Read Navajo JOSHUA 10 Bible Online

JOSHUA 10 - Navajo bible

JOSHUA 10

¹Ákódzaago Jerúsalem kin haal' áádóó aláahgo naat'áanii Adónai-zíídek wolyéii díí yaa hodiizts'ą́ą́': Jáshowa éí Éí'ai kin haal'áii yik'eh deesdlį́į'go ts'ídá ałtso íísdįįdígíí áádóó Jériko kin haal'áii aláahgo binanit'a'í t'áá bił áyííł'įįdígi át'éego Éí'ai kin haal'áii áádóó aláahgo binanit'a'í ákónááyiidlaaígíí índa Gíbiyan dine'é éí Ízrel dine'é yił k'é da'ahó'níigo áyiilaa áádóó bił kééhojit'į́į́ nít'éé'.

²Áko hadine'é t'áá bił ayóó át'éego hoł yéé' dahazlį́į́', háálá Gíbiyan kin haal'áii éí ayóó át'éego nahat'á kin haal'áii nahalin, áádóó Éí'ai biláahgo kin yíl'áá nít'éé', índa diné danilíinii t'áá ałtso dahayóí nít'éé'.

³Ákohgo Jerúsalem dine'é aláahgo binanit'a'í Adónai-zíídek wolyéii éí Hííbran kin haal'áádóó aláahgo naat'áanii Hóham wolyéii áádóó Jármath kin haal'áádóó aláahgo naat'áanii Páíram wolyéii áádóó Léíkish kin haal'áádóó aláahgo naat'áanii Jafáíya wolyéii índa Églan kin haal'áádóó aláahgo naat'áanii Dííber wolyéii yich'į' i'iis'a'go kóní,

⁴Hágo shaa nohkáahgo shíká oohjeeh; Gíbiyan kin haal'áii atídadiilnííł, háálá éí Jáshowa índa Ízrel dine'é yił k'é da'ahó'ní.

⁵Éí bąą Ámor dine'é aláahgo bindanit'a'í ashdlalt'éego, éí Jerúsalem dine'é aláahgo binanit'a'í áádóó Hííbran dine'é aláahgo binanit'a'í áádóó Jármath dine'é aláahgo binanit'a'í áádóó Léíkish dine'é aláahgo binanit'a'í índa Églan dine'é aláahgo binanit'a'í, díí t'áá ła' bizhi'ee áłah silį́į́', índa bisiláo t'áá ałtso yił dah diikaigo t'áá dah oonééł nít'éé'; Gíbiyan kin haal'áii yik'iijeehgo anaa' dahasłį́į́'.

⁶Áko Gíbiyan dine'é éí Gílgaldi dah deínééhgóó Jáshowa bich'į' ada'dziis'a'go ádabijiní, Ninaal'a'í niidlį́įgo ádandii'ní t'áadoo na'áhodílziidí; ts'ídá tsį́įłgo nihaa nohkáahgo yisdádanihohnííł. Nihíká oohjeeh, háálá Ámor dine'é aláahgo binanit'a'í danilíinii t'áá ałtso dziłgo nahaz'ánígóó kéédahat'į́įgo áłah daazlį́į'go nihik'iijeeh.

⁷Áko Jáshowa éí Gílgaldóó dashdiiyá; diné anaa' da'ał'íinii t'áá ałtso bił índa diné ayóó át'éego nidaabaahígíí bił dashdiikai.

⁸Áko Bóhólníihii éí Jáshowa áyidííniid, T'áadoo bik'ee nił yé'í, háálá éí nílák'ee dahodíí'ą́ągo doo ł a'da nik'eh didoodleeł da.

⁹Éí bąą Jáshowa éí Gílgaldóó ch'í'ní'eezhgo tł'éé' bíighah jookahgo yiską́, áko t'áadoo kót'é ílíní ana'í bik'ijį' hajizhjéé'.

¹⁰Áko Bóhólníihii éí Ízrel dine'é bidáahgi Ámor dine'é yił hóółąądgo Gíbiyan kin haal'áagi t'óó ahayóí nidadzistseed; t'áá Beth-hóran kin shijaa' bich'į'go honít'i' góde nidi haa adaazhjéé' índa Azííkah kin shijaa' áádóó Makíídah kin haal'áajį' dazníłtseed.

¹¹Áko Ízrel dine'é bits'ąą Ámor dine'é yóó'aheezhjée'go Beth-hóran kin shijaa' góyaa dayíjeehgo Bóhólníihii éí wódahdę́ę́' yik'ijį' nílótsoh Azííkah kin shijaa'jį' ayóó át'éego nayííłtą́ągo nidahastseed; Ízrel dine'é danilíinii diltłish yee nidahastseedígíí biláahdi át'éego nílótsoh yee nahwésdįįd.

¹²Áko Bóhólníihii éí Ámor dine'é danilíinii Ízrel dine' é yeidiní'ą́ bijį́į́dą́ą́' Jáshowa éí Bóhólníihii yich'į' haadzíi'go Ízrel dine'é yinááł ání, Jį́honaa'éí nílíinii, niníltłáago Gíbiyan kin haal'áajį i'dííníłdíín, Índa tł'éhonaa'éí nílíinii, Éíjalan kin haal'áii honíteeljį' i'dííníłdíín.

¹³Áádóó jį́honaa'éí t'ááłáhígi si'ą́ silį́į́' índa tł'éhonaa'éí t'áá ákwe'é si'ą́ silį́į́'; Ízrel dine'é bi'ana'í k'éédeidiidlaajį' ákódzaa. Da' díísh doo Jáshar binaaltsoos biyi' bee ak'e'ashchį́į da? Jį́honaa'éí yá ałníi'gi si'ą́ągo doo hah i'íí'ą́ą da nidi k'asdą́ą́' ła'a jį́ bíighah náá'ásdlį́į'go índa i'íí'ą́.

¹⁴Bóhólníihii éí diné bisodizin yidiizts'ą́'ígíí t'ah bítséedi áádóó bik'ijį' t'ah doo ákóhánéeh da nít'éé', háálá Bóhólníihii éí Ízrel dine'é yá anaa' áhoolaa.

¹⁵Ákohgo Jáshowa nádzáago Ízrel dine'é t'áá a łtso hoł naakaígíí bił Gílgalgi dah da'ínéhígóó níjíkai.

¹⁶Aláahgo naat'áanii ashdlalt'éhígíí adahineezhchą́ą'go Makíídah kin haal'áadi tsé'áán góne' nídadeest'į́į́'.

¹⁷Áádóó Jáshowa bee bił hóóne'go áhodoo'niid, Aláahgo naat'áanii ashdlalt'éego Makíídahdi tsé'áán góne' nídadeest'į́į'go bééhoozin.

¹⁸Áádóó Jáshowa ádííniid, Tsé'áán góne' tsé ayóó ádaníłtsxooígíí bidááh dahididoołmasgo diné aa ádahalyánígíí biniyé nidadoohnił.

¹⁹Nidi t'áadoo t'áá ákwii nidaahkaí; nihida'ana'í bikéé' dohjeehgo bik'i dah shohjeeh; t'áadoo t'óó bikin hadaas'áágóó anáhájeehí, háálá éí Bóhólníihii nihiDiyin God nihílák'ee hodíí'ą́.

²⁰Ákódaadzaago Jáshowa áádóó Ízrel dine'é éí bida'ana'í ałtso nideistseedgo ayóó át'éego nayídeisdįįdgo t'áá ch'éékaígíí t'éí kin hadaas'áii ditą́ągo binaa ahééda'astł'iní góne' yah aheezhjéé'.

²¹Diné t'áá ałtso hasht'ehodít'éego Makíídah kin haal'áagi dah da'ínéhígóó Jáshowa yaa nákai. Ła'í nidi t'áadoo diné ła'da Ízrel dine'é yínííká haadzí'í da.

²²Ákohgo Jáshowa ádííniid, Tsé'áán ąą ádaahłéehgo áádę́ę́' aláahgo naat'áanii ashdlalt'éhígíí shich'į' ninoh'éésh.

²³Áko ákódaadzaago tsé'áándę́ę́' aláahgo naat'áanii ashdlalt'éhígíí deiizh'eezh: éí Jerúsalemdóó aláahgo naat'áanii áádóó Hííbrandóó aláahgo naat'áanii áádóó Jármathdóó aláahgo naat'áanii áádóó Léíkishdóó aláahgo naat'áanii índa Églandóó aláahgo naat'áanii danilį́į́ nít'éé'.

²⁴Áko aláahgo naat'áanii danilíinii Jáshowa yaa deizh'eezhgo Jáshowa éí Ízrel dine'é t'áá ałtso hágo yidííniidgo, áko alą́ąjį' bídahólníihgo hoł anaa' da'ał'ínígíí ábizhdííniid, Hágo, bíighahjį' ninoohkáahgo díí aláahgo naat'áanii dabik'os bik'i dadooł'éés. Áko bíighahjį' nijíkaigo dabik'os bik'i dazdiil'eez.

²⁵Áko Jáshowa áhodííniid, T'áadoo ádił dahonołyé'í; t'áadoo ádił nisidaahkaí; nihidziilgo ída'díí'nółzin áádóó chánah ída'díí'nółzin, háálá Bóhólníihii éí nihi'ana'í t'áá ałtso bił da'ahohgánígíí nihá yik'eh didlį́į dooleeł.

²⁶Áádóó bik'ijį' Jáshowa éí diné atíjiilaago nidzistseed áádóó tsin ashdla'go bąąh dah hizhdiinil. Áko i'íí'ą́ąjį' tsin bąąh dahidéjée'go ájiilaa.

²⁷K' adę́ę e'e'aahgo Jáshowa hach'į' haadzíi'go bik'ehgo éí tsin bąąhdę́ę́' nidahizhdi'yiinilgo tsé'áandi nídadeest'į́'í góne' adadziistł'ííd, áádóó tsé ayóó ádaníłtsxoii bidádazdeeznil. Éí díí jį́įjį' t'ahdii t'áá ákót'é.

²⁸Áko éí bijį́ Jáshowa éí Makíídah kin haal'áii dadzisná áádóó diltłish bee ałtso nidadzistseed; aláahgo binanit'a'í t'áá bił ádadzisdįįd, áko diné t'áá át'é ałtso nidadzistseedgo t'ááłá'í nidi t'áadoo ła' áádadzisįįd da; t'áá Jériko kin haal'áádóó aláahgo naat'áanii ádajiilaa yę́ęgi át'éego Makíídah kin haal'áádóó aláahgo naat'áanii ałdó' ákódajiilaa.

²⁹Áko Jáshowa éí Makíídah hoolyéédę́ę́' Ízrel dine'é t'áá ałtso bił Líbna kin haal'áajį' jíkaigo Líbna kin haal'áii bik'i jiijéé'

³⁰áádóó Bóhólníihii éí Líbna dine'é áádóó aláahgo binanit'a'í Ízrel dine'é yílák'eidíí'ą́ągo atídayiilaa áádóó diltłish yee nideistseed, áko diné t'áá át'é ałtso nideistseedgo t'ááłá'í nidi t'áadoo ła' áádeisįįd da; t'áá Jériko kin haal'áádóó aláahgo naat'áanii ádayiilaa yę́ęgi át'éego díí aláahgo naat'áanii ałdó' ákódayiilaa.

³¹Áko Líbna kin haal'áádę́ę́' Jáshowa dah diiyáago Léíkish kin haal'áajį' Ízrel dine'é t'áá ałtso hoł yíkaigo kin haal'áii biníjíshzhiizh áádóó bik'i jiijéé',

³²áádóó Bóhólníihii éí Léíkish dine'é danilíinii Ízrel dine'é yílák'eidíí'ą́ áádóó naaki jį́ aleeh góne' éí deisnáago diltłish yee nideistseed, áko diné t'áá át'é ałtso nideistseed; Líbna kin haal'áadi ádaadzaaígi ánáádaadzaa.

³³Áko Gíízer kin haal'áádóó aláahgo naat'áanii Hóram wolyéii éí Léíkish dine'é yíká adoolwołgo yiniyé níyá, áko Jáshowa éí Hóram áádóó bidine'é t'áá bił nideistseed; t'ááłá'í nidi t'áadoo ła' áádeisįįd da.

³⁴Áko Léíkish kin haal'áádę́ę́' Jáshowa dah diiyáago Églan kin haal'áajį' Ízrel dine'é t'áá ałtso hoł yíkaigo kin haal'áii biníjíshzhiizh áádóó bik'i jiijéé',

³⁵áko éí bijį́į́dą́ą́' dadzisnáago diltłish bee nidadzistseed, áko éí bijį́į́dą́ą́' diné t'áá át'é ts'ídá ałtso ádadzisdįįd; Léíkish kin haal'áagi ádadziidzaaígi ánáádajíít'įįd.

³⁶Áko Jáshowa éí Églan kin haal'áádę́ę́' dah náádiidzáago Ízrel dine'é t'áá ałtso bił Hííbran kin haal'áajį' jíkaigo éí bik'i jiijéé',

³⁷áádóó éí dadzisnáago aláahgo binanit'a'í áádóó bikin hadaas'áii índa ákwii diné t'áá ałtso diltłish bee nidadzistseed; t'ááłá'í nidi t'áadoo ła' áádadzisįįd da; Églan kin haal'áii ts'ídá ałtso ádadzisdįįdígi át'éego diné t'áá át'é ałtso ádadzisdįįd.

³⁸Ákohgo Jáshowa éí Ízrel dine'é t'áá ałtso bił Dííber kin haal'áajį' jíkaigo éí bik'i jiijéé',

³⁹áádóó bik'eh dazdeesdlį́į́' áádóó aláahgo binanit'a'í índa bikin hadaas'áhígíí ałtso dadzisná, áádóó diltłish bee nidadzistseed índa ákwii diné t'áá át'é ts'ídá ałtso ádadzisdįįd; t'ááłá'í nidi t'áadoo ła' áádadzisįįd da; Hííbran kin haal'áagi áádóó Líbna kin haal'áádóó aláahgo naat'áanii t'áá bił ádajiilaa yę́ęgi át'éego Dííber kin haal'áádóó aláahgo naat'áanii t'áá bił ákónáádajiidlaa.

⁴⁰Ákohgo Jáshowa éí kéyah t'áá át'éé nít'éé'; dah daask'idígóó áádóó shádi'ááhjí kéyahígíí áádóó dadzígaigóó áádóó dziłtsį́į́góó índa aláahgo bindanit'a'í t'áá ałtso bik'eh dazdeesdlį́į́'; t'ááłá'í nidi t'áadoo ła' áádadzisįįd da; dahináanii nidi ts'ídá t'áá át'é ałtso ádadzisdįįd. Ízrel dine'é biBóhólníihii Diyin God ádííniidii bik'eh dahojííł'įįd.

⁴¹Áko Kéídesh-barníya kin haal'áádóó Géíza kin haal'áajį' Jáshowa hadine'é bił ak'eh dazdeesdlį́į́', índa Góshen kéyahgóó t'áá át'é; t'áá Gíbiyan kin haal'áajį' nidi t'áá át'é ak'eh dazdeesdlį́į́'.

⁴²Áko díí aláahgo naat'áanii danilíinii áádóó bikédaayah t'ááłáhídiígíí Jáshowa bik'eh dazdeesdlį́į́', háálá Ízrel dine'é biBóhólníihii Diyin God nilíinii Ízrel dine'é yá anaa' áhoolaa.

⁴³Ákohgo Jáshowa éí Ízrel dine'é t'áá ałtso Gílgalgi dah oonéłíjį' bił níjíkai.