Read Navajo JOSHUA 23 Bible Online

JOSHUA 23 - Navajo bible

JOSHUA 23

¹Áádóó nízaad nihoolzhiizhgo Ízrel dine'é binaagóó bida'ana'í ásdįįdgo Bóhólníihii hasht'ehodít'é beidiní'ą́ągo Jáshowa bi'niitih áádóó t'óó ahayóí binááhai,

²áko Jáshowa éí Ízrel dine'é t'áá ałtso áádóó hastóí danilíinii áádóó aląąjį' naazíinii áádóó ándahodii'aahii índa á dah naazdáii hágo yidííniidgo áyidííniid, K'ad t'áá íiyisí hasistih áádóó t'óó ahayóí shinááhai,

³áádóó díí hazhó'ó baa ákódanoozį́į́': Bóhólníihii nihiDiyin God éí díí ał'ąą dine'é t'áá ałtso nihiniinaa atíyííł'įįd, háálá Bóhólníihii nihiDiyin God nihá anaa' áyiilaa.

⁴Jó, yáá'iilt'e' bik'ehgo díí ał'ąą ana'í ał'ąą dah naazhjaa'go áshłaii t'ah nihił kéédahat'ínígíí, éí Jórdan toohdóó e'e'aahjí ayóó át'é tónteel siyíníjį' ał'ąą ana'í t'áá ałtso t'áá íídą́ą́' áséłdįįdígíí bikédaayah nít'é'ígíí t'áá bił nihíí' dooleeł.

⁵Bóhólníihii nihiDiyin God éí nihilą́ąjį' yinoołkałgo doo nídeidoołtsééłgóó baa ch'íhidoojah; bikédaayah t'áá át'é nihíí' dadooleeł; jó, ákót'éego Bóhólníihii nihiDiyin God nihá yee nihoní'ą́.

⁶Éí bąą yéego chánah danohłį́įgo naaltsoos bii' Mózes bibee haz'áanii bee ak'e'ashchínígíí t'áá ałtso bik'eh dahonoł'į́įgo bik'eh ádanoht'ée doo, áko nish'náajigo, doodaii' nishtł'ajigo ts'ídá doo bits'ą́ąjį' kódadoohníił da,

⁷áádóó díí ał'ąą ana'í nihił kéédahat'ínígíí doo bitahgóó dahohjah da doo, áádóó bidiyin dabidi'níinii doo baa yádaałti' da doo, áádóó doo bee ádee hadahidohdziih da doo, áádóó doo bá nidaał'a' da doo, índa doo bich'į' yaa áńdaaht'įįh da doo,

⁸nidi Bóhólníihii nihiDiyin God bí'ádadíínółtą'; ákónóht'éego díí jį́į́góó hoolzhish.

⁹Háálá Bóhólníihii éí ał'ąą ana'í ayóó ádaat'éii índa ayóó ádabóodziilii nihinááł baa ch'íheezhjéé', nidi nihí éí ts'ídá t'áadoo nihéébóodziilígóó díí jį́į́góó hoolzhish.

¹⁰T'áá łah dinołt'éhígo diné t'ááłáhídi mííl nihaa nídidoojah, háálá Bóhólníihii nihiDiyin God éí nihá anaa' ííł'į́; jó, ákót'éego nihá yee nihoní'ą́.

¹¹Éí bąą hazhó'ó t'áá nihí ádaa ádahołyą́ągo, Bóhólníihii nihiDiyin God ayóó'ádeínóh'ní.

¹²Háálá t'ą́ą́' dah nídahidoohkaigo díí ał'ąą ana'í nihitahgi daadzí'ígíí t'áá éí nihił kéédahat'ínígíí bił ahółdahgo bił ahánda'ohgehgo ídadi'doołnííł, áádóó bił ahółdahgo, índa nihił ahíldahgo,

¹³díí t'áá yíní át'éegi baa ákodanohsin: Bóhólníihii nihiDiyin God éí díí ał'ąą ana'í doo nihilą́ąjį' baa ch'ínááhájeehgóó, nidi t'óó biloh áádóó bibee ódleehí biih wohkáah doo, áádóó nihooshk'iizh nídanilsxis doo índa ch'il dadeeníinii nihinák'ee nídaajił doo. Bóhólníihii nihiDiyin God kéyah yá'át'éehii nihaidiní'áanii bąąh ásoohdįįdjį' ákónóht'ée doo.

¹⁴Áko nihokáá' dine'é t'áá ałtso bá nidahwiit'ééhjí bikáá'góó dah diishááh, éí nihijéí índa nihii' sizíinii t'áá át'é bee nihił béédahózin; t'ááłá'í nidi doo ła' ch'ééh áál'įįdgóó ts'ídá yá'ádaat'éehii t'áá ałtso Bóhólníihii nihiDiyin God nihídéét'i'go nihich'į' yee hahadziih; ts'ídá t'áá ałtso nihá bidahoolyaa; t'ááłá'í nidi t'áadoo ła' ch'ééh áál'įįd da.

¹⁵Éí bąą kót'ée dooleeł: t'áá ałtso yá'át'éehgo áhooníiłii nihá bidahoolnííł; éí Bóhólníihii nihiDiyin God nihá yee nihoní'ą́; t'áá ákót'éego ałdó' t'áá ałtsoní doo yá'ádaat'éehii Bóhólníihii nihik'ijį' kwíidoolííł; Bóhólníihii nihiDiyin God díí kéyah yá'át'éehii nihaidiní'áanii yąąh ánihisdįįdjį' ákónihidoolííł.

¹⁶Bóhólníihii nihiDiyin God bibee aha'deet'áanii nihich'į' yee haadzíi'ii bilááh ni'ádinooh'nilgo áádóó diyin dabidi'níinii bá nidaał'a'go índa éí bich'į' yaa áńdaaht'įįhgo Bóhólníihii t'áá íiyisí nihich'į' báhodoochįįł, áádóó kéyah yá'át'éehii nihaidiní'áanii ałtso tsį́įłgo bąąh ánihidi'dooldįįł.