Read Navajo JOSHUA 2 Bible Online

JOSHUA 2 - Navajo bible

JOSHUA 2

¹Áádóó Nan biye' Jáshowa éí Shíttim hoolyéédóó diné naalchi'í nidilt'éego dashdiił'a'go ábijiní, Nihílááh, nahont'in nahaz'ą́ą́dóó Jériko kéyah hazhó'ó hadoohsiłgóó doh'aash. Áádóó ákǫ́ǫ́ jiní'áazhgo ałjiłnii asdzání léi' Réíhab wolyéii bighan góne' yah ajíí'áazhgo ákwii dzizkéé nít'éé'.

²Áádóó Jérikodóó aláahgo naat'áanii yił dahoolne'go ádaaní, Shoo, tł'éédą́ą́' diné ła' Ízrel dine'é nilį́įgo kéyah haidoohsił yiniyé kwe'é ní'áázh lá.

³Áádóó Jérikodóó aláahgo naat'áanii éí Réíhab yich'į' i'ííł'a'go ání, Diné naa ní'ázhígíí shaa ní'éésh; jó, nighan góne' yah íí'áázh, háálá éí kéyah t'áá át'é haidoosił yiniyé ní'áázh.

⁴Áádóó asdzání éí diné t'áá áłah dah yidii'eezh áádóó néidees'į́į'go ání, T'áá lá aaníí diné shaa ní'áazh ni, nidi naa'aashdę́'ígíí éí doo shił bééhózin da.

⁵Áádóó tł'ée'go ch'é'étiingi dá'deelkaalgo éí diné ch'íní'áázh lá. Háajigo ahi'noolchą́'ígíí doo shił bééhózin da. Tsxį́įłgo, bikéé' dohjeehgo bik'ídanohtááh.

⁶Nidi asdzání éí kin bighą́ą́'góó diné hajizh'eezhgo nidik'ą' dits'idígíí éí biyaagi nízdees'į́į́'.

⁷Áko diné akéé' ííjé'ígíí Jórdan tooh áłt'ą́'ą́jį' tsé'naa nideetiiníjį' akéé' niníjéé', áádóó éí diné t'óó ch'íníjé'égo t'áá áko dání'deetą́.

⁸Áko diné nídees'į́'ígíí t'ah doo niteeshgóó, asdzání éí kin bighą́ą́'góó diné yich'į' hanáánásdzá.

⁹Áádóó diné ábijiní, Díí shił bééhózin: Bóhólníihii éí kéyah nihaididoo'ááł áádóó nihik'eda'íyée'go bik'ee nisiniikai, áádóó kéyah bikáa'gi diné kéédahat'ínígíí t'áá át'é nihik'ee bitah doo dahwiina' da.

¹⁰Háálá nihaa dahosidiits'ą́ą'go haash yit'éego Bóhólníihii éí Tónteel Łichíí' tsé'naa nihilą́ąjį' nihá nihoníłtseii éí Ííjip kéyahdę́ę́' náoh'nééł yę́ędą́ą́' áhóót'įįdígíí áádóó Ámor dine'é aláahgo binanit'a'í nidilt'éego Jórdan tooh wónaanídi bich'į' ádaot'įįdígíí éí Sáíhan índa Ag wolyéii nidasoołtseedii baa dahosidiits'ą́ą́'.

¹¹Áádóó t'óó baa dahodisiits'ą́ą́' yę́ędą́ą́' t'óó nihił ádahasdįįd; t'áadoo yee diné hada'óolní'ígóó nihiniinaa ákódeiidzaa, háálá Bóhólníihii éí nihí aají nihiDiyin God éí Diyin God nilį́įgo wódahdi yá'ąąshdi índa wóyahdi nihokáa'gi hólǫ́.

¹²Éí bąą k'ad nánihooshkąąh, Bóhólníihii bee shich'į' ádee hadidoohdzih; jó, shí nihaa jooshba'ígi át'éego nihí ałdó' shizhé'é bighandóó dah ooldahígíí baa jiinohba' dooleeł, áádóó t'áá aaníinii bee ééhózinii shich'į' bééhózingo ádoohłííł,

¹³shizhé'é áádóó shimá áádóó ashiiké áádóó at'ééké bił háájéé' danilíinii, índa bada'áłchíní t'áá ałtso t'áá bił dahinii'náa doo biniyé aniné bits'ą́ąjį' yisdánihidoohnił.

¹⁴Áko diné nidilt'é ní'ázhígíí áháłní, Yisdánihíínínilígi át'éego nihí ałdó' yisdánihidii'nił; nihinaanish nilíinii t'áadoo baa hwíínílne'góogo ákót'é. Áko ákót'ée doo: Bóhólníihii éí kéyah nihaidiní'ą́ągo naa dajiiniiba' doo, índa t'áá aaníí nich'į' ákódaniit'ée doo.

¹⁵Áko tł'óół bee tsésǫ' góyaa hadahóólo', háálá kin haal'áii binaa ahéénátł'inígíí bikáa'di bighan.

¹⁶Áko asdzání áháłní, Nílááh, dziłgóó doh'aash, áko nihikéé' nidahaakaígíí doo nihik'ídookah da; áadi na'ádinoł'ingo táá' yidoołkááł; nihikéé' nidahaakaígíí t'ą́ą́' nináhaaskaijį', áádóó bik'ijį' índa nikéédooht'ash.

¹⁷Diné nidilt'é ní'ázhígíí áháłní, Jó, ts'ídá t'áadoo bee nihik'íhodoot'ahígóó díí bee ádee hadidiidzihgo bee nihich'į' háínídzí'ígíí t'áá ákódii'nííł.

¹⁸Jó, kéyahgi niikaigo tsésǫ'dę́ę́' hadanihíínílo' yę́ęgi díí tł'óół ts'ósí łichxí'ígíí náát'i'go ádíílííł, áko nizhé'é áádóó nimá áádóó nilahkéí índa nizhé'é bighandóó dah ooldahígíí t' áá ałtso nighan góne' áłah ádíílííł.

¹⁹Áko kót'ée dooleeł: ła'da nighandóó ch'íníyáii kintaa atiinjį' ííyáago éí t'áá bí dił bik'ee chxii'go ánábi'diilyaago dadootsaał; nihí éí doo bee ádidahodidiilt'ih da, áádóó t'áá háiida nighan góne' bił nahíínítánígíí bidił bik'ee chxii'go ályaii daaztsą́ągo nihí éí bá naniideeh doo; ła'da atíbiilaago ákót'ée doo.

²⁰Áko nihinaanish nilíinii baa hwíínílne'go bee ádee hadidiidzihgo nihich'į' bee háínídzí'ígíí doo ádiilníił da.

²¹Áádóó asdzání ání, Nihizaad k'ehgo t'áá ákót'ée doo. Áko índa diné ní'ázhígíí dah nízhdiił'a' áádóó tsésǫ'gi tł'óół ts'ósí łichxí'ígíí náát'i'go ájiilaa.

²²Diné dah dii'áázh áádóó dziłgóó ní'áázh índa áadi tágí jį́ dzizkéé nít'éé'; hakéé' nidahaakaígíí t'ą́ą́' nákaigo índa dah náázhdiit'áázh; jó, diné t'áá ałtsogóó hadahoneeztą́ą́', nidi t'áadoo hak'ídaneeztą́ą' da.

²³Áko diné nihinát'áázh; dziłghą́ą́'dę́ę́' hadanáát'áazhgo tsé'naa ninát'áázh áádóó Nan biye' Jáshowa baa nijít'áazhgo hach'į' áhoodzaaígíí t'áá át'é bee bił náhojoolne'.

²⁴Áádóó Jáshowa ábizhdííniid, T'áá aaníí Bóhólníihii éí kéyah t'áá át'é nihaidiní'ą́ą́ lá; jó, kéyahgi t'áá át'é kéédahojit'ínígíí nidi t'áá ádzíłtso nihik'ee hatah doo dahwiina' da.