Read Navajo I THESSALONIANS 5 Bible Online

I THESSALONIANS 5 - Navajo bible

I THESSALONIANS 5

¹Nihik'isóó, díí áhodooníłígíí baa hodoolzhishgi índa beidoołkáałgi bee nihich'į' ak'e'doolchíłígíí doo bee nihich'į' anáhóót'i' da.

²Háálá t'áá nihí nihił béédahózin, tł'ée'go ani'įįhii yígháhígi át'éego Bóhólníihii beidoołkááł,

³áko diné, Hasht'ehodít'ée yee' áádóó yá'ádahoot'ééh, daaníi nidi t'áadoo hooyání bee í'dooldįįłii bik'i hwiidooleeł, asdzání i'niiłchíihgo bił náhodíníigahígi át'éego, áko ts'ídá t'áadoo bee yisdáhóót'i'í da doo.

⁴Nidi nihik'isóó, nihíyee' doo chahałheeł bii' naałdeeh da, áko Bóhólníihii nádzá bijį́įdi ani'įįhii tsíhodiłhisígi át'éego doo tsídadidoołyis da.

⁵T'áá ánółtso adinídíín índa jį́ ba'áłchíní danohłį́; nihíyee' tł'éé', doodaii' chahałheeł doo bits'ą́ą́dóó daniidlį́į da.

⁶Ákót'é bąą, ła' ádaat'ínígi át'éego t'áadoo t'óó da'iilwoshí doo, nidi hada'ísídíil'į́į'go hazhó'ó nitsídeiikees doo.

⁷Jó, da'ałhoshii éí tł'ée'go da'ałhosh, da'adláanii éí tł'ée'go tsi'nidaakai.

⁸Nidi jį́ bii' dahoniidlónígíí bąą haa'íshą' hazhó'ó nitsídeiikees doo. Oodlą́ índa ayóó'ó'ó'ní béésh éé' nahalingo nihijéíts'iin bąąh nidahidii'nił, áádóó yisdá'iildééh bíká ił chohoo'íinii béésh ch'ah danihich'ah ádadiilnííł.

⁹Háálá Diyin God t'óó báhádzidgo bibee até'él'íinii doo yich'į' ninihidiní'ą́ą da, nidi nihiBóhólníihii Jesus Christ bee yisdá'iildéehii nihee nidahwiileeh.

¹⁰Éí nihá daaztsą́, áko dahinii'náago doodaléi' danee'náa nidi nádzáago bił dahinii'náa doo.

¹¹Éí bąą t'áá ádaaht'ínígi át'éego chánah ída'ahołne' índa ahíłká anáhjahgo nihidziil áda'ahołnééh.

¹²Nihik'isóó, díí baa nídanihiikąąh, nihitah nidaalnishii éí Bóhólníihii yee nihilą́ąjį' naazį́įgo nidanihinitinii nihił danilį́į le'.

¹³Bindaanish biniinaa t'áá íiyisí nihił danilį́įgo ayóó'ádeínóh'níi le'. K'é da'ahíínóh'níigo kéédahoht'į́.

¹⁴Áádóó nihik'isóó danohłíinii, nihiyadahoniidlįįh: ák'eh dahal'íinii nidadohtehgo nidanohtin, bijéí doo hada'ólníinii chánahgo ádaahłe', doo dabidziilii bíká anídaahjah, diné t'áá ałtso bich'į' hada'íínółní.

¹⁵Nihich'į' doo yá'át'ééhgóó ádaat'íinii k'éédideeshdlííł t'áadoo danohsiní, nidi t'áá áłahjį' ałch'į' índa diné t'áá ałtso bich'į' yá'át'éehii baa nidaahkai le'.

¹⁶T'áá áłahjį' nihił dahózhǫ́ǫ le'.

¹⁷T'áá áłahjį' sodadołzin le'.

¹⁸T'áá ałtsojį' ahééh danohsin le'. Díidíígíí Christ Jesus bee Diyin God yee nihá íinízin.

¹⁹T'ááká Níłch'i Diyinii noołtł'ááh yíila'.

²⁰Diyin God bá hane'ii t'áadoo bá dadoołnihí.

²¹Na'nitin t'áá ałtso nidaałkaah; yá'ádaat'éehii yéego dayínóhtą',

²²doo yá'ádaat'éehii ts'ídá t'áá ałtso bits'ąą ádaa ádahołyą́.

²³Diyin God bee ach'į' hózhǫ́ náhásdlį́į'ii, t'áá bí ts'ídá diyingo ánihóle', áádóó nihiBóhólníihii Jesus Christ nádzáajį' nihiníłch'i áádóó nihii' naazíinii índa nihits'íís t'áadoo bee bik'ídahót'ahígóó hadaałt'éego nihá yaa áhályą́ą le'.

²⁴Nihíká áníinii éí baa hodzódlíii éí ła'yidoolííł!

²⁵Nihik'isóó, nihá sodadołzin.

²⁶Ałk'isóó danohłíinii t'áá ánółtso, ahíláłk'e dadołniihgo k'é béé'ahohjih.

²⁷Bóhólníihii bee nihich'į' haasdziih, díí naaltsoos nihik'isóó danilíinii t'áá ałtso bich'į' yídóoltah.

²⁸NihiBóhólníihii Jesus Christ bibee ajooba' nihił hólǫ́ǫ doo. [T'áá ákót'ée doo.]