Read Navajo II CORINTHIANS 7 Bible Online

II CORINTHIANS 7 - Navajo bible

II CORINTHIANS 7

¹Ayóó'ánihósh'níinii, díí kót'éego nihaa deet'ą́ągo biniinaa, haa'íshą' nihits'íís índa nihiníłch'i niyiiłchxǫǫhii nahjį' kódadiilnííł, áádóó Diyin God dadíníilzingo diyingo iiná hadaałt'éego ádadiilnííł.

²Nihijéí bii' nihá dahooł'aah, t'áadoo ła'da bąąhági áhwiilyaa da, ła'da doo yiilchǫ' da, ła'da doo łíshiicháazh da.

³Díí doo nihainísht'į́įgo ádíshníi da, háálá t'áá íídą́ą́' ánihidííniid, Łá'í daniidlį́įgo nii'néełgo, doodaii' dahinii'náago nihijéí bii' dahonohłǫ́ǫ doo.

⁴T'áá íiyisí nihaa jííníshłíigo yáshti', t'áá íiyisí nihaa hashniih, áko t'áá hazhó'ó atínihi'dil'į́į nidi t'áá íiyisí shik'i hata' áádóó shił hózhǫ́.

⁵Azhą́ Masedóniyadi niit'áázh yę́ędą́ą́' nidi, nihits'íís t'áadoo hanáályį́į' da, nidi t'áá ałtsodę́ę́' atínihi'dool'įįd, nihinaadę́ę'go saad nihídei'ááh nít'éé', nihí éí t'áá ádíiyi'ídi nihił yéé' nít'éé'.

⁶Diyin God éí bąąh nidahwiizkaadii hayi' iyoołniihii, éí Táítas níyáhígíí yee hanihi'iyoosniid.

⁷Éí níyáhígíí doo t'áá éí t'éiyá bee da, nidi bí aají nihee ha'oosniidígíí bee nihí ałdó' hanihi'iyoosniid, háálá nihídin danohłį́įgo, áádóó daahchago índa shídanoohdlį́įgo yee nihił hoolne', áko éí bąą t'ah aláhídi át'éego shił nááhoojǫǫd.

⁸Háálá azhą́ shinaaltsoos bee yínííł biih nihíínil nidi, k'ad éí doo bik'édí nishłį́į da, t'áá lá aaníí bik'édí sélį́į' nidi, háálá éí naaltsoos yínííł yiih nihíínilgo shił bééhózin, nidi éí t'óó kónígháníjį' ákónihiilaa.

⁹Jó ákohgo, k'ad éí shił hózhǫ́, yínííł biih noodee'ígíí éí doo biniinaa da, nidi yíní biih noodee'ígíí bee łahgo át'éego Diyin God bich'į' tsíńdasidookézígíí bąą shił hózhǫ́, háálá Diyin God bíniik'ehgo yínííł biih noodee', áko nihinahjį' ha'át'íhída doo yóó'adasoołdéel da.

¹⁰Háálá Diyin God k'ehgo yínííł daniidlį́įgo éí łahgo át'éego Diyin God bich'į' tsínánihidiiłkosgo bee yisdá'iildéehii yaa nihii'éésh, áko éí doo bik'édí daniidlį́į da, nidi nihokáá'jí k'ehgo yínííł danilį́įgo éí aniné t'éiyá nánídlį́.

¹¹Jó, díí Diyin God bíniik'ehgo yínííł ídlį́ éí dooládó' yéego haleebee áhát'į́ é'éł'į́į da, dooládó' bídanoohdlį́įgo doo nihidahodiit'i'góó ída'dołnéeh da, dooládó' bąąhági át'éii biniinaa nihił niná'át'įįh da, dooládó' doo nihił dahóózhǫǫd da, dooládó' nihił yéé' áhósin da, dooládó' nihá laanaa danohsin da, dooládó' nihídanoohdlį́į da, dooládó' doo ákǫ́ǫ́ áát'įįdígíí atídoolnííł danoozį́į' da lá! Ákót'éego bee t'áá ałtsojį' doo nihidahodiit'i'góó bééhózingo ída'doołyaa.

¹²Azhą́ lá nihich'į' ak'e'shéłchį́į nidi, éí doo ła'da doo ákǫ́ǫ́ áát'įįdígíí biniyé da, doo nidi ła'da doo ákǫ́ǫ́ áhóót'įįdgo yik'ee ti'hooznii'ígíí biniyé da, nidi Diyin God binááł aadę́ę́' yá'át'éehgo nihídanoohdlínígíí yit'íní ádoolnííł biniyé nihich'į' ak'e'shéłchį́.

¹³Áko éí bee ha'iisiilniid. Áádóó ha'ííníilnínígíí éí Táítas aají nihaa bił hózhónígíí bóóltą'go t'áá íiyisí t'ah aláhídi át'éego nihił nááhóózhǫǫd, háálá t'áá ánółtso t'áadoo bi'diił'áhígóó ádaahłaa.

¹⁴Háálá t'áadoo le'é bee nihaa hashniihgo bich'į' haasdzíi'go, éí yáhásin doo yiih shííłt'e' da, nidi bee nihich'į' hahaadzí'ígíí t'áá ałtso t'áá aaníí danilínígi át'éego, t'áá ákót'éego Táítas hanááł nihaa hwii'niihígíí ałdó' t'áá aaníí daazlį́į́'.

¹⁵Áko k'é bee nihaazhníyá yę́ędą́ą́' nitsidaahkaigo, áádóó ádił nídahodoołchiłgo t'áá ánółtso ak'eh dahonoł'į́į́ nít'ée'ii bééjílniihgo ayóó'ánihijó'níigo t'ah aláhídi át'éego nihaa nitsídzíkees.

¹⁶T'áá ałtsojį' nihaa jííníshłíhígíí t'áá íiyisí bąą shił hózhǫ́.