Read Navajo JOSHUA 20 Bible Online

JOSHUA 20 - Navajo bible

JOSHUA 20

¹Bóhólníihii éí Jáshowa áyidííniid,

²Ízrel dine'é ábididííniił, Kin hadaas'áagi bii'jį' yisdáda'niichéeh dooígíí ła' nidahididooh'ááł; éí Mózes biniit'aa bee nihich'į' haasdzíi' ni'.

³Áko doo t'áá ákónééhgóó áádóó doo yinahaz'ą́ą́góó diné yiyiisxínígíí éí kin haal'áajį' yisdádínóochééł; dił biniinaa k'ééhodidoodlíłígíí bits'ąą yisdádínóochéełii át'ée doo.

⁴Díí kin hadaas'áhígíí ła' bich'į' nízhdidoolwołgo kin haal'áii bich'é'étiingi kin haal'áhídóó aląąjį' naazíinii bich'į' nizhdoogáałgo ádaa nahozhdoolnih, áko kin haal'áhí góne' hoł yah adookahgo há dahwiidooł'aał, áko t'áá ákwii bił kééhojit'į́į dooleeł.

⁵Áádóó diné jiisxíinii bik'éí hak'íhá'áhígíí hakéé' yílwodgo éí doo yaa dahodidoo'áał da, háálá éí hoł kééhat'íinii t'áadoo baa ákozníziní jiisxį́, índa éí doo jijoołáa da nít'éé'.

⁶Áádóó éí kin haal'áhígi kééhojit'į́į doo, áko áłah ná'ádleehgi jidoogáałgo haa hwiidínóot'įįł, áádóó aláahgo náá'iiłniihii daaztsą́ bijį́į́dóó diné iisxínígíí nihéédoodááł; bikin haal'áhídóó dah diilwod yę́ęgóó nídoodááł.

⁷Áko díí kin hadaas'áii nideidiyiiz'ą́: éí Kíídesh kin haal'áii Gálilii kéyah biyi', t'áá éí Náftalai dine'é bikéyah át'éego dah daask'idígi, áádóó Shííkem kin haal'áii Íífreiyim dine'é bikéyah dah daask'idígi, índa Kírjath-árba kin haal'áii, t'áá éí Hííbran ałdó' hoolyé; éí Júdah dine'é bikéyah dah daask'idígi,

⁸áádóó Jórdan tooh wónaanídi Jériko kin haal'áii ha'a'aahjígo honoojíígóó dziłgo haz'ánígi Bíízer hoolyéego Rúben dine'é bikin haal'áii, áádóó Gíliyad kéyah biyi' Réímath hoolyéego Géed dine'é bikin haal'áii índa Béíshan kéyah biyi' Gólan hoolyéego Manáseh dine'é bikin haal'áii nideidiyiiz'ą́.

⁹Díí éí kin hadaas'áii nideet'ánígíí Ízrel dine'é t'áá a łtso bá áádóó bitahgóó dé'éyóní t'óó átsééd kéédahat'ínígíí bá ádaat'é, áko doo t'áá ákónéehgo diné yiyiisxínígíí ákǫ́ǫ́ nídidoolwoł áádóó áłah ná'ádleehgi doogáałgo haa náhódóot'įįłjį' dił biniinaa k'ééhodidoodlíiłii doo hodiyoołhéeł da.