Read Navajo COLOSSIANS 4 Bible Online

COLOSSIANS 4 - Navajo bible

COLOSSIANS 4

¹Naat'áanii danohłíinii, nihinaalte' t'áá ákogi át'éego índa t'áá aheełt'éego yá'át'éhígi ádaał'į́, háálá yá'ąąshdi nihí ałdó' nihiBóhólníihii hólǫ́ǫgo nihił béédahózin.

²T'áadoo diniitłóhí sodadołzin, áádóó Diyin God bich'į' ahééh danohsingo sodizin bee hada'ísídół'į́į́'.

³Áádóó nihí ałdó' nihá sodadołzin, hane' yá'át'éehii baa dahwiilne' dooígíí nihá ashja'ósingo nihá íidoolííł biniyé, áko Christ bína'niltin doo bééhózin da yę́ę baa nahwiilne' dooleeł. Éí baa nahashne'go biniinaa awáalyaaí nishłį́.

⁴Áko t'áá bee hahideesdzih dooleeł nít'é'ígi át'éego Christ baa hane' ííshjání ádeeshłíłígíí bíká sodadołzin.

⁵Doo da'oodlání binááł dahonohsą́ągo dahinohnáago Christ bá ádaaht'į́įgo nihá ashja'ósinígíí ts'ídá hazhó'ó chodaoł'į́.

⁶T'áá áłahjį' ajooba' saad éí áshįįh halnihígi át'éego bee yádaałti', ákódaaht'į́įgo diné t'ááłá'í nítínígo bich'į' t'ą́ą́' háá'doodzihgi nihił béédahózin doo.

⁷Tíkikas, éí Bóhólníihii binahjį' nihik'is ayóó'óó'níinii áádóó naal'a'í ba'ahódlíii índa shił naal'a'í jílíinii éí shił áhoot'éhígíí t'áá ałtso bee nihił hodoolnih.

⁸Éí kodi nihił áhoot'éhígíí nihił béédahodoozįįł biniyé, áádóó nihijéí hada'ólníigo ánihizhdoolííl ałdó' biniyé nihich'į' ahóół'a'.

⁹Áádóó Onésimas bił ahóół'a', éí ba'ólíigo ayóó'óó'níigo nihik'is nilíinii, t'áá aadę́ę́' nihitahdę́ę'go nijighá. Éí t'áá ájíłah kodi ádahoot'éii t'áá ałtso bee nihił hozhdoolnih.

¹⁰Aristárkas, bił awáalyaaí nishłíinii k'é nihiłní. Mark, Bárnabas bił naa'aash nilíinii, ałdó' k'é nihiłní. (Mark nihaa níyáá ládą́ą́' k'é dabididoohniił, t'áá íídą́ą́' bee nihił hweeshne' yę́ęgi át'éego.)

¹¹Áádóó Jáshowa, Jústas wolyéhígíí, ałdó' k'é nihiłní. Bąąh nídahineeshgizhii bitahdóó díí diné t'éiyá Diyin God bee bóhólníihgo bił haz'áanii yá nidaalnishgo shił nidaalnishii danilį́, áádóó bee shił náhoojǫǫłii danilį́.

¹²Épafras t'éí aadę́ę́' nihitahdę́ę'go diné nilį́įgo Christ Jesus yá naal'a'í nilíinii k'é nihiłní. Éí oodlą́ yee nininísáanii danohłį́į doo biniyé, índa t'áadoo anáhóót'i'í Diyin God íinízinii t'áá yíní át'éegi nihił béédahózin doo biniyé t'áá áłahjį' nihénálniihgo t'áá íináwołí bee nihá sodilzin.

¹³Háálá t'áá ánółtso nihí áádóó Leiyodisíyadi índa Haiyerápolisdi kéédahoht'íinii t'áá íiyisí nihízhneedlį́įgo shił bééhózingo nihił hashne'.

¹⁴Luke azee' ííł'íní ayóó'óó'níinii índa Díímas ałdó' k'é nihiłní.

¹⁵Leiyodisíyadi nihik'isóó danilíinii, áádóó Nímfas índa éí bighan góne' da'oodlání áłah nádleehii nihá k'é dabididoohniił.

¹⁶Díí naaltsoos nihich'į' yéélta'go índa, Leiyodisíyadi da'oodlání áłah nádleehii ałdó' bich'į' dayízhdóołtah. Leiyodisíyagóó naaltsoos íishłaaígíí ałdó' ts'ídá dayídóołtah.

¹⁷Áádóó Arkípas éí, Bóhólníihii bá nanil'a'go naa deet'áanii ts'ídá ałtso bi'díílíiłgi baa áhólyą́, dabididoohniił.

¹⁸Shí Paul, díí k'é dishníigo bee ak'e'ashchíhígíí éí t'áá shíla' bee áshłééh. Awáalyaaí nishłį́įgo shéédaałniih. Diyin God bibee ajooba' nihił hólǫ́ǫ doo. T'áá ákót'ée doo.