Read Navajo GALATIANS 4 Bible Online

GALATIANS 4 - Navajo bible

GALATIANS 4

¹Díí ááhdishní: hashchíinii bee hólóonii hóó' dooleełígíí t'ah doo baazniséégóó naalte' nilíinii doo t'ah biláhígo ájít'ée da, azhą́ hashchíinii bee hólóonii t'áá át'é hóó' nidi.

²Aa ádahalyáanii índa naalye'é yaa ádahalyáanii hwee ádídahólnííh, hazhé'é bee hólóonii ła'a jį́ ałtso hwíí' dooleełgo yee nihoní'áanii baa nizhnísą́ąjį'.

³T'áá ákót'éego nihí ałdó' áłchínígi ádaniit'éego Diyin God yee nihoní'áanii t'ah doo bik'ida'diitįįh yę́ędą́ą́' nahadlá áłtsé bee nidanihidi'neestą́ą'ii binaalte' daniidlį́į́ nít'éé'.

⁴Nidi ts'ídá baa hoolzhiizhgo Diyin God biYe' yiníł'a', éí asdzání bishchį́, áádóó yizhchį́įgo bee haz'áanii yik'eh hół'į́įgo hináá nít'éé'.

⁵Bee haz'áanii dah dabiistł'óonii nááhizhdoołnih biniyé, áádóó nihí éí Diyin God t'áá bí ba'áłchíní daniidlį́į doo biniyé bi'dizhchį́.

⁶Áádóó ba'áłchíní danohłínígíí bąą Diyin God éí haYe' biNíłch'i Diyinii nihijéí yiih yiyííł'a'go, Ába, aTaa', níigo ná'ookąąh.

⁷Éí bąą k'ad doo naalte' nílį́į da, nidi Diyin God ba'áłchíní nílį́. Áko ba'áłchíní nílį́įgo Christ binahjį' Diyin God yee ak'ijidlíii níí' nilį́.

⁸T'ah nagháí yę́ędi Diyin God doo béédahonohsin da yę́ędą́ą́', ha'át'íhída doo diyin danilíinii bich'į' nidahohłáá nít'é'ígíí éí binaalte' danohłį́į́ nít'éé'.

⁹Nidi k'ad Diyin God béédahosoosįįd, doodaii' Diyin God bídę́ę'go agháago nihééhoosįįdgo, ha'át'éego lá nahadlá átsé bee nidanihidi'neestą́ą'ii éí doo bee adziil da nidi, áádóó t'áadoo nánídlíní da nidi bich'į' t'ą́ą́' dah nídaahkah lá? Éí binaalte' nídadiidleeł daats'í danohsin?

¹⁰Jó yoołkáłígíí, áádóó nídahidizíidii, áádóó dahwéelzhíishiida índa nináháháahiida nihił dadiyingo ádeínóhsin lá!

¹¹T'áadoo yee' ałdó' biniyéhígóó nihinshishnish yíshłí nisingo bąąh shíni'.

¹²Shik'isóó danohłíinii, ánísht'éhígi ádanoht'ée dooleełígíí baa nánihooshkąąh, háálá shí ałdó' ádanoht'éhígi ánísht'é. Doo shich'į' bąąhági ádaahdzaa da.

¹³Shąąh dah haz'ánígíí biniinaa áłtséedi hane' yá'át'éehii bee nihił hweeshne'ígíí nihił béédahózin.

¹⁴Azhą́ shąąh dah haz'ánígíí bee nanihíhodi'nitaah, nidi t'áadoo doo dashisoo'įįd da, t'áadoo doo dashinoozį́į' da, nidi t'áá Christ Jesus danoozį́į́' yę́ęgi át'éego Diyin God bidiyingo naal'a'í nishłį́ nahalingo dashinoozį́į́'.

¹⁵Íídą́ą́' nihił dahóózhǫǫdígíishą' háájí silį́į́'? Háálá íídą́ą́' nihá shił bééhózingo nihaa hashne', bohónéedzą́ą́ ládą́ą́' nihináá' nidi hadadoohniłgo shaa dadoohnił nít'éé'!

¹⁶Da' ákoósh t'áá aaníinii bee nihił hashne'ígíí biniinaa nihi'ana'í sélį́į́'?

¹⁷Diné ayóogo nihídaneedlínígíí doo nihá yá'át'éehii biniyé t'óó ádahodil'į́įgo nihídaneedlį́. T'áá sahdii shits'ąą nidanihiinilgo nihígo agháago danihidzíists'ą́ą' doo danihó'ní.

¹⁸Jó, nihá yá'át'éehii biniyé áłahjį' ayóogo nihídaneedlínígíí yá'át'ééh, aadi naasháago, doo aadi naasháa da nidi.

¹⁹Sha'áłchíní yázhí, Christ át'éhígi ádanoht'ée dooleełjį' amá awéé' bídii'na'ígi át'éego nihá ti'hooshníihgo hoolzhish.

²⁰K'ad aadi nihił honishłǫ́ǫ laanaa nisin, áko łahgo át'éego nihich'į' hahasdziih doo nít'éé', háálá shí nihá nitseeshdá!

²¹Jew dine'é bibee haz'áanii nihee ádíhólnííh danohsinii, bee haz'áanii ánínígíí dasidoots'ą́ą́'.

²²Éíbraham biye'ké naaki nít'éé', biye' ła' éí asdzání naalte' nilínígíí bishchį́, biye' ła'ígíí éí asdzání doo naalte' nilíinii bishchį́, níigo bee ak'e'ashchį́.

²³Asdzání naalte' nilínígíí biyáázh éí t'áá ats'íís k'ehgo jishchį́, nidi asdzání doo naalte' nilínígíí éí biyáázh Diyin God éí Éíbraham yee yá nihoní'áanii bik'ehgo jishchį́.

²⁴Áko díí hane' ch'íní'ánígíí bee ak'idi'dootį́įłii át'é. Jó, díí asdzání naakiígíí éí bee aha'deet'áanii naakiígíí yaa halne'. Ła' éí Héígar, Dził Sáínaidę́ę́' bee aha'deet'áanii yaa halne', éí naalte' danilį́į doo biniyé áhoolchííł.

²⁵Díí asdzání Héígar wolyéhígíí, éí Aréíbiyadi Dził Sáínai si'ánígíí yaa halne'; t'áá éí asdzání k'ad Jerúsalemgi haz'ánígíí yaa halne'. Éí ba'áłchíní t'áá yił naalte' danilį́.

²⁶Nidi Jerúsalem wódahdi hólónígíí éí doo naalte' nilį́į da, éí nihimá nilį́.

²⁷Háálá Diyin God bizaad bee ak'e'ashchíinii ání: Asdzání, na'áłchíní t'áadoo hazlį́į'ii, nił hózhǫ́ǫ le', doo i'niiltsąąhii awéé' doo bídii'néehii, nił hózhǫ́ǫgo dílwosh, háálá asdzání doo ałchíi daígíí asdzání bahastiin yee ba'áłchíní hólóonii biláahgo ha'áłchíní hodooleeł.

²⁸K'ad lą́ą, shik'isóó, Diyin God aidiní'ánígíí binahjį' Áízak éí Éíbraham biye' nilínígi át'éego nihí ałdó' Diyin God aidiní'ánígíí binahjį' t'áá bí ba'áłchíní daniidlį́.

²⁹Íídą́ą́' t'áá ats'íís k'ehgo yizhchíinii éí Níłch'i Diyinii k'ehgo yizhchíinii atíyiilaa yę́ęgi át'éego k'ad ałdó' t'áá ákót'é.

³⁰Nidi Diyin God bizaad bee ak'e'ashchíiniishą' ha'át'íí ní? Asdzání naalte' nilíinii biyáázh t'áá bił ch'íninołchééh, háálá asdzání naalte' nilíinii biyáázh éí asdzání doo naalte' nilíinii biyáázh bíí' dooleełii doo bił ałts'ą́ą́' ajíłk'iiz da doo, ní.

³¹Éí bąą, shik'isóó, asdzání naalte' nilíinii doo ba'áłchíní daniidlį́į da, nidi asdzání doo naalte' nilíinii ba'áłchíní daniidlį́.