Read Navajo GALATIANS 2 Bible Online

GALATIANS 2 - Navajo bible

GALATIANS 2

¹Áádóó dį́į́'ts'áadah nááhaidóó bik'ijį' índa Jerúsalem góde Bárnabas bił náánísht'áázh, Táítas ałdó' bił niikai.

²Diyin God shił ííshją́ą́ áyiilaii bik'ehgo ákǫ́ǫ́ níyá. Áko doo Jew dine'é danilíinii bitahgóó hane' yá'át'éehii baa hashne'ii da'oodlání yá naazíinii bee bił dahweeshne'. Nidi doo Jew dine'é danilíinii bił nahosisne'ii doo t'áadoo biniyéhígóó baa niséyáa da áádóó baa nináánáshdáa dooleełii bił t'áá da'áko doo biniyé t'áá bí t'éiyá bił dahweeshne'.

³Táítas, bił naash'aashígíí éí Gríik dine'é nilį́į nidi, bąąh náhidínóolgish doo bi'doo'niid da,

⁴nít'éé' ła' diné ałk'isóó ádahodil'íinii t'áadoo baa ákodaniidzį́'í yah aheeskai lá. Éí Christ Jesus binahjį' nihá honídlee'ígíí hadeidoosił biniyé naalchí'í k'ehgo t'áá nahonit'inee yah aheeskai lá. Éí Jew dine'é bibee haz'áanii biyaa ninádíníidahgo binaalte' nídazhdoodleeł danihó'ní.

⁵Nidi aají t'áá aaníinii hane' yá'át'éehii baa hane'ii t'áá nihá náás yit'ih dooleeł biniyé t'óó kónízahíjį' nidi t'áadoo hak'eh dahosiil'įįd da.

⁶Aląąjį' naazíinii ádajit'į́ dahodi'nínígíí, (doo haash yit'éegoda haa nitséskees da, Diyin God doo ła' a'ohgo yaa nitsékees da, ) aląąjį' naazíinii dahodi'nínígíí t'áadoo ha'át'éhígoda shighą́ą́h dazh'deeshjée' da.

⁷Nidi Peter éí Jew dine'é danilíinii, bąąh nídahineeshgizhii bee dabi'dééji'ii, bich'į' hane' yá'át'éehii bee ha'ahoosdlíi'go hąąh niilyáhígíigi át'éego shí ałdó' doo Jew dine'é danilíinii, doo bąąh nídahineeshgizhii dabi'dééji'ii bich'į' hane' yá'át'éehii bee sha'ahoosdlíi'go shąąh niilyáhígíí hoł béédahoozingo

⁸(jó, Peter éí Diyin God bibee adziilii haidiní'ą́ągo bąąh nídahineeshgizhii bitahgóó nahojilne'go nijil'a' doo biniyé yich'į' hóół'aad, t'áá ákót'éego ałdó' shí, doo Jew dine'é danilíinii bitahgóó nahashne'go naash'a' doo biniyé yich'į' shííł'aad)

⁹áádóó James, Peter índa John, da'oodlání bá aląąjį' naazíinii dahodi'níinii, díí hoł béédahoozingo índa Diyin God naash'a'go áshiilaaígíí baa ákodazniizį́į'go, éí shí índa Bárnabas doo Jew dine'é danilíinii bich'į' diit'ash, áádóó hó t'éí bąąh nídahineeshgizhii bich'į' jidookah biniyé bee ahadadi'niit'ą́ągo ahił daniidlį́įgo bee ahíláłk'e dadeelnii'.

¹⁰T'áá hazhó'ó badahojoobá'íígíí t'éiyá béédajilniihgo baa nitsídadzikees doo danihó'ní, áko ts'ídá éidíígíí t'áá k'adę́ę bi'iishłaa.

¹¹Áádóó nááhodideeshzhiizhí Peter Ántiyakdi jiníyáago, ákwii hach'į' niníyáago áhodííniid, Doo ákǫ́ǫ́ ánít'į́į da. Háálá t'áadoo bahat'aadí t'áá ííłdįįd hak'i hodiit'ą́ągo nijighá.

¹²Háálá diné ła' Jerúsalemdę́ę́' t'ah doo James yits'ą́ą́dóó yíkááh yę́ędą́ą́' da'oodlání doo Jew dine'é danilíinii bił nída'jidį́į́h nít'éé', nidi éí yíkaidóó bik'ijį' doo bił nída'jidį́įh da dzizlį́į'go t'óó bits'ánídzídzá, háálá, Da'oodlání t'áá ałtso Jew dine'é bibee haz'áanii bik'ehgo bąąh nídahidínóolgish, daanínígíí yíkai.

¹³Áko ła' Jew dine'é da'oodlání danilíinii Peter t'áá yik'ehgóó ádaat'į́įgo yaa nídiikai. Bárnabas nidi áájí izhdiilwod.

¹⁴Nidi hane' yá'át'éehii biyi'dóó t'áá aaníinii doo k'éhézdongo bik'eh dajíkááhgóó shił bééhoozingo t'áá ałtso dabinááł Peter áhodííniid, Azhą́ lá ni Jew dine'é nílį́į nidi, Jew dine'é bibee haz'áanii doo bik'eh hinínáágóó, nidi doo Jew dine'é nilíinii hinánígi át'éego hinínáago, ha'át'éegoshą' doo Jew dine'é danilíinii éí Jew dine'é dahinánígi át'éego dahináago ádíílííł?

¹⁵Azhą́ nihí Jew dine'é daniidlį́įgo danihi'dizhchį́į nidi, doo Jew dine'é danilíinii bąąhági ádaaníłígíí doo ákódaniit'ée da,

¹⁶shą́ą́' Jew dine'é bibee haz'áanii bik'eh hól'ínígíí binahjį' doo ła'da t'áá ákogi ájít'éego há ha'doodzih da, nidi Jesus Christ joodlą́ągo baijólíhígíí t'éiyá binahjį' t'áá ákogi ájít'éego há ha'doodzihgo nihił béédahózin. Nihíyee' éí Christ deiniidlánígíí bee ts'ídá t'áá ákogi ádaniit'éego nihá hada'doodzih biniyé Christ Jesus deisiidląąd, nidi bee haz'áanii bik'eh dahoniil'ínígíí bee éí dooda, háálá bee haz'áanii t'óó bik'eh hojíł'į́įgo doo ła'da ts'ídá t'áá ákogi ájít'éego bee há ha'doodzih da.

¹⁷Áko Christ bee ts'ídá t'áá ákogi ádaniit'éego bee nihá ha'doodzihígíí hádeiit'į́įgo nihí ałdó' ádił nida'ayiilzíihgo bee nihéédahoozingo, da' ákoósh Christ ádił ni'iidzííh yiih nihíínil? Ts'ídá dooda lą́ą!

¹⁸Nidi bee haz'áanii bi'íínísingo nihéłchǫ'ígíí hasht'enáshdléehgo baa nídiisdzáago t'áadoo bahat'aadí bee haz'áanii bee ádihodiisht'i' doo.

¹⁹Diyin God bá hinishnáa doo biniyé Jew dine'é bibee haz'áanii bee shá nihoot'ą́ągo dasétsą́ą́ lágo shił bééhoozin.

²⁰Jó, Christ bił tsin ałnáoszid bąąhjį' shił o'oolkaal, áko k'ad hinishnánígíí éí doo t'áá shí hinishnáa da, nidi Christ shii' hinánígíí bee hinishná, áko k'ad hinishnánígíí éí Diyin God biYe' ayóó'áshó'níigo shá daaztsáanii baa jííníshłíhígíí bee hinishná.

²¹Diyin God bibee ajooba' doo nahjį' kóshłéeh da, háálá bee haz'áanii éí Diyin God binááł diné ts'ídá t'áá ákogi ádaat'é ádeiile'go t'áadoo biniyéhígóó Christ daaztsą́ą doo nít'éé'!