Read Navajo PHILIPPIANS 1 Bible Online

PHILIPPIANS 1 - Navajo bible

PHILIPPIANS 1

¹Paul áádóó Timothy, Jesus Christ yá naal'a'í niidlíinii, Christ Jesus dayoodlą́ągo Diyin God bidiyį́į́' danilíinii Fílipaigi kéédahat'íinii t'áá ałtso, da'oodlání yá naazíinii índa da'oodlání yaa ádahalyáanii t'áá óóltą'go bich'į' naaltsoos íilnééh:

²Diyin God nihiTaa' áádóó Bóhólníihii Jesus Christ bibee ajooba' índa bibee ach'į' hózhǫ́ náhásdlį́į'ii yee nihik'ijidlíi doo.

³T'áá nihénínáshnih bik'eh shiDiyin God bich'į' ahééh nisin.

⁴T'áá áłahjį' t'áá nihá sodiszin bik'eh shił hózhǫ́ǫgo t'áá ánółtso nihá ná'ooshkąąh.

⁵Ts'ídá áłtséedi hane' yá'át'éehii deisoohdląąd yę́ędóó díí jį́į́góó bee ahił daniidlínígíí baa ahééh nisin.

⁶Díí t'áá íiyisí shił bééhózin: Diyin God naanish yá'át'éehii nihiyi' yaa nídiidzáhígíí éí náásgóó nihinaalnishgo Jesus Christ nádzá bijį́įjį' ałtso ła'yidoolííł.

⁷T'áá ánółtso shijéí bee ayóó'ánihíínísh'níigo bąą kót'éego nihaa nitséskees dooígíí shá bohónéedzą́, háálá awáalyaaí nishłį́įgo, doodaii' doo awáalyaaí nishłį́į da nidi, hane' yá'át'éehii bich'ą́ą́h yáshti'go índa bohoníłdzilgo áshłéhígíí shá ashja'ósingo, Diyin God yee shaa joozba'ígíí t'áá ánółtso shił ałts'ą́ą́' da'nołk'iiz.

⁸Jesus Christ bibee ayóó'ó'ó'níinii bee t'áá ánółtso ayóó át'éego nihídin nishłį́įgo Diyin God shá bił bééhózin.

⁹Díí bíká sodiszin: ił ééhózin índa ts'ídá át'éegi ak'i'diitįįh, éí nihe'ayóó'ó'ó'ni' t'áá bił lą'ígo nihee dahólǫ́ǫ doo.

¹⁰Áko yá'ádaat'éehii nihił béédahózingo bee lą́ nida'ayohłeeh doo. Índa Christ nádzá beiníłką́ąjį' yá'át'éehgo nitsídaahkeesgo t'áadoo bee nihik'ídahót'ahí da doo.

¹¹Áádóó Jesus Christ bee ts'ídá t'áá ákogi é'ét'é bineest'ą' nihee nídahoodleeł doo biniyé nihá bíká sodiszin, áko éí bee Diyin God ayóó ájít'éhígíí bééhodoozįįł, índa bee haa ha'niih doo.

¹²Shik'isóó, shich'į' áhóót'įįdígíí éí hane' yá'át'éehii hózhǫ́ náás kwíidoolííł biniyé shich'į' áhóót'įįdgo nihił béédahózin doo nihósh'ní.

¹³Christ biniinaa awáalyaaí nishłínígíí éí aláahgo naat'áanii bisiláo aa ádahalyáanii t'áá ałtso áádóó diné t'áá ałtsogóó bił béédahoozin.

¹⁴Awáalyaaí nishłínígíí bąą Christ bee ałk'isóó dajílínígíí k'asdą́ą́' t'áá ádzíłtso ałdó' Bóhólníihii bee dahadziilgo ádaho'diilyaa, áko t'áadoo bik'ee hoł daayé'í, índa t'ah náábíláahgo doo dadzisti'góó Diyin God bizaad bee yádajiłti' dadzizlį́į́'.

¹⁵Ákondi ła' da'oołch'į́įdgo áádóó saad ídei'áahgo Christ yaa dahalne', nidi ła' éí yá'át'éehgo nitsáhákees bee yaa dahalne'.

¹⁶Saad dahółǫ́ǫgo ach'ą́ą́h nidaa'na'go Christ yaa dahalne'ígíí éí t'óó ádaat'į́įgo ádaaní; awáalyaaí nishłį́įgo díí bee hóda'iits'ih dashó'níigo ádaat'į́.

¹⁷Nidi yá'át'éehgo nitsídaakeesígíí éí ayóó'ádashó'níigo Christ yaa dahalne', háálá awáalyaa sédáago hane' yá'át'éehii bich'ą́ą́h yáshti' doo biniyé nishi'deeltį́įgo hoł béédahózin.

¹⁸Ákoshą' hait'ée doo? Háni'diínee', t'áá azlį́'ígi át'éego baa nijikai, t'óó ádajit'į́įgoda, éí doodaii' t'áá aaníí ádajit'į́įgoda, Christ baa dahojilne'ígíí éí bąą shił hózhǫ́. Áádóó t'áá aaníí bąą shił hózhǫ́ǫ doo.

¹⁹Háálá shá sodadołzingo áádóó Jesus Christ biNíłch'i Diyinii shíká adoolwołgo shéédidoochiłgo shił bééhózin.

²⁰Ts'ídá doo t'óó shaa yáhodoosįįł daígíí t'áá awołí bee bíká shił chohoo'į́įgo neíníshłí, nidi ts'ídá t'áadoosti'ee k'ad hinishná índa t'áá át'é yę́ęgi át'éego hinishnáá léi', doodago éí dasétsą́ą́ léi', t'áá sézį́į́ nít'éé' shee Christ baa ha'niih doo.

²¹Háálá hinishnánígíí éí Christ át'é, áádóó dasétsánígíí éí a'ídeeł át'é.

²²Nidi t'áá hinishnáago éí naanish yá'ádaat'éehii lą'ígóó ła'náádadeeshdliił, áko nidideesh'áłígíí éí doo shił bééhózin da.

²³Háálá díí naakigo haz'ánígíí t'áá íiyisí baa nitséskees. Dashdooya'go Christ bił hojílǫ́ǫ laanaa nisin, háálá áájí íiyisí yá'át'ééh.

²⁴Ákondi t'áá hinishnáago éí aají t'ah aláhídi át'éego nihá bohónéedzą́.

²⁵Díí t'áá íiyisí shił bééhoozin, éí t'áá hinishnáa doo, áádóó t'áá ánółtso nihił honishłǫ́ǫgo nihe'oodlą' danéeséeh doo, áko éí bąą nihił dahózhǫ́ǫ doo.

²⁶Áko nihaa nánísdzáago shinahjį' t'ah biláhígo Christ Jesus baa dadzíínóhłíi dooleeł.

²⁷Áyąądą́ą́' Christ baa hane' yá'át'éehii nizhónígo bik'eh deínóhkáah le', áko nihaa níyáago, éí doodaii' doo aadi naasháa da nidi, t'áá aheełt'éego danołdzilgo nidasoozį́įgo áádóó t'ááłá'í nitsáhákees bee hane' yá'át'éehii deinohdlánígíí bee ahąąh deínółdzíiłgo nihaa náhodiists'į́įh doo.

²⁸Nihits'ą́ą́jí danilíinii ts'ídá t'áadoo bik'ee nihił daayé'í. Jó, éí áhodidooldįįłígíí bee hwéédahózinii át'é, nidi nihíjí t'éiyá yisdánihidi'doo'niłígíí Diyin God bits'ą́ą́dę́ę́' bee nihééhózinii át'é!

²⁹Háálá doo t'óó Christ deidoohdląął t'éí biniyé nihik'idahodzisdli' da, nidi Christ bá ti'dahwiidoohnih ałdó' biniyé nihik'idahodzisdli'.

³⁰Áko hane' yá'át'éehii yits'ą́ą́jí danilíinii t'áá shizááká bich'į' naasdzilgo dashoołtsą́ áádóó k'ad shaa dahodoohts'a'ígi át'éego nihí ałdó' t'áá nihizááká nidaałdzil.