Read Navajo EPHESIANS 6 Bible Online

EPHESIANS 6 - Navajo bible

EPHESIANS 6

¹Áłchíní danohłíinii, Bóhólníihii binahjį' danihishchíinii bik'eh dahonoł'į́, háálá éí ts'ídá t'áá ákogi é'él'íinii át'é.

²Nizhé'é índa nimá nił nilį́įgo íínísin; díí bee haz'áanii alą́ąjį' bee nihoot'áanii bił niilyáii át'é,

³áko nił yá'áhoot'éeh doo, índa nízaadgóó ni' bikáa'gi hinínáa doo.

⁴Azhé'é danohłíinii, t'áadoo niha'áłchíní bánídahołchįįhí, nidi t'áá hashkée nidanohtin, índa hazhó'ó nidanohtin, éí Bóhólníihii bina'nitinígíí bee niha'áłchíní danohsé.

⁵Naalte' danohłíinii, nihokáa'gi nihinanit'a'í nihił danilį́į le'; yéé' nihitah dahodíłtłidgo Christ bik'eh dahonoł'ínígi át'éego nihijéí t'áá át'é bee nihinanit'a'í bik'eh dahonoł'į́.

⁶Nihinanit'a'í binááł t'óó diné bił hólzhǫ́ t'éí biniyé ádaaht'į́įgo éí dooda, nidi Christ yá naalte' danohłį́įgo nihijéí tł'ááhdę́ę́' Diyin God íinízinii bida'oł'į́.

⁷Bóhólníihii bá nidaał'a'ígi át'éego bídanohdlį́įgo nihinanit'a'í bá nidaałnish, diné bá na'anishígi át'éego éí dooda.

⁸Háálá nihił béédahózin, t'áá háiida naalte' jílį́įgo, doodaii' doo naalte' jílį́į da nidi, yá'át'éehgo ájooníłígíí t'áá éí bik'ehgo Bóhólníihii hach'į' ninádi'yoodlééł.

⁹Naat'áanii danohłíinii, nihinaalte' bich'į' haasdzí'ígi át'éego nihí ałdó' t'áá ákódaaht'į́; nihíkáiish'ááł t'áadoo dabidohníní. Nihił béédahózingo, biBóhólníihii, t'áá éí ałdó' nihiBóhólníihii, éí yá'ąąshdi hólǫ́, áádóó diné doo ła' ał'ohgo yaa nitsíkees da.

¹⁰Shik'isóó danohłíinii, díí bee hanáánásdziihgo bee ninisht'ééh, Bóhólníihii bee áádóó yee ayóó ábóodziilii bee danihidziil le'.

¹¹Béésh éé' bee na'abaahii Diyin God nihaidiní'ánígíí t'áá át'é bee hadadohne', áko níłch'i bida'iiníziinii binanit'a'í binahagiz bik'ijį' bídanooł'ą́ągo nidasoozį́į doo.

¹²Háálá bitsį' áádóó bidił dahólóonii doo bił da'ahiigą́ą da, nidi doo daat'į́į́góó aláahdi bídahólníihii, áádóó dabidziilii, áádóó díí k'ad nahasdzáán bikáa'gi chahałheeł bee bídahólníihii, índa níłch'i bida'iiníziinii t'áadoo bee néelą́'ígóó yádiłhił biyi' nahaz'ą́ądi dahólóonii bił da'ahiigą́.

¹³Ákót'é bąą béésh éé' bee na'abaahii Diyin God nihaidiní'ánígíí t'áá át'é bee hadadohne'go tsi'ooldahgo bił yoołkáłígíí bich'į' nidaałdzilgo bídanooł'ą́ą doo, índa ałtso bik'eh dasidoohdlį́į́'dóó bik'ijį' nidi wołí bee nidasoozį́į doo.

¹⁴Éí bąą t'áá aaníinii bee áká dasoołzaazgo, áádóó ts'ídá t'áá ákogi é'ét'é béésh éé' nihijéíts'iin bąąh nidasooł'ą́ągo nidasoozį́,

¹⁵áádóó hane' yá'át'éehii bee k'é hwiindzinii baa ch'ídahoyoh'aah doo biniyé bee hasht'e'ádadíínółzingo bee kééh dadíínół'eez.

¹⁶Nihe'oodlą' nihinaage' ádeínóhsingo bine' nidaohdzi', áko naayéé' níłch'i bida'iiníziinii binanit'a'í bideezla' diltłi'ii t'áá ałtso bits'ą́ą́' dadínóołtsis.

¹⁷Áádóó béésh ch'ah bee yisdá'iildéehii índa Níłch'i Diyinii bidiltłish nídahidoohnííł, jó, Diyin God bizaad éí diltłish át'é.

¹⁸T'áá áłahjį' Níłch'i Diyinii bee sodadołzin índa nída'oohkąąh. Díí biniyé t'áadoo ádahodoołzéhí hada'ísídół'į́į́', wołí bee Diyin God bidiyį́į́' t'áá ałtso sodizin bee bá nída'oohkąąh.

¹⁹Shí ałdó' shá sodadołzin, áko hane' yá'át'éehii doo bééhózin da yę́ę saad bohónéedzáanii shaa deet'ą́ągo t'áadoo shizéé' nahonitł'aaí doo sisti'góó bee yáshti' doo.

²⁰Háálá éí biniyé yil'aadii béésh da'ahólzha'í bee dahaastł'óonii nishłį́, áko doo sisti'góó hane' yá'át'éehii t'áá baa hashne' dooleełígi át'éego baa hashne' doogo shá sodadołzin.

²¹K'ad ánísht'éii áádóó baa naasháhígíí nihił béédahodoozįįł biniyé Tíkakas, nihik'is ayóó'óó'níinii índa ba'ahódlíigo Bóhólníihii yá naal'a'ígíí t'áá ałtso yee nihił hodoolnih.

²²Ts'ídá díí biniyé nihich'į' ahóół'a', éí kodi nihił áhoot'éii nihił béédahodoozįįł, áádóó aají nihijéí bił nídahozhdooshǫǫł ałdó' biniyé akǫ́ǫ́ ahóół'a'.

²³Diyin God aTaa' áádóó Bóhólníihii Jesus Christ bibee ach'į' hózhǫ́ náhásdlį́į'ii áádóó bibee ayóó'ó'ó'níinii oodlą́ bóóltą'go ałk'isóó danilíinii yee bik'ijidlíi doo.

²⁴Ayóó'ó'ó'ní t'áá yit'éhí yit'éii bee nihiBóhólníihii Jesus Christ ayóó'ádayó'nínígíí t'áá ałtso Diyin God bibee ajooba' yee yik'ijidlíi doo.