Read Navajo I THESSALONIANS 2 Bible Online

I THESSALONIANS 2 - Navajo bible

I THESSALONIANS 2

¹Nihik'isóó danohłíinii, nihił béédahózingo doo t'áadoo biniyéhígóó nihaa niikai da.

²T'ah doo nihaa niikááh yę́ędą́ą́' Fílipaidi ti'dahwiisii'nii' áádóó t'óó baa yáhásinígi ádanihi'diilyaago nihił béédahózin. Ákondi nihiDiyin God bee doo dasiiti'góó Diyin God bits'ą́ą́dóó hane' yá'át'éehii bee nihił dahwiilne', azhą́ nihik'ijį' danilíinii lą'í nidi.

³Háálá nidanihiniitingo éí doo yooch'ííd át'ée da, baa'ihii doo biniyé ádeiit'įįd da, índa doo bee nihinda'iidlo'ii át'ée da.

⁴Nidi Diyin God nihee lą́ asłį́į'go hane' yá'át'éehii baa nidahwiilne'go yee nihaa dzoozlíí'. Áko diné t'éiyá t'óó bee hoł dahoniilzhǫ́ǫ dooleełígíí éí dooda, nidi Diyin God nihijéí nayínítaahii bił dahoniilzhǫ́ǫ dooleeł biniyé bee yádeiilti'.

⁵Háálá nihił béédahózingo hádą́ą'da doo t'óó łídanihidiilchíigo saad nizhóníii, doodaii' saad bee adáhonooníinii doo bee nihich'į' yádeiilti' da nít'éé', éí Diyin God nihá bił bééhózin.

⁶Áádóó nihí índa náánáła' t'áá háiida yee nihaa dahaniih dooleełii doo biniyé ádeiit'įįd da. Azhą́ Christ bííł'aadii daniidlį́įgo t'áá ha'át'íhída nihí deíníikeed doo nít'éé' nidi, t'áadoo ákódeiidzaa da.

⁷Nidi nihaa niikai yę́ędą́ą́' nihá ádahwiinít'į́'ígo nihitaa siikai, t'áá amá ba'áłchíní yaa áhályánígi át'éego nihitaa deiikai nít'éé'.

⁸Áko Diyin God bits'ą́ą́dóó hane' yá'át'éehii bee nihił nidahosiilne', nidi doo díí t'éiyá da, nidi ayóó'ádanihííníi'níigo bąą nihá niná'ádadiyeet'ą́, háálá áhánígo nihik'éí dasoolį́į́'.

⁹Nihik'isóó danohłíinii, yéego nidashiilnishígíí áádóó naanish nihííghą́'ígíí béédaałniih! Diyin God bits'ą́ą́dóó hane' yá'át'éehii bee nihił nidahosiilne'dą́ą́', doo nihaa naanish nihighą́ą da doo biniyé jį́įgo áádóó tł'ée'go t'áá nihí ák'inideiilnish nít'éé'.

¹⁰Oodlání danohłíinii, dadiniigingo áádóó ts'ídá t'áá ákogi ádaniit'éego índa t'áadoo nihik'i dahodiit'aahí nihitah nideiikaigo bee nihéédahonohsin, Diyin God ałdó' nihá bił bééhózin.

¹¹Nihił béédahózingo azhé'é ba'áłchíní yich'į' yáłti'ígi át'éego t'ááłá'í noozínígo chánah danohłį́įgo nihik'éédahosiiltaa', índa ádanihidii'niid,

¹²Diyin God t'áá bí bee bóhólníihgo bił haz'áanii índa yee ayóó át'éii bił ałts'ą́ą́' da'nołk'iiz doo biniyé nihíká áhodoo'niidígíí bą́ą́h da'nohłį́įgo dayínóhkáah le'.

¹³Áádóó díí ałdó' t'áá áłahjį' Diyin God bich'į' baa ahééh daniidzin, éí Diyin God bizaad nihits'ą́ą́dóó dasidoots'ą́ą́' yę́ędą́ą́' doo nihokáá' dine'é bizaad át'éego nídadooláa da, nidi t'áá aaníí Diyin God bizaad át'éego deisoohdląądgo k'ad nihindaalnish.

¹⁴Nihik'isóó danohłíinii, Judíyagi Diyin God dayoodláanii áłah nídaadleehii, Christ Jesus yił łá'í danilínígíí doo yá'át'ééhgóó bich'į' ádahóót'įįdígi át'éego nihí ałdó' ákódanihi'diilyaa. Éí Jew dine'é ti'dahwiyoosnii'ígi át'éego nihí ałdó' t'áá nihí nihidine'é ła' ti'danihiyoosnii'.

¹⁵Jew dine'é éí Bóhólníihii Jesus dayiisxį́, áádóó t'áá bí bidine'é Diyin God yá dahalne'ii deiníłtseed, áádóó nihí ałdó' ti'danihiyoosnii'. Áko Diyin God doo yił dahóóshǫǫd da, áádóó diné t'áá ałtso yits'ą́ą́jí danilį́.

¹⁶Doo Jew dine'é danilíinii yisdádookah biniyé hane' yá'át'éehii bee bił dahwiilne'ígíí nidi nihits'ą́ą́' deiníłtł'ah! T'ááłáhígi át'éego nida'iisíihgo yaa deíkááh. K'ad índa Diyin God t'óó báhádzidgo bibee até'él'íinii ts'ídá hak'ijį' silį́į' ni.

¹⁷Nihik'isóó danohłíinii, nihíyee' azhą́ t'óó kónízahíjį' ałts'áhaakai nidi, t'áá áłahjį' nihijéí tł'ááhdę́ę́' nihaa nitsídeiikees. Dooládó' nihídin dasiidlį́į' da! Náádanihiidiiltséełgi haleebee bindahosiit'ą́!

¹⁸Ákót'é bąą t'áá íiyisí t'áá nihaa diikah daniidzį́į́'. Shí Paul lą'ídi ákwíiniizį́į́', nidi níłch'i bida'iiníziinii binanit'a'í Séítan wolyéii nihineestł'ah.

¹⁹Háálá Bóhólníihii Jesus Christ náánádzáago bidááhdóó deiidzį'go ha'át'íishą' bee nihił chodahoo'į́į doo? Ha'át'íishą' baa nihił dahózhǫ́ǫ doo? Ha'át'íí naat'á ch'ah shį́įshą' baa nihił nidahoozhǫǫh doo? Da' doósh nihí da?

²⁰Nihí lą́ą, bee nihaa ha'niihii índa bee nihił dahózhóonii nihá danohłį́!