Read Navajo GALATIANS 3 Bible Online

GALATIANS 3 - Navajo bible

GALATIANS 3

¹Galéíshiyadi oodlání danohłíinii, ha'át'íí lá yówééh át'éego doo ádahosoołyąąd da lá! Tsin ałnáoszid bąąhjį' Jesus Christ bił o'oolkaalígíí t'áadoo bahat'aadí nihinááł baa hóóne' nidi, háí lá nihíni' nideizgizgo na'nitin t'áá aaníinii doo bik'eh dahonoł'į́į da dasoolį́į́'?

²Haa'íshą' díí t'éiyá bínanihídídéeshkił: Da' Jew dine'é bibee haz'áanii bik'eh dahonoł'ínígíísh binahjį' Níłch'i Diyinii nihee dahazlį́į́', éí doodago hane' yá'át'éehii dadoohts'a'go deinohdlánígíísh binahjį' nihee dahazlį́į́'?

³Ha'át'íí lá yówééh át'éego doo ádahosoołyąąd da! Da' Níłch'i Diyinii bee nínáádanihi'dizhchį́įgo dahisidoonaadgo k'adísh éí bee haz'áanii bik'eh hól'į́ bee hadaałt'é ída'dołnééh lá?

⁴Łą́ą́góósh t'áadoo biniyéhígóó ti'dahwiisoonii'? T'áá aaníí t'áadoo biniyéhígóogo ákót'é!

⁵Éí bąą Diyin God éí Níłch'i Diyinii nihii' hólǫ́ǫgo ánihósinii, áádóó nihitahgóó álílee k'ehgo ádahooníiłii yaa naagháii éí bee haz'áanii bik'eh dahonoł'íinii daats'í yinahjį' át'į́? Éí doodago hane' yá'át'éehii dadoohts'a'go deinohdlánígíí daats'í yinahjį' át'į́?

⁶Éíbraham éí Diyin God joosdląąd, áko t'áá ákogi át'éii jílį́įgo há haadzíí'.

⁷Éí bąą díí baa ákodanoosįįh: diné éí Diyin God yaa dadzólíhígíí t'áá ałtso Éíbraham ba'áłchíní danilį́.

⁸Náás hoolzhishgóó doo Jew dine'é danilíinii bi'oodlą' bee ts'ídá t'áá ákogi át'éego Diyin God bá hadoodzihgo t'áá átséedi Diyin God bizaad bee ak'e'ashchíinii bee bééhoozin. Jó, t'áá átséedi Diyin God bizaad bee ak'e'ashchíinii biyi'dóó hane' yá'át'éehii bee Éíbraham yił hoolne'go kóní, Ał'ąą dine'é t'áá ałtso ninahjį' bik'ihozhdoodliił.

⁹Áko Éíbraham éí Diyin God yoosdląądgo bik'ihojidlíhígi át'éego Diyin God dayoodlánígíí t'áá ałtso bik'idahojidlí.

¹⁰Nidi bee haz'áanii Mózes baa deet'áanii bik'eh dahoniil'į́įgo t'éí bee yisdádahidiikah dajinínígíí éí atídahodi'doolníiłgo há ha'oodzíí'. Háálá Diyin God bizaad bee ak'e'ashchíinii kóní, Bee haz'áanii biyi' bee ak'e'ashchíinii t'áá ałtso doo bik'eh ádajít'éii áádóó doo bik'eh ádajooníiłii atídahodi'doolníiłgo há ha'oodzíí'.

¹¹Áko t'áadoo bahat'aadí bee haz'áanii yik'eh hół'íinii binahjį' diné doo ła'da ts'ídá t'áá ákogi át'éego Diyin God bá hadoodzih da, háálá Diyin God bizaad bee ak'e'ashchíinii ání, Ts'ídá t'áá ákogi ájít'éii hwe'oodlą' bee a'ódlí bee jiináa doo.

¹²Nidi bee haz'áanii éí oodlą́ doo yił ółta' da, háálá kóní, Bee haz'áanii bi'jił'íinii t'áá éí bee jiináa doo.

¹³Bee haz'áanii bee hóyée'jį' nihá ha'oodzíí' yę́ę bits'ą́ąjį' Christ náánihiisnii'go éí nihá ha'oodzíi'ii Christ bik'ijį' silį́į́', háálá Diyin God bizaad bee ak'e'ashchíinii ání, T'ááłá'í jinítínígo tsin bąąhjį' nijiyííłtínígíí hóyée'jį' há hada'iisdzíí'.

¹⁴Éí Jesus Christ át'į́, éí binahjį' Éíbraham bee bik'ihodzisdli'ii doo Jew dine'é danilíinii bee dahodooleeł, áko Jesus Christ deiniidlą́ągo baa dadzííníidlíhígíí bee Diyin God yee nihá nihoní'áanii Níłch'i Diyinii nihiih dahwiileeh.

¹⁵Shik'isóó, diné ájooníłígíí binahjį' nihił ííshją́ą́ áháshłééh: diné ła'da ha'át'íhída nidizhní'ą́ągo bee lą́ azlį́į́'dóó bik'ijį' diné náánáła' doo hats'ą́ą́' k'éé'iidoołchxǫǫł da, doo nidi saad ła' há yínéidoo'áał da.

¹⁶Jó, Diyin God yee nihwiiz'áanii éí Éíbraham índa bits'ą́ą́dóó yizhchíinii yá haadzíí'. Áko, Nits'ą́ą́dóó dayíchíihii lą'ígo, doo níi da, nidi, Nits'ą́ą́dóó yizhchíinii, níigo t'ááłá'í yeinít'ínígíí éí Christ ááhyiłní.

¹⁷Díí ááhdishní: bidziilgo Christ bee aha'deet'áanii Diyin God t'áá íídą́ą́' yee lą́ asłį́į'ii, dį́įdi neeznádiindóó ba'aan tádiin nááhaidóó bik'ijį' bee haz'áanii Mózes yeidiní'áanii doo łahgo ánéidoodlíił da, áko éí yee nihwiiz'áanii doo t'áadoo nídoodleełí da.

¹⁸Háálá Éíbraham bíí' dooleełii éí bee haz'áanii bik'eh hól'ínígíí binahjį' hwee nidahwiileehgo, Diyin God éí Éíbraham yá yee nihoní'áanii doo binahjį' da doo nít'éé'. Nidi yá yee nihoní'áanii binahjį' baa deet'ą́.

¹⁹Ákoshą' ha'át'íí biniyé Jew dine'é bee haz'áanii bá ályaa? Ádił nida'iilzíihii ádaa ákodadínóodzįįł biniyé doochíiłii aa deet'ánígíí yizhchį́įjį' há ályaa. Áko díí bee haz'áanii Diyin God éí diyingo nidaal'a'í binahjį' Jew dine'é yá sizíinii baa deet'ą́.

²⁰Nizhdilt'éego t'éiyá hata' sizínígíí hólǫ́ǫ doo. Jó nidi Diyin God éí t'ááłá'í.

²¹Áko daats'í bee haz'áanii éí Diyin God yee nihoní'áanii yik'ijį' naalnish? Ts'ídá dooda lą́ą! Háálá bee haz'áanii hinááh áda'ale' dooleełígíí nihaa yílyáago, ts'ídá t'áá ákogi é'ét'éego ó'oolíił doo nít'éé'.

²²Nidi Diyin God bizaad bee ak'e'ashchíinii áníigo t'áá ádzíłtso bąąhági át'éii biyaa nazhnideeh, éí bąą Jesus Christ dajoodląąhgo t'éiyá Diyin God yee nihoní'áanii hwee dahodooleeł.

²³Nidi Christ deidiidląąłígíí t'ah doo yichííhdą́ą́' bee haz'áanii nihee ádíhólnííh nít'éé'. Nihida'oodlą' bee yisdánihidi'doo'niłígíí yit'íní áyiilaajį' nihee ádíhólnííh nít'éé'.

²⁴Nihe'oodlą' bee ts'ídá t'áá ákogi ádaniit'éego Diyin God nihá hadoodzih biniyé Christ níyáago bee haz'áanii biyaa háánihoo'niljį' biyaa sii'nil nít'éé'.

²⁵Nidi k'ad Christ deiniidlą́ągo bee haz'áanii doo nihee ádíhólníih da.

²⁶Háálá Christ Jesus deinohdlánígíí bee t'áá ánółtso Diyin God ba'áłchíní danohłį́.

²⁷Háálá nohłą'í Christ bił łá'í soolį́į'go tó bee danihi'doolzį́'ígíí Christ bee hadadoohdzaago t'áá binoołt'é dasoolį́į́'.

²⁸Éí bąą Jew dine'é índa Gríik dine'é nohłíinii doo ał'ąą ádanoht'ée da; naalte' índa doo naalte' nohłíinii doo ał'ąą ádanoht'ée da; biką'ii índa bi'áadii nohłíinii doo ał'ąą ádanoht'ée da, háálá t'áá ánółtso Christ Jesus bee łá'í nohłį́.

²⁹Áko Christ bíí' danohłį́įgo Éíbraham ba'áłchíní danohłį́, áko Éíbraham baa deet'áanii danihí.