Read Navajo JOSHUA 24 Bible Online

JOSHUA 24 - Navajo bible

JOSHUA 24

¹Áko Jáshowa éí Ízrel dine'é t'áá át'é Shííkem kin haal'áagi áłah áyiilaago Ízrel dine'é hastóí danilíinii áádóó aląąjį' naazíinii áádóó ándahodii'aahii índa á dah naazdáii hágo yidííniidgo Diyin God hólǫ́ǫjį' niikai.

²Áádóó Jáshowa éí diné t'áá ałtso áyidííniid, Ízrel dine'é biBóhólníihii Diyin God kóní, Danihizhé'é yę́ę ałk'idą́ą́' tooh nílínígíí wónaanídi kéédahat'į́į́ nít'éé'; ła' éí Tíírah wolyé, éí Éíbraham áádóó Néíhor bizhé'é nít'éé', áádóó éí diyin dabidi'níinii yá nidaal'a' nít'éé'.

³Ákohgo nihizhé'é yę́ę Éíbraham tooh wónaanídi náhodiiłtį́įgo Kéínan kéyah biyi' t'áá át'é hoł tádíí'áázh, áádóó ha'áłchíní k'ee'ąą noot'į́įłgo áshłaa. Áko Áizak haye' dooleełgo haa níłtį́,

⁴áádóó Áízak éí Jéíkab índa Íísa haye' dooleełgo haa nínil. Áádóó Íísa éí Dził Síyer haz'ánígíí bíí' dooleełgo baa diní'ą́, nidi Jéíkab áádóó ba'áłchíní éí Ííjip kéyah góyaa ííná.

⁵Áádóó Mózes índa Éran ákǫ́ǫ́ ííł'a', áádóó bee até'ésh'íinii bee Ííjip dine'é atíishłaa, áádóó éí bik'ijį' áádę́ę́' ch'ínihiní'eezh.

⁶Áko danihizhé'é yę́ę Ííjip kéyahdę́ę́' ch'íhoní'eezhgo tónteel siyíníjį' nooná, áko nít'éé' Tónteel Łichíí' siyínígíí bibąąhjį' danihizhé'é yę́ę Ííjip dine'é tsindaabąąs bijáád naakiígíí áádóó łį́į́' yee nidaabaahii yee hakéé' nahaakai yę́ę hóníłná.

⁷Áádóó Ízrel dine'é éí Bóhólníihii yich'į' hadadeeshghaazhgo, nihí áádóó Ííjip dine'é nihita'gi chahałheełgo áyiilaa, áko Ííjip dine'é tónteel bik'i diilkǫ' índa Ííjip kéyahgi atí'iishłaa yę́ę t'áá nihí danóoł'į́į́', áko honoojíidi kéédahoht'į́įgo nízaadgóó nihoolzhiizh.

⁸Áádóó Ámor dine'é bikéyah biih nihíí'eezhgo éí Jórdan tooh wónaanídi kéédahat'į́įgo nihił da'ahigą́ągo nihílák'ee bidíí'ą́, áko éí bikéyah ádíí' ádadoohłííł biniyé nihilą́ąjį' áséłdįįd.

⁹Áko Zípor biye' Béílak wolyéii éí Mó'ab kéyahdóó aláahgo naat'áanii nídiidzáago Ízrel dine'é yich'į' anaa' hasłį́į́' índa Bíyor biye' Béílam wolyéii hóyée'go nihá hadoodzih biniyé nihich'į' yiyííł'aad,

¹⁰nidi Béílam doo hwíínísts'ą́ą' da; éí bąą t'óó nihik'idzisdli'go bílák'eedóó hanihíínil.

¹¹Áko Jórdan tooh ha'naa ninoonáago Jériko kin haal'áajį' nooná, áádóó Jériko dine'é nihik' iijéé', áko Ámor dine'é, Píírez dine'é, Kéínan dine'é, Het dine'é, Gírgas dine'é, Háíva dine'é índa Jííbas dine'é éí t'áá ájít'é nihílák'ee hodíí'ą́.

¹²Áádóó tsés'náłtsooí bi'níłnii'go nihilą́ąjį' Ámor dine'é éí aláahgo naat'áanii nidilt'éego t'áá bił baa ch'ídahaazhjéé', áko éí nihidiltłish áádóó nihik'aa' doo bee ch'ídahisinoołkaad da.

¹³Áko kéyah nihaa diní'ánígíí doo bik'é nidashoołnish da, áádóó kin hadaas'áii éí doo nihí ádaahłaagóó bii' kéédahoht'į́, índa dá'ák'ehgi ch'il na'atł'o'ii áádóó áliv naazkaadii bineest'ą' hólóonii doo t'áá nihí k'idasidooláágóó daahsą́.

¹⁴Éí bąą k'ad Bóhólníihii dadíínóhsin, áádóó ts'ídá t'áádóo nídí índa t'áá aaníígóó ádaaht'į́įgo bá nidaał'a', áko tooh nílínígíí wónaanídi áádóó Ííjip kéyahdi diyin dabidi'níinii éí danihizhé'é yę́ę deidísin nít'é'ígíí nahjį' kódaahłééh, áádóó Bóhólníihii t'éí bá nidaał'a'.

¹⁵Ákondi Bóhólníihii bá nidaał'a' dooígíí nihił t'óó badaa'ihgo, díí jį́ háidíígíí bá nidaał'a' dooleełígíí nidadinoh'aah; tooh nílínígíí wónaanídi diyin dabidi'níinii danihizhé'é yę́ę deidísin nít'é'ígíí daats'í, doodaii' Ámor dine'é bikéyah bii' kéédahoht'ínígíí bidiyin dabidi'níinii daats'í, nidi shí éí índa shighandóó danilíinii bił Bóhólníihii bá nideiil'a' dooleeł.

¹⁶Áko diné ánáádadoo'niid, Dooda lą́ą, Bóhólníihii doo t'áá k'ad yóó'adadeet'ą́ą́góó diyin dabidi'níinii doo bá nidadiil'aał da.

¹⁷Háálá Bóhólníihii nihiDiyin God t'áá bí t'éiyá nihí índa danihizhé'é yę́ę Ííjip kéyahdóó naalte' dajílį́įgo haz'ą́ą́dóó hoł ch'ínihiní'eezh, áádóó éí bee ééhózinii ayóó ádaat'éii nihinááł áyiilaa, áádóó t'áá ałtsogóó tádadii'nánígóó índa diné t'áá ałtso bitahgóó ch'ídahii'ná yę́ędą́ą́' Bí nihaa áhályą́ą́ nít'éé',

¹⁸áko Bóhólníihii éí nihilą́ąjį' ana'í ałtso baa ch'íheezhjéé'; éí Ámor dine'é danilį́įgo kéyah yii' kéédahat'į́į́ nít'éé'; éí bąą nihí ałdó' Bóhólníihii bá nideiil'a' dooleeł, háálá Bí nihiDiyin God nilį́.

¹⁹Nidi Jáshowa éí diné áyidííniid, T'áá nihí doo Bóhólníihii bá nidaał'a' le' át'ée da, háálá Diyin God ts'ídá diyinii nilį́; éí Diyin God łe'nízinii nilį́; bee haz'áanii dahohtíihgo, doodaii' ádił da'íínółzíihgo éí doo nihá yóó'iididoo'áał da.

²⁰Bóhólníihii yóó'anídadoh'áahgo diyin bidi'níinii doo béédahózinii dadíínóhsin ládą́ą́', ákohgo nihik'ijį' dooleeł, áádóó atínihił'į́įgo nanihídoołdįįł; yá'át'éhígi ánihiilaadóó bik'ijį' ánihidoołdįįł.

²¹Áko diné danilíinii éí Jáshowa ádeidííniid, Dooda, nidi Bóhólníihii bá nideiil'a' dooleeł.

²²Áko Jáshowa éí diné áyidííniid, T'áá nihí oo'íinii ádá danohłį́įgo Bóhólníihii nidasidoo'ą́ągo bá nidaał'a' doo. Áádóó éí ádadííniid, T'áá nihí oo'íinii ádá daniidlį́.

²³Áko ábizhdííniid, Éí bąą k'ad eda'alyaii nihitahgóó hólónígíí nahgóó kódaahłééh, áádóó nihijéí éí Ízrel dine'é biBóhólníihii Diyin God baa dinoh'aah.

²⁴Áádóó diné éí Jáshowa ádeidííniid, Bóhólníihii nihiDiyin God bá nideiil'a' doo, áádóó áníinii bik'eh dahoniil'į́į doo.

²⁵Áko Jáshowa éí bee aha'deet'áanii ádajiilaa bijį́ yee nihoní'áanii índa bik'eh hoogáałii diné baa dadzisįįdgo Shííkem kin haal'áagi bá ákójiilaa.

²⁶Áko Jáshowa ak'e'jishchį́įgo díí saadígíí t'áá át'é naaltsoos bikáá' ájiilaaígíí Diyin God bibee haz'áanii át'é, áádóó tsé ayóo da'át'éé léi' néidii'ą́ągo chéch'iltsoh biyaagi Bóhólníihii bihodiyingo haz'ą́ągi ayíítsih.

²⁷Áádóó Jáshowa éí diné t'áá ałtso ábizhdííniid, Jó, díí tsé nihich'į' bee ééhózinii át'ée dooleeł, háálá adiizts'ą́ą'ii át'éego éí Bóhólníihii bizaad t'áá át'é nihich'į' yee hahaasdzíí'; éí bąą éí nihich'į' bee ééhózinii át'ée dooleeł, áko nihiDiyin God doo danohsingóó ákót'ée doo.

²⁸Ákohgo Jáshowa éí diné béé'jiisnii'go t'ááłá'í nítínígo kéyah bíí' dadooleełgóó anáhaaskai.

²⁹Díí kódahoodzaadóó bik'ijį' Nan biye' Jáshowa Bóhólníihii yá naal'a'í nilíinii daaztsą́; neeznádiindóó ba'aan neeznáá binááhai nít'éé'.

³⁰Áko yóó'ádahojiilaa; t'áá hó hakéyah biyi' Tímnath-síírah kin shijaa'gi Dził Íífreiyim nahós'a'gi áhoolyé; Géíyash dah yisk'idígíí náhookǫsjí haz'ą́.

³¹Áko Ízrel dine'é éí Bóhólníihii yá nidaal'a'go Jáshowa bíiníłką́, áádóó aląąjį' naazíinii bídeiníłkánígíí éí Jáshowa bilááh ánízáágóó dahináá nít'éé' áádóó Bóhólníihii yaa naayáhígíí át'éegi t'áá ałtso bił béédahózin nít'éé'; Ízrel dine'é éí ayóó ádaat'éii yá yaa naayá.

³²Áádóó Jóseph bits'in Ízrel dine'é danilíinii Ííjip kéyahdę́ę́' deizhjaa'ígíí ałdó' Shííkem kin haal'áagi yóó'ádayiilaa; éí Shííkem bizhé'é Héímor wolyéii biye'ké éí kéyah haz'ą́ągi béésh łigaii neeznádiin bíighahgo Jéíkab nahwiisnii' yę́ęgi yóó'ádahoolaa; éí kéyah Jóseph ba'áłchíní náás ahoolchíiłii bíí' daazlį́į́'.

³³Áádóó Éran biye' Eliyéízar daaztsą́, áádóó haye' Fíniyas éí dah yisk'idgo baa hodeet'ánígi Dził Íífreiyim dah yisk'idígi yóó'ádahojiilaa.