Read Navajo EPHESIANS 5 Bible Online

EPHESIANS 5 - Navajo bible

EPHESIANS 5

¹Diyin God ba'áłchíní ayóó'áyó'nínígíí danohłį́įgo bida'oł'į́.

²T'áá Christ ayóó'ánihó'nínígi át'éego ayóó'ó'ó'ní bee dayínóhkááh. Jó, Christ nihá niná'ádeet'ą́ągo łikání halchingo nááhániihii nilį́įgo Diyin God yich'į' náá'ádiisnii'.

³Nidi na'ageh bee tsi'na'adá índa badaa'ihii t'áá ałtso áádóó adáhonooní t'óó bee ha'doodzih nidi t'áadoo baa yádaałti'í, háálá éí Diyin God bidiyį́į́' danohłį́įgo doo niheełt'ée da.

⁴Baa yádahasinii, áhodiigisgo yáti' índa t'áá ádzaagóó niyá'áhoditi' nidi dooda, éí ałdó' doo niheełt'ée da, nidi Diyin God bich'į' ahééh danohsingo yádaałti'.

⁵Díí ts'ídá baa ákodanohsin, diné na'ageh yee tsi'naagháii, doodaii' baa'ihgo hináanii, doodaii' diné adánoolníinii, éí e'elyaii yich'į' nahałáii danilíinii éí Christ índa Diyin God bee bóhólníihgo bił haz'áanii łá'í nidi łahdóó doo hó da.

⁶T'ááká diné ła'da saad t'áadoo dabiniyéhíii yee nihida'dóleeh yíila', háálá ákódaat'éhígíí biniyé Diyin God t'óó báhádzidgo bibee até'él'íinii éí diné doo ak'eh dahół'íinii bik'i dahwiileeh.

⁷Éí bąą éí t'áadoo bił naałdeehí.

⁸Háálá łah nihił daatł'éé' nít'éé', nidi k'ad Bóhólníihii bee nihił ch'ída'deezdláád, áko adinídíín ba'áłchíní danohłį́įgo dayínóhkááh.

⁹Háálá yá'ádaat'éehii áádóó t'áá ákogi ádaat'éii índa t'áá aaníí ádaat'éii t'áá ałtso éí Níłch'i Diyinii bineest'ą' ádaat'é.

¹⁰Bóhólníihii yaa bił hózhǫ́ǫ dooleełii nabídanohtaahgo bídahooł'aah.

¹¹Áádóó chahałheeł biyi' baa da'íldéehii t'áadoo náoodle'í ádaat'éii t'áadoo bee atah danohłíní, nidi doo nihił adaaníígóó yit'íní ádaahłe'.

¹²Nahonit'ingo yaa nidaakaígíí bee ha'doodzih nidi t'óó baa yáhásin.

¹³T'áá ałtsoní bida'diidlaadii éí yit'į́ neheleeh, háálá t'áá ałtsoní yit'į́ neheleehígíí éí adinídíín neheleeh.

¹⁴Díí bąą kót'éego ha'oodzíí', Ałhoshí nílíinii, ch'éénídzííd, dasínítsą́ą́dę́ę́' nídiidááh! Áko Christ nik'i' diiłdíin doo.

¹⁵Éí bąą ádaa ádahołyą́ągo hazhó'ó dayínóhkááh, diné doo dahóyáaniigi át'éego éí dooda, nidi dahonohsą́ągo dayínóhkááh.

¹⁶Nihá ashja'ósinígíí ts'ídá hazhó'ó chodaoł'į́, háálá doo yá'át'ééhgóó adeesdee'.

¹⁷Éí bąą t'áadoo yíní ádahodołdiní, nidi Bóhólníihii íinízinii át'éegi bik'idadi'yohtįįh.

¹⁸T'áadoo wáin áde daahdlání, háálá éí t'óó ádeena'a'né át'é, nidi Níłch'i Diyinii nihii' hadadeezbin le'.

¹⁹Áádóó ałch'į' yádaałti'go Diyin God bizaad biyi'dóó sin, áádóó sin bee Diyin God baa ha'niihii, índa Níłch'i Diyinii bits'ą́ą́dę́ę́' sin nihijéí t'áá át'é bee Bóhólníihii baa dahohniihgo bich'į' dahohtaał.

²⁰T'áá áłahjį' nihiBóhólníihii Jesus Christ bízhi' bee Diyin God aTaa' bich'į' t'áá ałtsoní baa ahééh danohsin.

²¹Diyin God dadíínóhsingo ahídahwíínółnííh.

²²E'asdzą́ą́ danohłíinii, Bóhólníihii bídahwíínółníhígi át'éego nihahastiin bídahwíínółnííh.

²³Háálá ahastiin éí hwe'asdzą́ą́ bá atsii' jílį́, t'áá Christ éí oodlání danilíinii t'áá ła' bizhi'ee yá atsii' nilínígi át'éego, jó, éí hats'íís át'éego t'áá hó yisdájiinííł.

²⁴Oodlání danilíinii Christ yídahółníhígi át'éego e'asdzą́ą́ ałdó' t'áá ałtsojį' hahastiin bóhojółníih doo.

²⁵Ahastiin danohłíinii, t'áá Christ éí oodlání danilíinii t'áá ła' bizhi'ee ayóó'áyó'níigo yá niná'ádeet'ánígi át'éego nihe'asdzą́ą́ ayóó'ádeínóh'ní.

²⁶Oodlání danilíinii t'áá ła' bizhi'ee hazaad bee jidoosį́į́ł biniyé tó bee táádzízgizgo baa'ihii bąąh nijííł'éél.

²⁷Áádóó baa'ihii bąąh ádingo ayóó ánóolningo, áádóó ts'ídá nizhónígo, índa diyingo t'áá íiyisí hadaałt'éego t'áá hó ádááhdę́ę́' nizhdoo'nił biniyé bá niná'ázhdeet'ą́.

²⁸Ahastiin t'áá bí bits'íís ayóó'ádayó'nínígi át'éego be'asdzą́ą́ ayóó'ádayó'níi doo. Be'asdzą́ą́ ayóó'áyó'nínígíí t'áá bí ałdó' ayóó'í'dó'ní.

²⁹Jó, diné doo ła'da t'áá hó hats'íís jijoołáa da, nidi hats'íís bi'jiisą́ índa baa áhojilyą́. T'áá éigi át'éego Christ éí oodlání danilíinii t'áá ła' bizhi'ee yaa áhályą́,

³⁰háálá nihí Christ bits'íís daniidlį́ [bitsį' áádóó bits'in daniidlį́].

³¹Díí bąą diné jílíinii hazhé'é índa hamá bits'ą́ą́' dashdidoogáałgo hwe'asdzą́ą́ bił ahaazhdoot'ashgo bił ahił jii'náa doo, áko nizhdilt'é nít'é'ígíí ats'íís t'ááłá'í jidooleeł.

³²Díidí saad t'áá aaníinii, na'nitin doo bééhózin da yę́ę át'é, éí Christ índa oodlání danilíinii t'áá ła' bizhi'ee bił haz'ą́ągi ááhdishní.

³³Ákondi t'ááłá'í noozínígo ahastiin danohłíinii, ayóó'ádadíí'nóh'nínígi át'éego nihe'asdzą́ą́ ayóó'ádeínóh'ní, áádóó e'asdzą́ą́ jílíinii hahastiin hoł nilį́į doo.