Read Navajo JOSHUA 21 Bible Online

JOSHUA 21 - Navajo bible

JOSHUA 21

¹Áko Líívai dine'é bizhé'é danilíinii bada'áłchíní yá aląąjį' naazíinii éí náá'iiłniihii Eliyéízer áádóó Nan biye' Jáshowa índa Ízrel dine'é bizhé'é danilíinii bada'áłchíní yá aląąjį' naazíinii yaa yíkai,

²áko Sháíloh hoolyéedi Kéínan kéyahgi ádahodííniidgo ádaaní, Bóhólníihii éí Mózes biniit'aa kóníigo yee haadzíi'ii, kin hadaas'áii bii' kéédahwiit'į́į dooígíí, dahootso dooígíí t'áá bił nihilį́į́' bá nihaa hodidoot'ááł.

³Áko Ízrel dine'é bikin hadaas'áii bíí' daazlį́'ígíí łahjį', índa dahootsooígíí Líívai dine'é yaa deideez'ą́; éí Bóhólníihii yee haadzíi'ii bik'ehgo ádzaa.

⁴Yáá'iilt'e' bik'ehgo Kóhath dine'é bíí' dooleełii bá bééhoozin. Áko náá'iiłniihii Éran joolyéii ha'áłchíní náás ahoolchíiłii, Líívai dine'é danilį́įgo, yáá'iilt'e' bik'ehgo Júdah áádóó Símiyan índa Bénjamin dine'é táá'ts'áadahgo bikin hadaas'áhígíí Líívai dine'é bíí' daazlį́į́'.

⁵Áádóó Kóhath dine'é łahjį'ígíí yáá'iilt'e' bik'ehgo Íífreiyim dine'é áádóó Dan dine'é índa Manáseh dine'é ałníí'dóóígíí éí bada'áłchíní ahii' háá'ahiyoolchíiłii bikin hadaas'áii neeznáá kin haal'á bíighahgo bíí' daazlį́į́'.

⁶Áádóó Gérshan dine'é yáá'iilt'e' bik'ehgo Ísakar dine'é áádóó Ásher dine'é áádóó Náftalai dine'é índa Manáseh dine'é ałníí'dóóígíí Béíshan kéyahgi kéédahat'ínígíí bada'áłchíní ahii' háá'ahiyoolchíiłii bikin hadaas'áii táá'ts'áadahgo bíí' daazlį́į́'.

⁷Áádóó Miirárai dine'é ba'áłchíní ahii' háá'ahiyoolchíiłii bik'ehgo Rúben dine'é áádóó Géed dine'é índa Zébyulan dine'é bikin hadaas'áii naakits'áadahgo bíí' daazlį́į́'.

⁸Áko Ízrel dine'é éí yáá'iilt'e' bik'ehgo Líívai dine'é díí kin hadaas'áii áádóó binaagóó dahootsooígíí yaa deideez'ą́; Bóhólníihii éí Mózes biniit'aa yee haadzíi'ii yik'eh ádaadzaa.

⁹Áádóó Júdah dine'é índa Símiyan dine'é dabikéyahgi díí kin hadaas'áii bitaa'ééji'ígíí yaa deideez'ą́,

¹⁰éí Éran ba'áłchíní náás ahoolchíiłii ła' Kóhath dine'é ahii' háá'ahiyoolchíiłii, éí Líívai dine'é danilį́įgo yáá'iilt'e' bik'ehgo alą́ąjį' bá bééhoozinígíí bíí' daazlį́į́'.

¹¹Éínak dine'é yizhé'é nilíinii Árba wolyéii bikin haal'áii Hííbran hoolyéhígíí baa dazdeez'ą́; éí Júdah dine'é bikéyah dah daask'idígi dahootsooígíí t'áá bił baa dazdeez'ą́.

¹²Nidi kin haal'áagi dáda'ak'ehígíí índa ákwii kin dah naazhjaa'ígíí éí Jiifáneh biye' Kéíleb bíí' dooleełgo yaa deideez'ą́.

¹³Ákohgo náá'iiłniihii Éran dine'é éí Hííbran kin haal'áii binaagóó dahootsooígíí t'áá bił yaa deideez'ą́; éí kin haal'áii bii'jį' yisdá'niichéehii iisxíinii bá át'é, áádóó Líbnah kin haal'áii binaagóó dahootsooígíí t'áá bił yaa deideez'ą́.

¹⁴Áádóó ałdó' díí kin hadaas'áii kódahoolyéhígíí: Játer binaagóó dahootsooígíí t'áá bił, Éshtiimowa binaagóó dahootsooígíí t'áá bił,

¹⁵Hólan binaagóó dahootsooígíí t'áá bił, Dííber binaagóó dahootsooígíí t' áá bił,

¹⁶Áyiin binaagóó dahootsooígíí t'áá bił, Játah binaagóó dahootsooígíí t'áá bił índa Beth-shíímesh binaagóó dahootsooígíí t'áá bił; díí naakigo dine'é bikéyah biyi' náhást'éigo kin hadaas'áii Éran dine'é bíí' daazlį́į́'.

¹⁷Áádóó Bénjamin dine'é bikéyah biyi' éí Gíbiyan kin haal'áii binaagóó dahootsooígíí t'áá bił, Gííba kin haal'áii binaagóó dahootsooígíí t'áá bił,

¹⁸Ánathath kin haal'áii binaagóó dahootsooígíí t'áá bił índa Álman kin haal'áii binaagóó dahootsooígíí t'áá bił; éí dį́į'go kin hadaas' áii Éran dine'é bíí' daazlį́į́'.

¹⁹Áko Éran dine'é náá'iiłniihii danilíinii bikin hadaas'áii t'áá ałtsogo binaagóó dahootsooígíí t'áá bił táá'ts'áadahgo kin haal'á bíí' daazlį́į́'.

²⁰Kóhath dine'é ahii' háá'ahiyoolchíiłii t'áá éí Kóhath dine'é łahjį'ígíí, Líívai dine'é danilį́įgo, yáá'iilt'e' bik'ehgo Íífreiyim dine'é bikéyah biyi' kin hadaas'áii baa dahideest'ą́.

²¹Éí baa dahideest'ánígíí Shííkem hoolyéii dahootsooígíí t'áá bił Íífreiyim dine'é bidziłgo nahaz'ánígi kin haal'áii bii'jį' yisdá'niichéehii iisxíinii bá át'é, áádóó Gíízer kin haal'áii binaagóó dahootsooígíí t'áá bił yaa deideez'ą́,

²²áádóó Kibzéíyim binaagóó dahootsooígíí t'áá bił índa Beth-hóran binaagóó dahootsooígíí t'áá bił; éí dį́į'go kin hadaas'áhígíí hóó' daazlį́į́',

²³áádóó Dan dine'é bikéyah biyi' Éltiikii kin haal'áii binaagóó dahootsooígíí t'áá bił, Gíbithan kin haal'áii binaagóó dahootsooígíí t'áá bił,

²⁴Éíjalan kin haal'áii binaagóó dahootsooígíí t'áá bił índa Gath-ríman kin haal'áii binaagóó dahootsooígíí t'áá bił; éí dį́į'go kin hadaas'áii hóó' daazlį́į́',

²⁵áádóó Manáseh dine'é ałníí'dóóígíí bikéyah biyi' éí Téíyanak kin haal'áii binaagóó dahootsooígíí t'áá bił áádóó Gath-ríman kin haal'áii binaagóó dahootsooígíí t'áá bił, éí naakigo kin haal'áii hóó' daazlį́į́'.

²⁶Áko kin hadaas'áhígíí t'áá ałtsogo neeznáá kin haal'áá lá; binaagóó dahootsooígíí t'áá bił Kóhath dine'é ba'áłchíní ahii' háá'ahiyoolchíiłii łahjį'ígíí bíí' daazlį́į́'.

²⁷Áádóó Gérshan dine'é, éí Líívai dine'é danilį́įgo baa deet'ánígíí, éí Manáseh dine'é ałníí'dóóígíí bikéyah biyi' kin hadaas'áhígíí, éí Béíshan kéyahgi Gólan kin haal'áii binaagóó dahootsooígíí t'áá bił yaa deideez'ą́; éí kin haal'áii bii'jį' yisdá'niichéehii iisxíinii bá át'é, áádóó Be'éshtarah kin haal'áii binaagóó dahootsooígíí t'áá bił; éí naakigo kin haal'áii hóó' daazlį́į́'.

²⁸Áádóó Ísakar dine'é bikéyah biyi' Kíshyan kin haal'áii binaagóó dahootsooígíí t'áá bił, Dábareth kin haal'áii binaagóó dahootsooígíí t'áá bił,

²⁹Jármath kin haal'áii binaagóó dahootsooígíí t'áá bił índa Engánim kin shijaa'gi binaagóó dahootsooígíí t'áá bił; éí dį́į'go kin hadaas'áii hóó' daazlį́į́'.

³⁰Áádóó Ásher dine'é bikéyah biyi' Méíshal kin haal'áii binaagóó dahootsooígíí t'áá bił, Ábdan kin haal'áii binaagóó dahootsooígíí t'áá bił,

³¹Hélkath kin haal'áii binaagóó dahootsooígíí t'áá bił índa Rííhob kin haal'áii binaagóó dahootsooígíí t'áá bił; éí dį́į'go kin hadaas'áii hóó' daazlį́į́'.

³²Áádóó Náftalai dine'é bikéyah biyi' kin hadaas'áhígíí éí Gálilii kéyahgi Kíídesh kin haal'áii binaagóó dahootsooígíí t'áá bił hóó' daazlį́į́'; éí kin haal'áii bii'jį' yisdá'niichéehii iisxíinii bá át'é, áádóó Hámath-dóor kin haal'áii binaagóó dahootsooígíí t'áá bił índa Kártan kin haal'áii binaagóó dahootsooígíí t'áá bił; éí táa'go kin hadaas'áii hóó' daazlį́į́'.

³³Áko Gérshan dine'é bada'áłchíní ahii' háá'ahiyoolchíiłii bik'ehgo bikin hadaas'áii t'áá ałtsogo binaagóó dahootsooígíí t'áá bił táá'ts'áadahgo kin haal'á bíí' daazlį́į́'.

³⁴Áádóó Zébyulan dine'é bits'ą́ą́dóó Miirárai dine'é ahii' háá'ahiyoolchíiłii, éí Líívai dine'é danilį́įgo łahjį'ígíí, éí díí baa deet'ą́: Jákniyam kin haal'áii binaagóó dahootsooígíí t'áá bił, Kártah kin haal'áii binaagóó dahootsooígíí t'áá bił,

³⁵Dímnah kin haal'áii binaagóó dahootsooígíí t'áá bił índa Néíhalal kin haal'áii binaagóó dahootsooígíí t'áá bił; éí dį́į'go kin hadaas'áii Miirárai dine'é bíí' daazlį́į́'.

³⁶Áádóó Rúben dine'é bikéyah biyi' Bíízer kin haal'áii binaagóó dahootsooígíí t'áá bił, Jahéízah kin haal'áii binaagóó dahootsooígíí t'áá bił,

³⁷Kédiimath kin haal'áii binaagóó dahootsooígíí t'áá bił índa Méfeiyath kin haal'áii binaagóó dahootsooígíí t'áá bił; éí dį́į'go kin hadaas'áii Miirárai dine'é bíí' daazlį́į́'.

³⁸Áádóó Géed dine'é bikéyah biyi', éí Gíliyad kéyahgi Réímath kin haal'áii binaagóó dahootsooígíí t'áá bił hóó' daazlį́į́'; éí kin haal'áii bii'jį' yisdá'niichéehii iisxíinii bá át'é, áádóó Meihanéíyim kin haal'áii binaagóó dahootsooígíí t'áá bił,

³⁹Héshban kin haal'áii binaagóó dahootsooígíí t'áá bił, Jéízer kin haal'áii binaagóó dahootsooígíí t'áá bił; éí t'áá ałtsogo dį́į'go kin hadaas'áii hóó' daazlį́į́'.

⁴⁰Áko kin hadaas'áii t'áá ałtso éí Miirárai dine'é bada'áłchíní ahii' háá'ahiyoolchíiłii bik'ehgo éí Líívai dine'é danilį́įgo bada'áłchíní ahii' háá'ahiyoolchíiłii łahjį'ígíí yáá'iilt'e' bik'ehgo naakits'áadahgo kin haal'á bíí' daazlį́į́'.

⁴¹Kin hadaas'áii t'áá ałtso éí Ízrel dine'é bikéyah biyi' Líívai dine'é haa daaszįįdígíí binaagóó dahootsooígíí t'áá bił dízdiindóó ba'aan tseebíigo kin hadaas'áhígíí hóó' daazlį́į́'.

⁴²Díí kin hadaas'áii t'áá ałtso binaagóó dahootso; kót'éego díí kin hadaas'áii t'áá ałtso binaagi dahootso.

⁴³Áko Bóhólníihii éí Ízrel dine'é dabizhé'é yę́ę bich'į' kéyah t'áá át'é yee ádee hadoodzíi'ii yeidiní'ą́, áádóó bíí' daazlį́į'go yikáa'gi nidahaazná.

⁴⁴Áádóó Bóhólníihii éí Ízrel dine'é hanaagóó t'áá át'é hodéesyéelgo áyiilaa; éí dahazhé'é yę́ę yich'į' yee ádee hadoodzíi'ii t'áá át'é bik'ehgo áyiilaa; éí hwe'ana'í t'áá ałtso bitahdóó doo ła' hak'eh dódle' át'ée da, háálá Bóhólníihii éí hwe'ana'í t'áá ałtso hálák'eidíí'ą́.

⁴⁵Bóhólníihii éí Ízrel dine'é yich'į' yá'át'éehgo áhodooníiłii yee nihoní'áanii t'áadoo ła' ch'ééh áyííł'įįd da; éí t'áá ałtso t'áá ákóyiilaa.