólníihii Aláahgo Ayóó'ábóodziilii.