Read Navajo JOSHUA 14 Bible Online

JOSHUA 14 - Navajo bible

JOSHUA 14

¹Áádóó Kéínan kéyah biyi' díí kédaayah Ízrel dine'é bíí' daazlį́į́'; Eliyéízar náá'iiłniihii nilíinii áádóó Nan biye' Jáshowa índa Ízrel dadine'é yá aląąjį' naazíinii éí kéyah bíí' dadooleełígíí baa dahideest'ą́.

²Yáá'iilt'e' bik'ehgo íí' dooleełii bíí' daazlį́į́'; Bóhólníihii éí Mózes binahjį' yee haadzíi'ii bik'ehgo ádzaa; jó, Ízrel dine'é náhást'éídóó náá'áłníi'goígíí kéyah baa dahideest'ą́.

³Háálá Ízrel dine'é naakigo dah yikahígíí áádóó Manáseh náá'áłníi'goígíí éí Jórdan tooh wónaanídi kéyah íí' dooleełii Mózes beidiní'ą́, nidi éí bitahgi Líívai dine'é éí kéyah íí' dooleełii t'áadoo ła' yeidiní'ą́ą da.

⁴Háálá Jóseph dine'é naakigo dah yikahígíí éí Manáseh áádóó Íífreiyim dine'é ádaat'į́; éí bąą Líívai dine'é éí kéyah íí' dooleełígíí t'áadoo ła' yaa deideez'ą́ą da, nidi kin hadaas'áii yii' kéédahat'į́į dooígíí t'éiyá; ákwii kéyah dahootsooígíí t'áá bił éí dabilį́į́' bá índa ákwii bee dahólónígíí bá nahaz'ą́.

⁵Bóhólníihii éí Mózes yich'į' haadzí'ígi át'éego Ízrel dine'é ákóda'iilaago kéyah bíí' dadooleełii ałts'áda'deesdzo.

⁶Áko Júdah dine'é éí Gílgalgi Jáshowa yaa yíkai áádóó Jiifáneh éí Kíínez dine'é nilínígíí biye' Kéíleb éí Jáshowa áyidííniid, Nił bééhózingo, Bóhólníihii Diyin God bits'ą́ą́dóó diné jílíinii Mózes áyidííniidígíí, éí shí índa ni ałdó' ádínihídéélt'i'go Kéídesh-barníyadi kódííniid ni'.

⁷Dízdiin shinááhaigo Mózes éí Bóhólníihii yá naal'a'í nilíinii Kéídesh-barníyadóó naalchi'í nishłį́įgo kéyah hadeesił biniyé ch'íshiníł'a' yę́ędą́ą́', saadígíí shijéí biyi'di baa ákoniizį́'ígíí bee bił náhweeshne'.

⁸Nidi shik'isóó danilíinii shił naaskaígíí éí diné bijéí nitsideistłahgo t'óó yił dahóółhéé', nidi shí éí t'áá sézį́į́ nít'éé' Bóhólníihii shiDiyin God bikéé' yishááł nít'éé'.

⁹Áádóó éí bijį́į́dą́ą́' Mózes ádee hadoodzíi'go ání, T'áá aaníí kéyah bikáá' nisíníyáhígíí ni áádóó na'áłchíní bi ł éí kéyah íí' dooleełii danihíi'go ahool'áa doo, háálá t'áá sínízį́į́ nít'éé' Bóhólníihii shiDiyin God bikéé' yínááł nít'éé'.

¹⁰Áko k'ad, shoo, Bóhólníihii hinishnáago áshósin, t'áá ádííniidígi át'éego, dízdiindóó ba'aan ashdla' nááhaijį' Bóhólníihii díí saad yee Mózes yich'į' haadzíi'ii bee Ízrel dine'é honoojíidi naaldeeh yę́ędą́ą́' hinishnáago áshósingo hoolzhiizh, áko k'ad, shoo, díí jį́ tseebídiindóó ba'aan ashdla' shinááhai.

¹¹Azhą́ ákót'ée nidi díí jį́į́góó t'ahdii ayóó ásóodziil; Mózes dah shidiił'a'go shíyoołkááł yę́ędą́ą́' ásóodziil yę́ę t'ahdii t'áá ákót'é; anaa' bich'į' áádóó t'áá shí hinishnánígíí t'ahdii bidziilgo hidishááh índa nináháshdááh.

¹²Éí bąą k'ad díí dziłgo haz'ánígíí shaa diní'aah; jó, łah Bóhólníihii t'áá ákót'éego yee haadzíi' ni'; jó, éí bijį́į́dą́ą́' ákwii Éínak dine'é kéédahat'į́į́ nít'éé' áádóó ayóó át'é kin hadaas'á ditą́ągo binaa ahééda'astł'ingo baa dahodisíníts'ą́ą́', áko Bóhólníihii shił hólǫ́ǫgo éí ałtso shaa ch'íhidoojah; jó, Bóhólníihii ákódííniid ni'.

¹³Ákohgo Jáshowa hak'ijisdli'go Jiifáneh biye' Kéíleb éí Hííbran dine'é bikéyah hóó' dooleeł biniyé haidiní'ą́.

¹⁴Éí bąą Hííbran kéyah éí Jiifáneh éí Kíínez dine'é nilínígíí biye' Kéíleb bí dooleełígíí yeidiní'ą́, háálá t'áá dzizį́į́ nít'éé' Ízrel dine'é biBóhólníihii Diyin God bikéé' joogááł nít'éé'.

¹⁵Éí bítséédą́ą́' Hííbran hoolyéhígi Kírjath-árba hoolyéé nít'éé'. Éínak dine'é bitahgi díí diné Árba wolyéii ayóó át'éii nilį́į́ nít'éé'. Ákohgo éí kéyahgi anaa' doo hólǫ́ǫ́góó hasht'ehodít'éé nít'éé'.