Read Navajo I THESSALONIANS 4 Bible Online

I THESSALONIANS 4 - Navajo bible

I THESSALONIANS 4

¹Áádóó nihik'isóó, Bóhólníihii Jesus bee nidanihiniitingo nihiyadahoniidlįįhgo nídanihiikąąh, éí Diyin God bił dahonohshǫ́ǫgo dayínóhkáah dooleeł biniyé nihits'ą́ą́dóó bídahooł'ą́'ígi át'éego dayínóhkáhígíí t'ah biláhídi yá'át'éehgo dayínóhkáah le'.

²Háálá Bóhólníihii Jesus bee nihá dahwiil'a'ii nihił béédahózin.

³Diyin God nihá íinízingo diyingo ádanihidi'doolníiłgo na'ageh bee tsi'na'adá bits'ą́ąjį' áda'díínółzin doo.

⁴Índa diné danohłíinii, dadíínóhsingo asdzání baa dahonohsą́ągo niheda'asdzą́ą́ ádaahłe',

⁵doo Jew dine'é danilíinii Diyin God doo yéédahósinii ádaat'ínígi át'éego t'óó ałdáhonooní t'éí biniyé ádaaht'į́įgo éí dooda.

⁶Áko kwe'é nahazt'i'gi diné ła' bik'is yaa'dólééł lágo, háálá ákódaat'íinii Bóhólníihii atíbidoolíłígíí t'áá bítséedi hazhó'ó bee nihida'ayeelnii' ni'.

⁷Diyin God éí baa'ihgo dahinii'náa dooleełígíí doo yiniyé nihíká ádííniid da, nidi diyingo dahinii'náa dooleeł biniyé nihíká ádííniid.

⁸Éí bąą diné ła' díí na'nitin doo jiniizį́'ígíí éí diné doo jinízinii doo éí át'ée da, nidi Diyin God doo jiniizį́į́'góó át'é. Jó, Diyin God t'áá bí biNíłch'i Diyinii nihaidii'aah.

⁹K'ad Christ bee nihik'is danilíinii ayóó'ádeínóh'níi doogi doo ła' bee nihich'į' ak'e'ashchíi da, háálá ayóó'áda'ahíínóh'níi doogo Diyin God t'áá íídą́ą́' nanihineeztą́ą́'.

¹⁰Áko Masedóniyagi t'áá át'éé nít'éé' Christ yee nihik'isóó danilíinii t'áá ałtso ayóó'ádeínóh'ní. Nidi nihik'isóó danohłíinii, t'ah náábíláhídi ádaaht'į́į doogo baa nídanihiikąąh.

¹¹T'áá bee nidanihineetą́ą'ii bik'ehgo hasht'ehodít'éego dahinohnáa dooígíí bídahooł'aah, áádóó t'áá nihí nihídadéét'i'ii baa ádahołyą́, índa t'áá nihí ák'inidaałdzil doogi bidadoołkaal.

¹²Áko doo da'oodlání danilíinii binááł t'áadoo nihinda'adlo'í dahinohná, áádóó t'áadoo bee nihich'į' anáhóót'i'í da dooleeł.

¹³Nihik'isóó danohłíinii, daneeznáanii éí t'áá nihił béédahózin doo danihííníi'ní, áko ła' ił chohoo'į́ bee ádaadinii yínííł danilínígi át'éego doo yínííł biih dínóohdah da.

¹⁴Háálá Jesus daaztsáanii náádiidzáago deiniidlą́, áko Jesus bii' dahojílǫ́ǫgo da'jiiłhaazhígíí ałdó' Diyin God éí Jesus bił dah náhodidoo'ish.

¹⁵Díí Bóhólníihii bizaad bee ádanihidii'ní, t'ah t'áá kǫ́ǫ́ dahinii'nánígíí Bóhólníihii nádzáago da'oodlání daneeznáanii ts'ídá doo t'áá bítsé dah didiikah da.

¹⁶Háálá Bóhólníihii t'áá bí yá'ąąshdę́ę́' hadahooleełgo ayóó íits'a'go hadoodzih, áádóó aláahgo diyingo naal'a'í biinéé' índa Diyin God bidilní ayóó íits'a'go didoots'į́į́ł. Áko Christ dayoodlą́ągo daneeznáanii áłtsé náábidi'dooljah,

¹⁷áádóó índa nihokáa'gi t'ah dahinii'nánígíí éí da'oodlání náábi'diiljée'ii bił wót'ááhgóó dah diikaigo k'os biyi'jį' Bóhólníihii bidááh diikah, áko índa hool'áágóó áádóó ahóyéel'áágóó Bóhólníihii bił dahoniidlǫ́ǫ doo.

¹⁸Éí bąą díí saad bee ahił dahołne'go bee hada'íínółní.