Read Navajo JOSHUA 22 Bible Online

JOSHUA 22 - Navajo bible

JOSHUA 22

¹Áko Jáshowa éí Rúben dine'é áádóó Géed dine'é índa Manáseh dine'é ałníí'dóóígíí hágo bizhdííniidgo

²ábizhdííniid, Bóhólníihii yá naal'a'í Mózes nihich'į' yee haadzíi'ii t'áá ałtso bida'íínóhsin nít'éé', índa nihich'į' bee hahásdzíi'ii shizaad t'áá ałtso bik'eh dahonoł'į́į́ nít'éé';

³nihik'isóó danilíinii t'áadoo bits'ą́ą́' dadínóhchéhí t'óó ahayóí yiską́ díí jį́į́góó ákódaaht'į́, nidi Bóhólníihii nihiDiyin God nihich'į' yee haadzíi'ii bik'eh ádanoht'éé nít'éé'.

⁴Áko k'ad Bóhólníihii nihiDiyin God éí nihik'isóó háá'áyį́į́h yeidiní'ą́; jó, t'áá ákót'éego yich'į' yee ádee hadoodzíí'; éí bąą k'ad nihéédahohkááh; danihighangóó áádóó kéyah nihíí' daazlį́'ígóó, éí Bóhólníihii yá naal'a'í Mózes wolyéii Jórdan tooh wónaanídi nihaa hodiní'ánígóó nihéédahohkááh.

⁵Haleebee hazhó'ó ádaa ádahołyą́ągo bik'eh ó'oo'níiłii áádóó bee haz'áanii bik'eh dahonoł'į́; éí Bóhólníihii yá naal'a'í Mózes hazhó'ó yee ánihidííniid, áko Bóhólníihii nihiDiyin God ayóó'ádeínóh'ní, áádóó bihonít'i'ii t'áá ałtso bik'ehgo dayínóhkááh, áádóó bibik'eh ó'oo'níiłii bik'eh dahonoł'į́, áádóó t'áá bí t'éí bí'ádadíínółtą', índa nihijéí t'áá át'é bee áádóó nihii' sizíinii t'áá át'é bee bá nidaał'a'.

⁶Áko Jáshowa hak'ijisdli'go hwéé'níłnii' áádóó dahaghangóó anídadziiskai.

⁷Áko Mózes éí Manáseh dine'é ałníí'dóóígíí Béíshan kéyah biyi' bíí' dooígíí yeidiní'ą́, nidi Manáseh dine'é łahjį' ałníí'dóóígíí éí dabik'is bikédaayah bitahgi Jórdan tooh e'e'aahjígo bíí' dooígíí Jáshowa beidiní'ą́. Áádóó dahaghangóó Jáshowa hwéé'iisnii'go hak'ijisdli',

⁸áádóó áhodííniid, Da'oht'į́įgo nihighangóó nídeínóhkááh; nihilį́į́' t'óó adahayóigo áádóó béésh łigaii áádóó óola áádóó béésh łitsoii áádóó béésh nitł'izii índa éé' t'óó ahayóí nihee dahólǫ́ǫgo nihi'ana'í bindaalye'é bąąh nida'soołtseedígíí nihik'isóó bił ałts'ádadi'doohnił.

⁹Áko Rúben dine'é áádóó Géed dine'é índa Manáseh dine'é ałníí'dóóígíí dabighangóó anídahaaskai; Ízrel dine'é áłah nilínídóó, éí Sháíloh haz'ánígi Kéínan kéyah biyi'dóó Gíliyad kéyahgóó dah nídahidiikai; kéyah bíí' daazlį́į'go bíí' ádayiilaaígíí yich'į' anáhaaskai; éí Mózes biniit'aa Bóhólníihii yee haadzíi'ii bik'ehgo hóó' ádajiilaa.

¹⁰Áádóó Kéínan kéyahgi Jórdan tooh bibąąhgóó hoodzoíjį' yíkaigo Rúben dine'é áádóó Géed dine'é índa Manáseh dine'é ałníí'dóóígíí ákwe'é Jórdan tooh bibąąhgi bikáá' náá'iiniihí nitsxaago ádayiilaa.

¹¹Áádóó Ízrel dine'é éí kóhá'níigo deidiizts'ą́ą́', Jó, Rúben dine'é áádóó Géed dine'é índa Manáseh dine'é ałníí'dóóígíí Kéínan kéyahgi Jórdan tooh bibąąhgóó Ízrel dine'é ninínánígi bikáá' náá'iiniihí ádayiilaa.

¹²Áko Ízrel dine'é díí yaa dahodiizts'ą́ą'go yich'į' anaa' ádahodoolííł biniyé Sháíloh haz'ánígi Ízrel dine'é áłah silį́į́'.

¹³Áko Ízrel dine'é éí Gíliyad kéyahgóó Rúben dine'é áádóó Géed dine'é índa Manáseh dine'é ałníí'dóóígíí bich'į' náá'iiłniihii Eliyéízar biye' Fíniyas adeis'a',

¹⁴áádóó bídahólníhígíí neeznált' éego aláahgo hwee ádídahólníihgo Ízrel dine'é dah deínéehii yik'eh nízíinii hoł adeis'a'; dahazhé'é yę́ę ba'áłchíní dajílį́įgo hódahólníhígíí Ízrel dine'é miil daalt'éii bá aląąjį' nidzizį́.

¹⁵Áádóó Gíliyad kéyahdi Rúben dine'é áádóó Géed dine'é índa Manáseh dine'é ałníí'dóóígíí yaa yíkaigo ádeidííniid,

¹⁶Bóhólníihii bidine'é áłah silį́'ígíí t'áá ałtso ádaaní, Ha'át'íí lá bee Ízrel dine'é biDiyin God bich'į' doo ákǫ́ǫ́ ádaot'įįdgóó Bóhólníihii bikéé' deínóhkááh nít'éé' yę́ę díí jį́ bits'áhisoohkaigo bikáá' náá'iiniihí ádá ádaahłaa? Jó, éí bee díí jį́ Bóhólníihii bich'į' nidasoołtee'.

¹⁷Da' Píyor kin shijaa'diísh t'įįhdígo doo ákwii ádeiit'įįd da? Jó, t'áá nihí nidi doo nihida'dódééh át'ée da. Azhą́ Bóhólníihii bidine'é dah yinéłígíí bee atí'él'íinii yee atíyiilaa nidi ákóniit'é.

¹⁸Ákoósh díí jį́ Bóhólníihii bikéé' deínóhkááh nít'éé' yę́ę bits'ánóhkááh lá? Áko kót'ée doo: díí jį́ Bóhólníihii t'áá bich'į' nidasoołtee'go yiską́ągo Ízrel dine'é dah yinéłígíí t'áá ałtso yich'į' báhodoochįįł.

¹⁹Nidi k'ad nihikéyah doo yá'áhoot'ééhgóogo, Bóhólníihii bikéyah biyi'jį' ha'naa ninádooh'néełgo Bóhólníihii biníbaal bii' hodílzinii si'ánígóó nihitahgi kéyah nídahodidooh'ááł. Bóhólníihii bich'į' áádóó nihí nihich'į' t'ááká ádił nidaołteeł lágo, Bóhólníihii nihiDiyin God bibikáá' náá'iiniihí t'ah biláhídi át'éii t'ááká bikáá' náá'iiniihí náánáła' ánáádaohdlééh lágo.

²⁰Zíírah biye' Éíkan wolyéii Bóhólníihii bich'į' nideet'áanii yee doo ákǫ́ǫ́ áátįįdígíí biniinaa doósh Bóhólníihii yee hashké nídzinii yee Ízrel dine'é dah yinéłígíí t'áá ałtso atíyiilaa da? Áádóó éí doo ákwii áát'įįdígíí t'éiyá biniinaa diné náánáła' ałdó' ádabi'disdįįd.

²¹Áko Rúben dine'é áádóó Géed dine'é índa Manáseh dine'é ałníí'dóóígíí áńdahodoo'niidgo Ízrel dine'é mííl daalt'éego yiląąjį' naazíinii ádeidííniid,

²²Diyin God, Diyin God, éí Bóhólníihii nilíinii, Diyin God, Diyin God, éí Bóhólníihii nilíinii, éí díí bił bééhózin, índa Ízrel dine'é t'áá bí bił béédahodoozįįł! Nideiilteehgo, doodaii' Bóhólníihii bich'į' doo ákǫ́ǫ́ ádeiit'į́į́góó, áko díí jį́ yisdánihóónííł lágo,

²³jó, bikáá' náá'iiniihí ádeiilyaago Bóhólníihii bikéé' deíníikáahii bits'áhaakaigo, doodaii' bikáa'jį' didlidgo náádahaniihii, doodaii' ak'áán náádahaniihii, doodaii' hózhǫ́ǫ́jí náádahaniihii náádahiilnii'go bíni'dii Bóhólníihii t'áá bí k'éénihidódle'.

²⁴Nidi díí bik'ee nihił daayée'go biniinaa ákódeiidzaago ádadii'ní, Háadida náasdi nihí aají nihada'áłchíní nihí kojí nihada'áłchíní daats'í ádeididooniił, Ízrel dine'é biBóhólníihii Diyin God hanii nihídadéét'i'go ádaaht'į́?

²⁵Jó, Bóhólníihii éí Jórdan tooh bee nihita'gi hoodzogo áyiilaa; nihí Rúben dine'é áádóó Géed dine'é danohłíinii, Bóhólníihii doo nihídéét'i' da. Da'ahidi'níigo aají nihada'áłchíní éí nihí kojí nihada'áłchíní Bóhólníihii doo deidísingóó ádeidoolííł.

²⁶Éí bąą ádadii'ní, Haa'íshą' k'ad bikáá' náá'iiniihí ádadiilnííł; éí didlidgo náádahaniihii, doodaii' náádahidoonihii doo biniyé ádadiilníił da,

²⁷nidi nihita'gi áádóó niha'áłchíní náás da'ahílchíihii bita'gi bee ééhózinii át'ée doo, áko Bóhólníihii bich'į' nidahwiidláago Bí hólǫ́ǫgi didlidgo nihinááhániihii áádóó nihinááda'iiniihii índa hózhǫ́ǫ́jí nihináádahaniihii bich'į' náádahiilniih doo, áko nihí aají nihada'áłchíní éí nihí kojí nihada'áłchíní náasdi doo ádeididoo'niił da, Aají nihí Bóhólníihii doo nihídéét'i' da.

²⁸Áádóó kódeiniidzį́į́', Náasdi ákónihi'doo'niidgo, doodaii' nihada'áłchíní ákódabi'doo'niidgo, kódadidii'niił, Shoo, Bóhólníihii bibikáá' náá'iiniihí béé'ályaaii éí danihizhé'é yę́ę ádayiilaa; éí didlidgo náádahaniihii índa náádahidoonihii doo yiniyé ádayiilaa da, nidi éí nihita'gi bee ééhózinii biniyé át'é.

²⁹Dooda lą́ą! Bóhólníihii doo bich'į' nideiilteeh da, áádóó Bóhólníihii bikéé' deíníikáhígíí doo bits'ádiikah da; éí bikáá' náá'iiniihí ádeiilyaago, bikáa'jį' didlidgo náádahaniihii, doodaii' ak'áán náádahaniihii, doodaii' náádahidoonihii náádahiilnii'go, Bóhólníihii nihiDiyin God bibikáá' náá'iiniihí, éí biníbaal bii' hodílzinii bidáahgi si'ánígíí t'ah biláhídi át'éii ts'ídá doo ádeiil'į́į da.

³⁰Áko náá'iiłniihii Fíniyas índa áłah ílínídóó bídahólníihii Ízrel dine'é mííl daalt'éego yiląąjį' naazíinii hoł naakaígíí saad deidiizts'ą́ą'go, éí Rúben dine'é áádóó Géed dine'é índa Manáseh dine'é hadaasdzí'ígíí bił yá'ádaat'ééh.

³¹Áádóó náá'iiłniihii Eliyéízar biye' Fíniyas éí Rúben dine'é áádóó Géed dine'é índa Manáseh dine'é danilíinii áyidííniid, Díí jį́ Bóhólníihii nihitahgi hólǫ́ǫgo nihił béédahózin; jó, kót'éego Bóhólníihii bich'į' t'áadoo doo ákǫ́ǫ́ ádaot'įįd da lá, áko k'ad Ízrel dine'é éí Bóhólníihii yee atí'éł'íinii bits'ą́ąjį' yisdádasoonil.

³²Áko náá'iiłniihii Eliyéízar biye' Fíniyas áádóó bídahólníhígíí éí Rúben dine'é áádóó Géed dine'é yits'ą́ą́dę́ę́' nákai; Gíliyad kéyahdóó Kéínan kéyahgóó Ízrel dine'é bich'į' t'ą́ą́' níjíkaigo hane' baa nídadziz'ą́.

³³Áko hane'ígíí Ízrel dine'é yaa bił dahóózhǫǫd, áko Ízrel dine'é éí Diyin God yaa dahaniihgo Rúben dine'é áádóó Géed dine'é kéyah yii' kéédahat'ínígíí bik'iidiijahgo ádadiildįįł doo náádadoo'niid da.

³⁴Rúben dine'é áádóó Géed dine'é éí bikáá' náá'iiniihí Ed wolyée doo, dadííniid, háálá ádaaní, Jó, éí nihita'gi díí bee ééhózin: Bóhólníihii Diyin God nilį́.