Read Navajo PHILIPPIANS 4 Bible Online

PHILIPPIANS 4 - Navajo bible

PHILIPPIANS 4

¹Éí bąą, shik'isóó, ayóó'ádanihósh'níigo nihídin nishłíinii, nihaa shił hózhǫ́! Ak'eh hodeesdlį́į́'jí naat'á ch'ah shá danohłį́! Ayóó'ádanihósh'níinii, t'áá bee nihił ch'íhoní'ánígi át'éego Bóhólníihii bee nihidziilgo nidasoozį́į le'.

²Yódiya nílíinii nánooshkąąh, Síntikii nílíinii ałdó' nánooshkąąh, Bóhólníihii bee t'áá aheełt'éego nitsóhkees nihidishní.

³Áádóó ałdó' t'áá aaníí shił nanilnishí nílíinii, díí asdzání t'áá áłah bíká anánílwo' doogo baa nánooshkąąh, háálá shíká aná'ahi'nilchéehgo hane' yá'át'éehii baa hane'gi t'áá awołí bee shił naashnish, áádóó Klément índa náádaała' shił nidaashnishígíí ałdó' t'áá ákódaat'į́. Éí t'áá ałtso iiná naaltsoos biyi' bízhi' bik'idaasdzoh.

⁴T'áá áłahjį' Bóhólníihii bee nihił dahózhǫ́. Náá'áłdó' ánáádísh'ní, Nihił dahózhǫ́!

⁵Bíni'dii nízaadgóó hada'íínółnínígíí diné t'áá ałtso nihá bił béédahózin doo. Bóhólníihii nídoodáłígíí koshídę́ę́' hadziih.

⁶T'áadoo ha'át'íhída nihida'diił'áhí, nidi ahééh danohsingo t'áá ałtsojį' sodizin índa ná'ookąąh bee deínóhkeedígíí Diyin God bił béédahonohsin le'.

⁷Áko Diyin God bits'ą́ą́dę́ę́' bee ach'į' hózhǫ́ náhásdlį́į'ii, ak'idi'yiitįįh t'áá ałtso yiláahdi át'éii, éí Christ Jesus bee nihijéí índa nihintsékees yaa áhályą́ą doo.

⁸Shik'isóó, díí bee ninisht'ééh: ha'át'íhída t'áá aaníí nilíinii, ił ílį́ yą́ą́h nilíinii, ts'ídá t'áá ákogi át'é nilíinii, chin bąąh ádinii, ayóó'ó'ó'ní yą́ą́h nilíinii, yá'át'éehgo yáti'ii, ha'át'íhída aláahgo yá'át'ééh nilį́įgo, índa aa ha'niih yą́ą́h nilį́įgo, éidí baa nitsídaahkees.

⁹Shits'ą́ą́dóó bídahooł'ą́ą'ii áádóó nídooláii áádóó dasidoots'ą́ą'ii índa baa naasháago daołtsánígíí baa naahkai, áko Diyin God bee ach'į' hózhǫ́ náhásdlį́į'ii nihił hólǫ́ǫ doo.

¹⁰T'áá aaníí shaa nitsídaahkees nidi shíká adoohjahgi t'áadoo nihá ashja'iilaa da. Ákondi nízaad nihoolzhiizhgo índa shaa tsínáádasidookéezgo shíká oojéé'. Éí Bóhólníihii binahjį' t'áá íiyisí baa shił hózhǫ́!

¹¹Doo t'áadoo le'é bídin nishłį́įgo ádíshníi da, háálá t'áá shee hólónígi baa shił hózhǫ́ǫgo bóhooł'ą́ą́'.

¹²T'áá ayáhígo át'éego iinánígíí, índa t'áá ałtso ee hólǫ́ǫgo iinánígíí ałdó' shił bééhózin. T'áá ooleełgi índa t'áá azlį́'ígi át'éego, hwiih nishłį́įgo, doodaii' dichin nishłį́įgo bóhooł'ą́ą́', t'áá ałtsoní shoosánígo, doodaii' t'áá ałtsoní bídin nishłį́įgo shił yá'át'éehgo áshi'diilyaa.

¹³Christ shidziilgo ásósinii bee t'áá ałtsoní ádeeshłíiłgo bíneesh'ą́.

¹⁴Ákondi shaa dajiinohba' lá, shich'į' nahwii'náago shíká oojéé'.

¹⁵Fílipaidi oodlání danohłíinii, t'áá nihí nihił béédahózin, hane' yá'át'éehii baa aho'niishne' yę́ędą́ą́' Masedóniyadóó dah diiyáago oodlání danilíinii áłah nídaadleehígíí t'áadoo le'é t'áadoo ła' yee shíká ííjée' da, nidi t'áá hazhó'ó nihí t'éiyá nihił ałts'ą́ą́' da'nisk'iiz dooleełígíí éí aa doolyéełii índa nídidoolyéełii bee ahíłká iijéé'.

¹⁶T'ahdii Thesalonáíkagi naashá yę́ędą́ą́' łah t'áadoo le'é shich'į' ádaahłaa áádóó náá'áłdó' shíká anáánáojéé'.

¹⁷Sha'doolyééł doo nisingo ádíshníi da, nidi nihá íná'iidoodiłgo nihá bik'idoodzohígíí t'éiyá biniyé ádíshní.

¹⁸Shí k'ad t'áá bilááh neel'ą́ągo ałtso shich'į' na'ílyá! T'áadoo le'é shich'į' ádaahłaaígíí Iipafrodáítas sheinínil, áko nídiiláago k'ad t'áadoo bídin nishłíní da. Éí Diyin God bich'į' łikání halchingo nááhániihii t'áá néidooléłígi át'éii át'é, áádóó bił hóshóonii át'é.

¹⁹Áko shiDiyin God éí Christ Jesus biniit'aa yee ayóó át'éii yee alááh neel'áanii bik'ehgo bídin danohłį́įgo chodaoł'íinii t'áá ałtso nihaidii'aah dooleeł.

²⁰NihiDiyin God, éí nihiTaa' hool'áágóó áádóó ahóyéel'áágóó bee baa ha'niih le'. T'áá ákót'ée doo.

²¹Christ Jesus bee Diyin God bidiyį́į́' t'áá ałtso shá k'é dabidohní. Nihik'isóó danilíinii shił naháaztánígíí k'é danihiłní.

²²Diyin God bidiyį́į́' t'áá ałtso k'é danihiłní, Síízar, aláahgo naat'áanii bighandóóígíí íiyisí ákódaaní.

²³NihiBóhólníihii Jesus Christ bibee ajooba' yee nihik'ijidlíi doo. [T'áá ákót'ée doo.]