Read Navajo JOSHUA 17 Bible Online

JOSHUA 17 - Navajo bible

JOSHUA 17

¹Áko yáá'iilt'e' bik'ehgo Manáseh dine'é éí kéyah ła' bá haadzo, háálá éí Jóseph alą́ąjį' bá yizhchį́, Méíkir éí Manáseh alą́ąjį' bá yizhchį́; éí Gíliyad dine'é bizhé'é jílį́; jó, diné naabaahii jílį́įgo bąą Gíliyad áádóó Béíshan kéyahígíí há haadzo.

²Áádóó yáá'iilt'e' bik'ehgo Manáseh dine'é łahjį'ígíí ahii' háá'ahiyoolchíiłii bik'ehgo kéyah bá haadzo; éí Éíbiyíízer dine'é, Híílek dine'é, Ásriyel dine'é, Shííkem dine'é, Híífer dine'é índa Shiimáída dine'é; díí éí Jóseph biye' Manáseh wolyéii ba'áłchíní ahii' háá'ahiyoolchíiłii ádaat'į́.

³Ákondi Ziilófehad éí Híífer biye' át'é, éí Gíliyad biye' át'é, éí Méíkir biye' át'é, éí Manáseh biye' át'é, áko Ziilófehad éí biye'ké ádin, nidi bitsi'ké t'éí hólǫ́; díí bitsi'ké kódaolyé: Mála, Nóah, Hágla, Mílka índa Tírza.

⁴Éí náá'iiłniihii Eliyéízar áádóó Nan biye' Jáshowa áádóó naat'áanii danilíinii yaa yíkaigo ádayidííniid, Nihik'éí bitahgi kéyah nihíí' dadooleełii nihaa dadidoot'áałgo Bóhólníihii éí Mózes yich'į' yee haadzíi' ni'. Éí bąą Bóhólníihii yee haadzíi'ii bik'ehgo bizhé'é bik'isóó nilíinii bitahgi kéyah bíí' dooleełii beidiní'ą́.

⁵Áko neeznáá hahoodzo Manáseh dine'é baa deet'ą́, áádóó Jórdan tooh bilááhjí Gíliyad kéyah áádóó Béíshan kéyah ałdó' bił baa deet'ą́,

⁶háálá Manáseh dine'é bitsi'ké danilíinii ła' éí Manáseh ba'áłchíní ahoolchíiłii bił kéyah bíí' daazlį́į́'. Manáseh dine'é łahjį'ígíí éí Gíliyad kéyah baa deet'ą́.

⁷Manáseh dine'é bikéyah hoodzooígíí éí Ásher dine'é bikéyahdóó Míkmiitha haz'áníjį', éí Shííkem kin haal'áii bíighahgi áádóó shádi'áahjigo Entapúwah tó háálínígi kéédahat'íníjį' bihodiidzo.

⁸Manáseh dine'é bikéyah éí Tapúwah hoolyé índa Manáseh dine'é bihoodzogi Tapúwah kin shijaa'ígíí éí Íífreiyim dine'é daabí.

⁹Áko Kéína tó nílínígíí shádi'áahjigo haz'áníjį' hodeesdzo. Ákwii Manáseh dine'é bikin hadaas'áhígíí bitahgi Íífreiyim dine' é ałdó' bikin hadaas'á. Áko Manáseh dine'é bihoodzooígíí náhookǫsjigo tó nílíníjį' hodeesdzo áádóó tónteel siyíníjį' nihoodzo,

¹⁰shádi'áahjigo Íífreiyim dine'é bikéyah si'ánígíí, índa náhookǫsjigo Manáseh dine'é bikéyah si'ánígíí, éí tónteel bee hodeesdzo, índa náhookǫsjí Ásher dine'é bikéyahjį' áádóó ha'a'aahjigo Ísakar dine'é bikéyahjį' hodeesdzo.

¹¹Áádóó Ísakar dine'é bikéyah bikáá' índa Ásher dine'é bikéyah bikáá' ałdó' Manáseh dine'é bikin ła' hadaas'á; éí Beth-shíyan kin haal'áii áádóó bikin dah naazhjaa'ígíí, Íbliyam kin haal'áii áádóó bikin dah naazhjaa'ígíí, Dóor kin haal'áii ákwii kéédahat'íinii áádóó bikin dah naazhjaa'ígíí, Éndor kin haal'áii ákwii kéédahat'íinii áádóó bikin dah naazhjaa'ígíí, Téíyanak kin haal'áii ákwii kéédahat'íinii áádóó bikin dah naazhjaa'ígíí índa Megído kin haal'áii ákwii kéédahat'íinii áádóó bikin dah naazhjaa'ígíí t'áá daabił; éí táa'go kéyahígíí bikáá' ákóhoot'é.

¹²Ákondi Manáseh dine'é éí kin hadaas'áagi kéédahat'ínígíí haa ch'ídahidoojahígíí doo bídazhneel'ą́ą da, nidi éí kéyah biyi' Kéínan dine'é t'áá kéédahat'į́į́ nít'éé'.

¹³Azhą́ ákót'ée nidi Ízrel dine'é dabidziil daazlį́į'go Kéínan dine'é t'áá bizááká nidaalnishgo ádayiilaa, áádóó t'áadoo ts'ídá t'áá át'é baa ch'ídahaazhjée' da.

¹⁴Áádóó Jóseph dine'é Jáshowa yich'į' hadaasdzíi'go ádeidííniid, Ha'át'éegoshą' t'óó ahonii'yóí nidi t'ááłáhídi yáá'iilt'e'ígíí bik'ehgo kéyah t'ááłá'í haadzo nihíí' dooleełgo Bóhólníihii éí áłchíní yee nihik'ijoodliiłgo yiidląąłgoósh t'áá ákódígo nihaa dííní'ą́.

¹⁵Áko Jáshowa áhodííniid, T'óó ahonohyóigo kéyah bikáa'gi tsin deíl'áágóó dadohnéehgo t'áá nihí ádá daahtsxeełgo Píírez dine'é áádóó yé'iitsoh bikéyahgi hasht'edadohnééh; Dził Íífreiyim hadaaz'áhígi doo nihidahóóghahgóogo ákódaahnééh.

¹⁶Jóseph dine'é ádadííniid, Díí dah daask'idígi yee' doo nihidahóóghah da, áádóó dzígaigi Kéínan dine'é t'áá ałtso kéédahat'ínígíí tsindaabąąs bijáád naakiígíí béésh bee ádaalyaii bee dahólǫ́; éí t'áá ałch'ishjí Beth-shíyan kin haal'áagi áádóó bikin dah naazhjaa'ígíí índa Jézriyel kin haal'á yíldzisgi kéédahat'į́įgo ádaat'į́.

¹⁷Áko Jáshowa éí Jóseph ba'áłchíní ahoolchíiłii, éí Íífreiyim dine'é áádóó Manáseh dine'é danilį́įgo áyidííniid, Nihí t'óó ahonohyóí áádóó ayóó át'éego bee adziilii nihee dahólǫ́; doo t'ááłá'í yáá'iilt'e' t'éiyá bíighahgo kéyah nihíí' dadooleeł da,

¹⁸nidi díí dziłgo nahaz'ánígíí nihíí' dadooleeł; jó, tsin yíl'á, áádóó dah hidoohtsxiłgo bee hasht'edadidoohnííł, áádóó biláahdi hoodzooígíí bíighahgo ts'ídá t'áá át'é nihíí' dooleeł, háálá Kéínan dine'é nihaa ch'ídahidoojah; azhą́ tsindaabąąs bijáád naakiígíí béésh bee ádaalyaii bee dahólǫ́ǫ nidi áádóó dabidziil nidi ákódadoohłííł.