Read Navajo GALATIANS 1 Bible Online

GALATIANS 1 - Navajo bible

GALATIANS 1

¹Shí Paul yil'aadii nishłį́. Doo diné shííł'aad da, doo nidi diné binahjį' yil'aadii nishłį́į da, nidi Jesus Christ áádóó Diyin God, aTaa' nilíinii, éí Jesus daaztsą́ą́dę́ę́' néidiisáii, t'áá bí binahjį' yil'aadii nishłį́.

²Christ bee ałk'isóó danilíinii bił neiikaígíí éí biłgo oodlání danilíinii Galéíshiyadi áłah nídaadleehii k'é dabidii'ní:

³Diyin God aTaa' áádóó nihiBóhólníihii Jesus Christ bibee ajooba'ii índa bibee ach'į' hózhǫ́ náhásdlį́į'ii yee nihik'ijidlíi doo.

⁴Diyin God nihiTaa' íinízinígíí bik'ehgo díí doo yá'át'ééhgóó hoogáłígíí biyi'dóó Christ yisdánánihizhdiyoo'niłgo bąą nihibąąhági át'éii biniyé nihá dadziztsą́.

⁵Diyin God hool'áágóó ahóyéel'áágóó baa ha'niih le'! T'áá ákót'ée doo.

⁶Ha'át'íí lá hąhí Diyin God éí Christ bibee ajooba' yee nihíká ádííniidii bits'ánáhóhjeehgo náánáła' hane' bikéé' naanánoohdahgo bik'ee t'óó shił ahayóí!

⁷Jó, éí doo hane' yá'át'éehii át'ée da, náánáła' hane' yá'át'éehii t'áá ádin, nidi ła' nihíni' deiłąąhgo áádóó Christ baa hane' yá'át'éehii dadidiilgis danízin.

⁸Azhą́ nihída, doodaléi' yá'ąąshdę́ę́' diyingo naal'a'ída átséédą́ą́' hane' yá'át'éehii bee nihił dahwiilne' yę́ę bits'ą́ą́jí hane' łahgo ánáánát'éii yee nihił náádahalne'go, háni'dii éí biniinaa ádahodi'dooldįįłgo há hada'doodzih!

⁹T'áá ádadii'niid yę́ęgi át'éego k'ad ánáádísh'ní: Hane' yá'át'éehii daołtsood yę́ę bits'ą́ą́jí hane' łahgo ánáánát'éii bee nihił nááhojilne'ii háni'dii éí biniinaa áhodi'dooldįįłgo há ha'doodzih.

¹⁰Da' diné shich'ijí danilį́į dooleeł jinízingo ájíníísh dashíínóhní? Doodayéii! Diyin God shich'ijí nilį́į dooleełgo yee' bíká ásht'į́. Diné bił dahonishǫ́ǫ dooleełígíí ts'ídá doo bíká ásht'į́į da. Jó, t'ahdii t'óó diné bił honishǫ́ biniyé ásht'į́įgo éí doo Christ yá naal'a'í nishłį́į da doo.

¹¹Shik'isóó, t'áá aaníígóó ánihidishní: Hane' yá'át'éehii baa hweeshne'ii éí doo diné bits'ą́ą́dóó hane' át'ée da.

¹²Háálá éí doo diné bits'ą́ą́dóó nídiiláii át'ée da, índa t'áadoo yínashineestą́'í da, nidi Jesus Christ shił ííshjání áyiilaago shee hazlį́į'ii át'é.

¹³Átséédą́ą́' Jew dine'é binahagha' bik'ehgo hinishnáá nít'éé' yę́ę, áádóó t'áá ii' shíłjaa'ígi bee t'áá shizááká Diyin God dayoodlání áłah nádleehii atésh'į́įgo ádeeshdįįł nisin nít'é'ígíí baa dahosidoots'ą́ą́'.

¹⁴Áádóó ałk'idą́ą́' dashizhé'é yę́ę bi'é'él'į' t'áá íiyisí bídin nishłį́įgo shidine'é t'áá bił ahąąh nidaashkai yę́ę biláahgo Jew dine'é binahagha' shił bééhoozin.

¹⁵Nidi t'ah doo shi'dichí yę́ędą́ą́' Diyin God ats'áshiníłtį́, áádóó bibee ajooba' yinahjį' shíká ádííniid. Éí t'áá bí íinízingo

¹⁶doo Jew dine'é danilíinii bitahgóó baa nahodeeshnih biniyé biYe' shił yit'íní áyiilaa. Íídą́ą́' ats'íís áádóó bidił dahólóonii doo ła' bił baa nísíst'įįd da.

¹⁷Shítséedi daal'aadii danilíinii Jerúsalemgóó doo bich'į' niséyáa da, nidi Aréíbiya kéyahgóó níyá, áádóó índa Damáskasgóó t'ą́ą́' nináánísdzá.

¹⁸Áádóó táá' nááhaidóó bik'ijį' índa Jerúsalemdi Peter baa níyá, áko t'áá ákwii ba'ałk'ee sédáago ashdla'áadah shiiską́.

¹⁹Nidi náánáła' daal'aadii éí t'áadoo deiłtsą́ą da, t'áá hazhó'ó Bóhólníihii bitsilí James t'éiyá.

²⁰Diyin God shá bił bééhózingo doo shiyooch'íídgóó nihich'į' ak'e'ashchí!

²¹Áádóó índa Síriya índa Silíshiya kéyah nahós'a'di níyá.

²²Íídą́ą́' Judíyagi Christ dayoodlání áłah nídaadleehii t'ah doo dashiiłtsééhgóó doo shéédahósin da nít'éé';

²³nidi, Łah atínihił'į́įgo Jesus baa hane' doo t'áá aaníi da, níí nít'éé' yę́ę k'ad índa yoodlą́ągo yaa nahalne', ha'níigo shaa dahodiits'a'.

²⁴Áko shinahjį' Diyin God yaa dahaniih.