Read Navajo COLOSSIANS 2 Bible Online

COLOSSIANS 2 - Navajo bible

COLOSSIANS 2

¹Nihí áádóó Leiyodisíyagi kéédahat'íinii índa t'ah doo dashiiłtséhígíí t'áá ałtso bá t'áá íináwołí bee naasdzilgo nihił béédahózin dooleeł nisin.

²Ayóó'áda'ahijó'níigo łá'í dajílį́įgo hajéí bee chánah dajílį́į doo, áádóó t'áadoo anáhóót'i'í ak'idi'yiitįįh bee hak'ihozhdoodliił, índa Diyin God [aTaa'] binahat'a' doo bééhózin da yę́ę, éí Christ ááhyiłníigo baa ákodazdínóozįįł nisin.

³Éí bee hódzáanii áádóó ił ééhózin da'ílíinii t'áá ałtso hwee hólǫ́.

⁴Diné ła'da t'áadoo na'adlo' saad yee yóó'adanihinii'áhí doo biniyé kónihidishní.

⁵Háálá azhą́ doo nihił honishłǫ́ǫ da nidi, t'áá áłahjį' nihaa nitséskeesgo hasht'ehodít'éego baa naahkaígíí, áádóó Christ baa dadzíínóhłíhígíí haleebee nisoozį́įgo shił bééhózingo baa shił hózhǫ́.

⁶Éí bąą Christ Jesus nihiBóhólníihii nihee dahazlį́'ígi át'éego baa dadzíínóhłíigo bee dayínóhkááh,

⁷t'áá nidanihidi'neestą́ą́' yę́ęgi át'éego Christ bii' nihihétł'óól danéeséehgo bikáá'dóó da'ohtł'ingo nihe'oodlą' bee nihidahoníłdzil doo. Índa t'áá íiyisí ahééh danohsin le'.

⁸Ła'da nihokáá' dine'é bił ééhózinígíí bik'ehgo ak'i'diitįįhii índa t'áadoo nánídlínígóó anót'ááh nilíinii yee danihółnééh lágo. Jó, nihokáá' dine'é bi'é'él'į' yik'ehgo ádaat'é, índa nihokáá' dine'é binahagha' ałtah áát'eełii yik'ehgo ádaat'é, éí doo Christ yik'ehgóó ádaat'ée da.

⁹Háálá Christ diné dzizlį́į'go Diyin God yee át'éii t'áá át'é hwii' hólǫ́,

¹⁰áko hoł łá'í nohłį́įgo ałtso hadanołt'é ádanihi'diilyaa. Éí naat'áanii danilíinii índa bídahólnííh danilíinii doo daat'íinii nidi t'áá ałtso bee hóhólnííh.

¹¹Hoł łá'í nohłį́įgo nihąąh nídahineeshgizhígíí éí doo yílá bee nihąąh nídahineeshgizhii át'ée da, nidi ts'ísee k'ehgo bąąhági ádanoht'éhígíí nahjį' kóyiilaago Christ bee nihąąh nídahineeshgizhii át'é.

¹²Háálá danihi'doolzį́'ígíí bee hoł yóó'ádanihi'diilyaa; t'áá éí ałdó' binahjį' dadziztsą́ą́dę́ę́' Diyin God nááhodiisáii áyoolíiłii deinohdlą́ągo baa dadzíínóhłíhígíí binahjį' hoł náádanihidi'yiiljéé'.

¹³Nihí ádił nida'ayołzíhígíí bąą, áádóó niha'át'e' doo nahjį' eelgizhígíí biniinaa dasinoonáá nít'éé', nidi doo ákǫ́ǫ́ ádaahdzaa yę́ę t'áá ałtso Diyin God nihá yóó'iidíí'ą́, áádóó Christ bił hinááh ánídanihiidlaa.

¹⁴Jó, bik'eh hoogáałii bik'ehgo nihik'ijį' naaltsoos siłtsoozígíí tsin ałnáoszid bąąhjį' Christ bił o'oolkaalígíí bee Diyin God éí naaltsoos yik'i ní'deezoh.

¹⁵Naat'áanii danilíinii áádóó bídahólníihii doo daat'íinii t'áá ałtso Christ hak'eh deesdlį́į'go ííshją́ą́ áyiilaa.

¹⁶Éí bąą daadáanii áádóó doodlį́įłii, índa áda'azįįd áádóó dah néitį́įhgo nahadláii índa háá'áyį́į́h jį́ dólzinii bida'oł'į́ nihiłníigo diné ła' yee nihaa náot'į́į́' lágo.

¹⁷Éidíyee' t'áá aaníinii baa hodoolzhishígíí bichaha'oh t'éiyá át'é, nidi Christ t'áá aaníinii nilį́.

¹⁸Ła'da ádaa hojoolbá'í í'dólzinii áádóó diyingo nidaal'a'í yich'į' nahałáii t'ááká bikéé' dah dadoohkááh yíila', háálá ákódaaht'į́įgo Diyin God nihaidooléełii yits'ánihidínóo'ah. Azhą́ t'áadoo yoo'íní da nidi, Shił áhát'į́, níigo éí t'áá ts'ísee k'ehgo nitsíkeesgo t'áadoo biniyéhígóó ádaa ha'niih.

¹⁹Christ éí da'oodlání t'áá ła' bizhi'ee yá Atsiits'iin nilíinii doo hózhǫ́ ádíidéélt'i' da. Nidi ats'íís ahadadit'ą́ą́góó ats'id yee da'ahótą'ígi át'éego nihí t'áá ła' bizhi'ee Christ bits'íís daniidlį́įgo bídadíníit'i'. Áko Diyin God nihi'iisą́ągo niilzééł.

²⁰Nihokáa'gi bee dahwéegháahii bits'ąą Christ bił dasinoonáago bits'ą́ą́dóó nihéédoochidgo, ha'át'éegoshą' t'ahdii nihokáá' dine'é doo da'oodlání k'ehgo dahinohnáago, díí bik'eh hoogáałii bik'eh dahonoł'į́:

²¹díí doo bizhdeelchíid da, díí doo jiilįh da, éí doo nízhdiilée da?

²²Díí nihokáá' dine'é bibik'eh ó'oo'níiłii índa bina'nitin bik'ehgo ádaat'é. Díí chodao'į́įgo ádaadįįł.

²³Díí bee nahaz'áanii t'áá hó íiznízingo áádóó a'ohgo ájít'é ízh'díl'į́įgo índa hats'íís bich'į' nahojiiłnáago bee nahojiłáhígíí t'óó t'áá aaníí bee hojíyą́ nahojílin, nidi hats'íís yidánoolníinii doo ni'kwííléeh dago biniinaa doo ílį́į da.