Read Navajo JOSHUA 13 Bible Online

JOSHUA 13 - Navajo bible

JOSHUA 13

¹Íídą́ą́' Jáshowa lą'í binááhaigo bi'niitihgo, áko Bóhólníihii ábidííniid, T'áá íiyisí hasínítih áádóó t'óó ahayóí ninááhai, ákondi kéyah íí' dadooleełii lą'í daadziih.

²Díí kéyah t'ah daadziih: éí Filístiya dine'é bikéyah t'áá át'é áádóó Gíísher dine'é bikéyah t'áá át'é

³éí Ííjip kéyah ha'a'aahjígo Sháíhar haz'ánídóó, náhookǫs bich'į'go Ékran kéyah hoodzojį'; éí Kéínan dine'é bígo baa nitsáhákees, áádóó Filístiya dine'é aláahgo binanit'a'í ashdlalt'éego bikédaayah, éí Géíza dine'é, Áshdad dine'é, Áshkelan dine'é, Gath dine'é índa Ékran dine'é aláahgo binanit'a'í danilíinii bikédaayah, áádóó Éívim dine'é bikéyah náhásdzooígíí ałdó'

⁴shádi'áahjigo Kéínan dine'é bikéyah t'áá át'é, áádóó Mii'éírah hoolyéhígíí éí Sáídan dine'é daabíhígíí, Éífekgóó Ámor dine'é bikéyah hoodzojį'

⁵áádóó Gííbal dine'é bikéyah áádóó Dził Lébanan ní'áhígíí t'áá át'é, ha'a'aah bich'į'go Dził Hérman bitsį́įgi Béíyal-géed kin shijaa' áádóó Héímathjį' ahóót'i'ígíí bíighahgo.

⁶Dził Lébanan si'ánídóó kéyah aghá dahaz'áágóó kéédahat'íinii t'áá ałtso Mísrefath-méíyim kin shijaa'jį' éí t'áá át'é Sáídan dine'é t'ah daadziih. Ízrel dine'é danilíinii bilą́ąjį' éí t'áá ałtso ch'ídínéeshkał, ákondi Ízrel dine'é éí kéyah bíí' dadooleeł biniyé nich'į' bee haasdzí'ígi át'éego bá ałts'ádadíízo.

⁷Éí bąą k'ad díí kéyah bíí' dadooleeł biniyé náhást'éiigo dadine'é índa Manáseh dine'é ałníí'dóóígíí bá ał ts'ádadíízo.

⁸Rúben dine'é áádóó Géed dine'é índa Manáseh dine'é ałníí'dóóígíí kéyah yił bíí' daazlį́į'go éí Mózes beidiní'ą́; Jórdan tooh wónaanídi ha'a'aahjigo Mózes éí Bóhólníihii yá naal'a'í nilį́įgo haidiní'áanii hóó' daazlį́į́'.

⁹Árnan tooh bibąąhgóó Aró'er kin haal'áádóó áádóó yíldzis ałníi'gi kin haal'áádóó áádóó Médiiba dzígaigóó t'áá át'é Dáíban bíighahjį',

¹⁰áádóó Ámor dine'é aláahgo binanit'a'í Sáíhan éí Héshbangi aláahgo naat'áanii bikin hadaas'áii t'áá át'é yinant'áá nít'éé' yę́ę, Áman dine'é bihoodzo bíighahjį' hóó' daazlį́į́',

¹¹áádóó Gíliyad kéyah áádóó Gíísher dine'é áádóó Méíyakah dine'é bikéyah áádóó Dził Hérman t'áá át'é, áádóó Béíshan kéyahgóó t'áá át'é Sálkah kin haal'áajį' hóó' daazlį́į́'.

¹²Béíshan kéyahgi Ag aláahgo bee bóhólníhígíí t'áá át'é éí Áshtarath kin haal'áagi áádóó Édriyai kin haal'áagi aláahgo naat'áanii nilį́į́ nít'éé' yę́ę, t'áá bí t'éiyá yé'iitsoh daadzí'ígíí nilį́į́ nít'éé'; díí Mózes hak' eh deesdlį́į'go ch'íhoniiskaad.

¹³Nidi Ízrel dine'é éí Gíísher dine'é índa Méíyakah dine'é t'áadoo baa ch'ídahaazhjée' da, nidi dííshjį́įjį' Gíísher dine'é índa Méíyakah dine'é éí Ízrel dine'é yitahgóó kéédahat'į́.

¹⁴Líívai dine'é bíí' dooleełii Mózes t'áadoo beidiní'ą́ą da, Bóhólníihii Ízrel dine'é biBóhólníihii Diyin God bich'į' didlidgo náádahaniihii t'éí bíí' dadooleeł át'é; t'áá ákót'éego yee áyidííniid ni'.

¹⁵Áko Rúben dine'é da'ahílchíihii ahii' háá'ahiyoolchíłígíí bik'ehgo kéyah íí' dooígíí Mózes beidiní'ą́.

¹⁶Áádóó éí bikéyah Árnan tooh bibąąhgóó Aró'er kin haal'áádóó áádóó yíldzis ałníi'gi kin haal'áádóó índa Médiiba dzígaigóó t'áá át'é,

¹⁷Héshban kin haal'áii áádóó dzígaigi kin hadaas'áhígíí t'áá bił, éí Dáíban áádóó Béímath-béíyal áádóó Beth-béíyal-míyan dahoolyéhígíí,

¹⁸áádóó Jahéíza áádóó Kíídemath áádóó Méfeiyath

¹⁹áádóó Kíriyathéíyim áádóó Síbmah índa yíldzisgi yanáalk'idígíí bighą́ą'gi Záreth-shéíhar kin hadaas'áii

²⁰áádóó Beth-píyor áádóó Áshdath-pízgah índa Beth-jéshimath dahoolyéhígíí

²¹áádóó t'áá át'é dadzígaidi kin hadaas'áii áádóó Ámor dine'é aláahgo binanit'a'í Sáíhan éí Héshban kin haal'áagi aláahgo naat'áanii bee bóhólnííh nít'éé' yę́ę t'áá át'é, éí Mídiyan dine'é binanit'a'í danilíinii éí Íívai áádóó Rííkem áádóó Zer áádóó Her índa Rííba daolyéii, Sáíhan yá naat'áanii danilį́į́ nít'éé'; éí Mózes hak'eh deesdlį́į́'.

²²Bíyor biye' Béílam ałdó' éí náásgóó áhodoonííł yaa halne'ii áhodil'íinii ałdó' t'áá yił diltłish bee ayóó át'éego Ízrel dine'é ádahasdįįd.

²³Áádóó Rúben dine'é bikéyah éí Jórdan tooh bihoodzo nít'éé'. Díí kéyah Rúben dine'é ahii' háá'ahiyoolchííłgóó ákwii kin hadaas'áii áádóó kin dah naazhjaa'ígíí t'áá bił bíí' át'é.

²⁴Áádóó Géed dine'é ałdó' kéyah íí' dadooleełii Mózes beidiní'ą́; éí Géed dine'é ahii' háá'ahiyoolchíiłii bik'ehgo baa deet'ą́.

²⁵Dabikéyahígíí éí Jéízer kin haal'áádóó áádóó Gíliyad kéyahdóó kin hadaas'áii t'áá ałtso áádóó Áman dine'é bikéyah ałníí'dóó Rábah kin haal'áii ha'a'aahjígo Aró'er kin haal'áajį' baa deet'ą́.

²⁶Áádóó Héshban kin haal'áádóó Réímath-mízpah kin haal'áajį' áádóó Bétonim kin haal'áajį' índa Meihanéíyim kin haal'áádóó Dííbir kin haal'áii bikéyahjį',

²⁷áádóó yíldzisgóó Beth-éíram kin shijaa'ígíí, Beth-nímrah kin haal'áii, Sákath kin shijaa'ígíí áádóó Zéífan kéyahígíí áádóó Héshban kin haal'áii aláahgo binanit'a'í Sáíhan wolyéii bee bóhólnííh nít'éé' yę́ę łahjį' yidziihígíí, éí Jórdan tooh bee hoodzooígíí, Kíniireth tó siyíníjį' nihoodzo áádóó ha'a'aahjigo t'áá át'é baa hodeet'ą́.

²⁸Díí kéyahígíí Géed dine'é ahii' háá'ahiyoolchííłgóó bik'ehgo ákwii kin hadaas'áii índa kin naazhjaa'ígíí t'áá bił bíí' át'é.

²⁹Áádóó Manáseh dine'é ałníí'dóóígíí éí kéyah íí' dadooleełii Mózes beidiní'ą́; éí Manáseh dine'é ałníí'dóóígíí ahii' háá'ahiyoolchíłígíí bik'ehgo bá ałts'áádzo.

³⁰Éí bikéyahígíí Meihanéíyim kin shijaa'dóó, Béíshan kéyahgóó t'áá át'é, Béíshan dine'é aláahgo binanit'a'í Ag wolyéii bee bóhólnííh nít'éé' yę́ę t'áá át'é, áádóó Jéíyer wolyéii bikin naazhjaa'ígíí t'áá ałtso, éí Béíshan kéyahgi hastą́diingo kin hadaas'áii,

³¹áádóó Gíliyad kéyah ałníí'dóóígíí índa Béíshan dine'é aláahgo binanit'a'í Ag wolyéii bee bóhólnííh nít'éé' yę́ę biyi' Áshtarath áádóó Édriyai kin hadaas'áii, díí éí Manáseh biye' Méíkir bidine'é ałníí'dóóígíí ahii' háá'ahiyoolchíłígíí bik'ehgo bá ałts' ádaasdzo.

³²Díí kéyah íí' dooleeł biniyé Jórdan tooh wónaanídi Jériko ha'a'aahjigo Mó'ab dzígaigóó Mózes hataideez'ą́.

³³Nidi Líívai dine'é bíí' dooleełii Mózes t'áadoo beidiní'ą́ą da; Ízrel dine'é biBóhólníihii Diyin God éí bíí' dooleełii bá jílį́, t'áá ákót'éego yee áyidííniid ni'.