Read Navajo I THESSALONIANS 1 Bible Online

I THESSALONIANS 1 - Navajo bible

I THESSALONIANS 1

¹Shí Paul áádóó Silvéínas índa Timothy, Thesalonáíkagi oodlání danilíinii áłah nádleehígíí, éí Diyin God aTaa' nilíinii áádóó Bóhólníihii Jesus Christ bíí' danilíinii bich'į' naaltsoos ádeiilnééh: Diyin God áádóó Bóhólníihii Jesus Christ bibee ajooba' áádóó bibee ach'į' hózhǫ́ náhásdlį́į'ii yee nihik'ijidlíi doo.

²T'áá áłahjį' danihííníijíigo sodadiilzingo Diyin God bich'į' t'áá ánółtso nihaa ahééh daniidzin.

³Nihe'oodlą' binahjį' baa nidaahkaígíí áádóó ayóó'ó'ó'ní bee deínółníshígíí índa hada'íínółníigo nihiBóhólníihii Jesus Christ bee nihił chodahoo'ínígíí nihiDiyin God nihiTaa' binááł t'áá áłahjį' nihéédeiilniih.

⁴Nihik'isóó, Diyin God ayóó'ánihó'níinii, Diyin God atah nihiizláa'go nihił béédahózin.

⁵Háálá hane' yá'át'éehii bee nihił dahwiilne'ii doo t'óó saad t'éí át'ée da, nidi Níłch'i Diyinii bibee adziilii bee nihidziilgo índa ts'ídá t'áá aaníinii át'éego baa ákodanoodzį́į'go bee nihił dahwiilne'. Nihá yá'át'ééh biniyé nihitahgi bee nisiidzį́į́ nít'ée'ii nihił béédahózin.

⁶Áko nihida'oł'į́ dasoolį́į́', Bóhólníihii ałdó' bida'oł'į́ dasoolį́į́', háálá łą́ą́dę́ę́' nihich'į' nidahwii'náa nidi, Níłch'i Diyinii bee nihił dahózhǫ́ǫgo saad nídadoolá.

⁷Áko Masedóniyagi índa Akéya hoolyéegi oodlání danilíinii t'áá ałtso bikéé' deíkáahii dasoolį́į́'.

⁸Háálá nihits'ą́ą́dóó Bóhólníihii bizaad adahideezdláád, doo Masedóniyagi índa Akéya hoolyéegi t'éiyá da, nidi Diyin God deinohdlą́ągo baa dadzíínóhłíhígíí t'áá ałtsogóó baa dahóóne'. Áko nihí t'áadoo bee hanáádaodziihí da.

⁹Háálá nihí nihaa niikai yę́ędą́ą́' t'áá íiyisí nihich'į' k'é danohdzin nít'ée'ii éí diné t'áá ałtso yee nihaa nidahalne', áádóó eda'alyaii bits'ą́ąjį' Diyin God bich'į' ninánohkaigo Diyin God hináanii índa t'áá aaníí nilíinii bá nidaał'a'go yee nihaa nidahalne'.

¹⁰Índa Diyin God biYe' daaztsą́ą́dę́ę́' néidiisáii yá'ąąshdę́ę́' nídoodáłígíí biba' ádanoht'éego ałdó' yee nihaa nidahalne'. Jó, Diyin God t'óó báhádzidgo bibee até'él'íinii yee atí'doolíiłgo bich'į' hoolzhishígíí bits'ą́ąjį' Jesus yisdánihiinííł.