Read Navajo II CORINTHIANS 9 Bible Online

II CORINTHIANS 9 - Navajo bible

II CORINTHIANS 9

¹Díí k'ad Diyin God bidiyį́į́' bíká aná'álwo'ígíí biniyé nihich'į' ak'e'ashchíhígíí éí doo t'áá íiyisí shił bohónéedzą́ą da,

²háálá t'áá k'adę́ę áká oojé'ígíí shił bééhózin, éí Masedóniya dine'é binááł nihaa hashniihgo kódíshní, T'ááłá'í nááhaídą́ą́' Akéya dine'é nida'doonih yiniyé hasht'e'ádadólzin, nihidishní, áko t'áá íiyisí bídanoohdlį́įgo ádaaht'ínígíí nihik'is t'óó ahayóí dabidiisnáá'.

³Nidi díí bee nihaa hashniihígíí doo t'áadoo biniyéhí da dooleeł biniyé nihik'isóó danilínígíí nihich'į' dadíł'a', áko t'áá ádanoht'é dííniidígi át'éego hasht'e'ádadołnééh;

⁴Masedóniya dine'é ła' bił aadi nishkaigo, nít'éé' doo hasht'e'ádadoołyaagóó t'óó baa yádadíníidzįįł sha'shin áádóó nihí ałdó' t'áá íiyisí baa yádadínóohsįįł, háálá Masedóniya dine'é binááł nihaa hashniihgo nihaa dzííníidlíí nít'éé'.

⁵Éí bąą ałk'isóó danilínígíí nihich'į' shilą́ąjį' wohkah bidideeshniiłgi t'áá ákónéehee dooleełgo baa nitsísíkééz, béeso adahidoohniłgo bee nidahosoo'áanii t'áá áłdįįłt'éego ádadoohłííł biniyé, áko ahees'nilii doo nihílák'ee haa'nilii át'ée da doo, nidi t'áá nihí ádeinohsingo adahisoonilii át'ée doo.

⁶Jó, díí ááhdishní: t'áá háiida áłch'į́į́dígo k'éé'dídléehii áłch'į́į́dígo ná'áyish doo, índa lą'ígo k'éé'dídléehii lą'ígo ná'áyish doo.

⁷T'ááłá'í jinítínígo háni'dii bee hasht'e'nitsízníkéezii bik'ehgo ájooníił doo, t'áá bił t'ą́ą́' astį́įgo, doodaii' bíhodi'nilchéehgo éí dooda, háálá hoł hózhǫ́ǫgo t'áadoo le'é aa jiiníiłii éí Diyin God ayóó'áhó'ní.

⁸Áádóó Diyin God éí ajooba' łą́ągo hólǫ́ǫgo yee nihik'ijidlí áyósin dooleełgo yíneel'ą́, áko t'áá áłahjį' t'áá ałtsoní bee nihee áda'azįįd doo, t'áá éí bik'ehgo naanish yá'át'éehgo nidaat'i'ii lą'ígo bee áká anáhjah doo.

⁹T'áá Diyin God bizaad bee ak'e'ashchínígi át'éego: Bił hadlee'go na'aznii', diné badahojoobá'íii yitaa'aznii'. Bit'áá ákogi é'ét'éii éí hool'áágóó hólǫ́ǫ doo.

¹⁰Diyin God éí k'i'diléii k'eelyéí bee baa áhojilyáanii índa bááh ch'iyáán nilį́įgo bee aa áhojilyáanii bee dajiinohba'ii nihá hózhǫ́ bilááh ájoolíił doo, áádóó bee t'áá ákogi ádanoht'éii bits'ą́ą́dóó aneest'ą' k'ee'ąą yilzhish doo.

¹¹T'áá ałtsojį' ayóó át'éego nihił dahadlee' doo biniyé t'áá ałtsoní nihá bilááh yileeł doo, áko nihinahjį' Diyin God yich'į' ahééh danízin doo,

¹²háálá díí na'al'a'go cho'oot'ínígíí Diyin God bidiyį́į́' yídin danilíinii doo t'óó bee bíká aná'álwo'ii t'éiyá át'ée da, nidi t'áá bilááh ánéelą́ą'go Diyin God bich'į' baa ahééh hwiindzin k'ee'ąą yilzhishgo áyoolííł.

¹³Díí béeso anídahohniłígíí naalkaahgo Christ baa hane' yá'át'éehii bee ádee hadahidohdziihgo bik'eh dahonoł'ínígíí binahjį' Diyin God yaa dahaniih doo, áádóó nihił dahadlee'go Diyin God bidiyį́į́' bá índa náádaała'ígíí t'áá ałtso bá béeso adahohníłígíí ałdó' binahjį' Diyin God yaa dahaniih doo;

¹⁴Diyin God bibee ajooba' t'áá íiyisí nihilááh neel'ą́ągo nihee dahólónígíí bąą, nihídin danilį́ índa nihá sodadilzin.

¹⁵Doo ałtso baa hóne' át'éégóó t'áá jíík'e Diyin God nihainíláii bich'į' baa ahééh hasin!