Read Navajo JOSHUA 18 Bible Online

JOSHUA 18 - Navajo bible

JOSHUA 18

¹Áko Ízrel dine'é t'áá át'é Sháílohgi áłah silį́į'go ákwii níbaal bii' dahozdísinii nideiz'ą́. Ízrel dine'é éí kéyahgi kéédahat'íinii t'áá ałtso yik'eh dadeesdlį́į́'.

²Nidi Ízrel dine'é bitahgi Ízrel t'áá bí bidine'é tsosts'idgo dah yinééł kéyah bíí' dooleełii t'ah doo baa deet'aah da.

³Áko Jáshowa éí Ízrel dine'é áyidííniid, Haa nízádígishą' nida'áhodołziidgo kéyah íí' dooleełii bich'į' wohnééł? Éí danihizhé'é yę́ę biBóhólníihii Diyin God nihaidiní'ą́ą́ nít'éé'.

⁴Dadine'ígíí bitahdóó diné táá' níjaa'go nídoohnííł, áko éí dadeesh'aałgo ákǫ́ǫ́ dadookah áádóó kéyah t'áá át'é hazhó'ó hadeidoosił biniyé tádidookah índa kéyah bíí' dadooleełii át'éhígíí yee ak'eda'doołchííł áádóó índa shaa nínáádookah.

⁵Áko éí kéyah tsosts'idgo ałts'ádadoodzo; shádi'ááhjígoígíí Júdah dine'é bikéyahígíí t'áá yii' kéédahat'į́į doo áádóó náhookǫsjígoígíí éí Jóseph ba'áłchíní náás ahoolchíiłii dabikéyahígíí t'áá yii' kéédahat'į́į doo.

⁶Áádóó kéyah tsosts'idgo ałts'ádaasdzooígíí át'éhígíí bee ak'eda'doołchííł, áádóó éí shich'į' ííshjání ádadoohłííł, áko índa kéyah háidíígíí bíí' dadooleeł biniyé yáá'iilt'e' bik'ehgo Bóhólníihii nihiDiyin God binááł nihá ádeeshłííł.

⁷Nihitahgóó Líívai dine'é bíí' dooleełii doo ła' baa deet'ą́ą da, háálá Bóhólníihii bá náá'iiłniihii ídlínígíí éí íí' dooleełii át'é áádóó Géed dine'é áádóó Rúben dine'é índa Manáseh dine'é ałníí'dóóígíí Jórdan tooh wónaanídi ha'a'aahjígo kéyah bíí' dadooleełii nídahodii'ą́. Mózes éí Bóhólníihii yá naal'a'í nilíinii beidiní'ą́.

⁸Áko diné hasht'e'ádadiilyaa áádóó dah diikáahgo Jáshowa hazhó'ó ábidííniidgo kéyah bééhózínígo ádeidoolíłígóó dah diikáahgo ííłní, Nihílááh, kéyah t'áá át'é bii' tádidoohkah, áádóó éí át'éhígíí bee ak'eda'doołchííł, índa shaa nínáádoohkah, áko yáá'iilt'e'ígíí nihá ádeeshłíiłgo bik'ehgo kéyah háidíígíí nihíí' dadooleełii Bóhólníihii binááł Sháílohgi nihá hasht'edeeshłííł.

⁹Áko diné ákǫ́ǫ́ eekaigo kéyah t'áá át'é yii' tádookai áádóó kéyah tsosts'idgo ałts'ádaasdzooígíí biyi' kin dah naazhjaa'ígíí bik'ehgo át'éhígíí naaltsoos bikáá' ádajiilaa, áko dah da'ínéhígóó dah nízhdiikaigo Sháílohgi Jáshowa baa níjíkai,

¹⁰áádóó Jáshowa éí yáá'iilt'e' ádajiilaago Ízrel dine'é bá Sháílohgi Bóhólníihii binááł baa nijiiyá; ákwii Jáshowa éí Ízrel dine'é kéyah baa dahideest'ánígíí bik'ehgo bá ałts'ádadzizo.

¹¹Áádóó yáá'iilt'e' bik'ehgo Bénjamin dine'é ahii' háá'ahiyoolchíiłii bik' ehgo bikéyah bééhoozin; nít'éé' Júdah dine'é bikéyah áádóó Jóseph dine'é bikéyah bita' gónaa kéyah haadzooígíí bíí' daazlį́į́'.

¹²Náhookǫsjígo bihoodzooígíí Jórdan toohdóó hodeesdzo; éí hoodzooígíí Jériko kin haal'áii bíighah góde náhookǫsjí hodeesdzo áádóó dziłgo nahaz'ání góde e'e'aahjigo hodeesdzo áádóó Beth-éíven honoojíijį' hodeesdzo,

¹³áádóó shádi'áahjigo Luz kin haal'áii bich'į'go t'áá éí Luz kin haal'áhígíí bíighahgóó hodeesdzo; éí kin haal'áhígíí Béthel ałdó' hoolyé, áádóó Átarath-éídar kin haal'áá góyaa éí Beth-hóran kin shijaa' wóyahdiígíí shádi'ááhjígo dziłígíí bíighahgóó hodeesdzo.

¹⁴Áádóó náánáłahjigo nááhodeesdzo, éí e'e'aahjígoígíí shádi'ááhjígo Beth-hóran kin shijaa' binaashii shádi'ááhjí dził si'ánídóó naanáhásdzo áádóó Kírjath-béíyal kin haal'áajį' nihoodzo; éí Kírjath-jíyarim ałdó' hoolyéego kin haal'áhígíí Júdah dine'é daabí. Díí e'e'aahjígo hodeesdzo.

¹⁵Áádóó shádi'áahjigoígíí éí Kírjath-jíyarim bíighahdóó hanááhoodzo, éí e'e'aahdóó Neftówah tó hadaazlį́įjį' hodeesdzo,

¹⁶áádóó éí hoodzooígíí yé'iitsoh biyíldzis náhookǫsjígo nineel'ánídi Hínam biye' biyíldzisígíí binaashii dziłígíí bitsį́įjį' hoodzo, áádóó Hínam biyíldzis góyaa índa Jííbas dine'é bikéyah bíighahgóó shádi'ááhjí áádóó Enrógel tó háálíní góyaa hodeesdzo.

¹⁷Áko náhookǫsjigo Enshíímesh tó háálį́į́góó nááhodeesdzo, éí áádóó Geláílath haz'ánígóó Adámim báhátis áádóó Rúben biye' Bóhan bitsé si'ání góyaa hodeesdzo,

¹⁸áádóó Beth-áraba kin shijaa' bíighahgóó náhookǫsjí Áraba dzígai góyaa hodeesdzo,

¹⁹áko Beth-hágla haz'ání bíighahgóó náhookǫsjí ch'ínááhoodzo áádóó Tónteel Dók'ǫ́ǫzhii náhookǫsjí táłts'á hiníyínígi nihoodzo; éí shádi'ááhjígo Jórdan tooh nílínígíí nineel'ą́; díí éí shádi'ááhjígo hodeesdzo.

²⁰Ha'a'aahjígo hoodzooígíí éí Jórdan tooh bee hodeesdzo. Díí Bénjamin dine'é ahii' háá'ahiyoolchíiłii bik'ehgo kéyah bíí' dadooleełii bináhásdzo.

²¹Bénjamin dine'é ahii' háá'ahiyoolchíiłii bik'ehgo dabikin hadaas'áhígíí éí kódahoolyé: Jériko, Beth-hágla, Kííziz yíldzisii,

²²Beth-áraba, Zemaréíyim, Béthel,

²³Éívim, Péírah, Áfrah,

²⁴Kíífar-ha'ámonai, Áfnai índa Géíba; bikin dah naazhjaa'ígíí t'áá bił naakits'áadahgo kin hadaas'áhígíí Bénjamin dine'é bíí' daazlį́į́'.

²⁵Áádóó Gíbiyan, Réímah, Biyérath,

²⁶Mízpeh, Kiifáírah, Mózah,

²⁷Rííkem, Érpaiyel, Táralah,

²⁸Zíílah, Íílef, Jííbas, t'áá éí Jerúsalem hoolyé, Gíbiyath índa Kírjath; kin dah naazhjaa'ígíí t'áá bił dį́į́'ts'áadahgo kin hadaas'áhígíí Bénjamin dine'é bíí' daazlį́į́'. Díí kéyah t'áá át'é Bénjamin dine'é ahii' háá'ahiyoolchíiłii bik'ehgo bíí' daazlį́į́'.