Read Navajo COLOSSIANS 3 Bible Online

COLOSSIANS 3 - Navajo bible

COLOSSIANS 3

¹Christ bił náádanihi'diiljée'go, Diyin God binish'náájí Christ dah sidáadi dahólóonii hádaaht'į́.

²Yá'ąąshdi dahólóonii t'áá íiyisí haleebee baa nitsídaahkees, nahasdzáán bikáa'gi dahólóonii éí dooda.

³Háálá nihokáá' bił nidahazt'i'ii bits'ąą dasinoonáago k'ad Christ bił Diyin God bii' nídanihidi'dees'į́į́'.

⁴Christ nihe'iina' nilíinii yit'íní í'diilyaago, nihí ałdó' bee bits'ádi'nílíidii bił ałts'ą́ą́' da'nołk'iizgo danihidi'dooltsééł.

⁵Éí bąą nihokáá' baa da'íldéehii nihiyi' dahólóonii yóó'adahidoh'aah; éí na'ageh bee tsi'oodááł, baa'ihgo nitsáhákees, ałdáhonooní, nichǫ́'ógo laanaa hwiindzin, índa adáhonooní ádaat'éii. Jó, adáhonooní éí e'elyaii bich'į' nahadláii t'áá bił aheełt'é.

⁶Díí biniinaa Diyin God t'óó báhádzidgo bibee até'él'íinii éí diné doo ak'eh dahół'íinii bik'i dahoyiileeh.

⁷Nihí ałdó' łah doo da'oodlání bitahgóó ákódanoht'éego dayínóhkááh nít'éé'.

⁸Nidi áháchį', hashké hwiindzin, áká naat'á, t'áá ádzaagóó aa hane', índa baa'ihgo yáti', díí t'áá ałtso k'ad yóó'adahidoh'aah.

⁹Wooch'ííd t'áadoo ałk'ijį' nisooł'ání, háálá átséédą́ą́' ádanoht'é yę́ę índa éí bee ádaot'įįdii bii' hahisoohkai,

¹⁰áko iiná ániidíii biih dahisoohkai. Diyin God ánihijiilaii, éí nihił éédahózingo ádanihijiléehgo t'áá hwééniilt'éego ániidíii ánánihijidlééh.

¹¹Ákódajít'éii éí Gríik dine'é nilíinii índa Jew dine'é nilíinii doo bił ał'ąą ájít'ée da, áádóó bąąh náhineeshgizhii índa doo bąąh náhineeshgizhii, áádóó náánáłahdę́ę́' dine'é índa Síthiyan dine'é nilíinii, áádóó naalte' índa doo naalte' nilíinii ałdó' doo bił ał'ąą ájít'ée da, nidi Christ t'éí bóhólnííh, áádóó diné t'áá ałtso bá hojílǫ́.

¹²Éí bąą Diyin God atah nihiizláa'ii, dadinohyin índa Diyin God ayóó'ánihó'níinii danohłį́. Éí bąą ałhaa a'ááh danohsin, ałhaa dajiinohba', ádaa dahojiinołbá'ígo nitsídaahkees, a'ohgo áda'díínółzin, índa ałch'į' nízaadgóó hada'íínółní.

¹³Ałch'į' hada'íínółní, ła'da bich'į' saad dahosoołį́į'go bił k'é nída'ahididooh'niił; doo ákwii ádaoht'įįdii Christ nihá yóó'iidii'aahígi át'éego doo ákwii áda'ahoł'į́į́ nít'ée'ii ahá yóó'adahidoh'aah.

¹⁴Áádóó díí t'áá ałtso bighą́ąhjį' ayóó'áda'ahíínóhní, háálá éí t'áá ałtsoní hadaałt'éego ahíyółtą'.

¹⁵Áádóó Diyin God bits'ą́ą́dę́ę́' bee ach'į' hózhǫ́ náhásdlį́į'ii bíni' nihijéí bii' bóhólníih le', jó, t'áá ła' bizhi'ee danohłį́į doo biniyé nihíká ádahodoo'niid. Índa ahééh danohsin le'.

¹⁶Haa'íyee' Christ bizaad lą'ígo bee ákidaahdláa le', bee hódzáanii t'áá ałtso bee ahidiníłnáago nida'ahinohtin, índa chánah áda'ahíínółzin, áádóó Diyin God bizaad biyi'dóó sin, áádóó sin bee Diyin God baa ha'niihii, índa ajooba' nihijéí bii' hólǫ́ǫgo Níłch'i Diyinii k'ehgo sin bee Bóhólníihii bich'į' dahohtaał.

¹⁷Jesus bee Diyin God aTaa' nilíinii bich'į' ahééh danohsingo t'áá ałtsoní baa yádaałti'ígíí áádóó baa nidaahkaígíí éí Bóhólníihii Jesus bízhi' bee baa nidaahkai.

¹⁸E'asdzą́ą́ danohłíinii, nihadahastiin bídahwíínółníihgo áda'díínółzin, háálá Bóhólníihii bíi'ii ákódaat'į́įgo beełt'é.

¹⁹Ahastiin danohłíinii, nihida'asdzą́ą́ ayóó'ádeínóh'ní; t'áadoo bich'į' doo danohts'ídí.

²⁰Áłchíní danohłíinii, danihishchíinii t'áá ałtsojį' bik'eh dahonoł'į́, háálá éí Bóhólníihii yaa bił hózhǫ́.

²¹Azhé'é danohłíinii, niha'áłchíní t'áadoo bída'ohts'ihí, háálá bída'ohts'ihgo bąąh nidahoyołkaad.

²²Naalte' danohłíinii, nihokáa'gi nihinanit'a'í t'áá ałtsojį' bik'eh dahonoł'į́. T'óó bináałgo bił hóshǫ́ t'éiyá biniyé ádaaht'į́įgo éí dooda, nidi nihijéí tł'ááhdę́ę́' Bóhólníihii dadíínóhsingo nihinanit'a'í bik'eh dahonoł'į́.

²³Bóhólníihii bá ádaaht'į́įgo t'áá ha'át'íhída baa nidaahkaigo haleebee bindaałnish; doo diné t'éí bá ádaaht'į́į da.

²⁴Bóhólníihii nihá bee hólóonii nihaidooléełgo nihił béédahózin. Bóhólníihii Christ bá nidaał'a'.

²⁵Doo ákǫ́ǫ́ ájooníiłii éí doo ákǫ́ǫ́ ájíít'įįdii bąą atíhodi'doolnííł, háálá Diyin God éí t'áá aheełt'éego diné yeinít'į́.