Read Navajo JOSHUA 4 Bible Online

JOSHUA 4 - Navajo bible

JOSHUA 4

¹Ákódaadzaago diné t'áá ałtso Jórdan tooh ha'naa ałtso ninínáago Bóhólníihii éí Jáshowa áyidííniidgo ání,

²Diné bitahdóó diné naakits'áadahgo nídidíínił; t'ááłá'í nítínígo ał'ąą dóone'é danilį́įgo nídidíínił.

³Áádóó bich'į' hadíídzihgo ábididííniił, Jórdan toohdę́ę́' éí nááda'iiłniihii naazínídóó tsé naakits'áadahgo nídadidoohnił; éí danihiidoołkáłíjį' dadoohjihgo díí tł'éé' danihiiłkaahígi nidadoohnił.

⁴Áko Jáshowa éí diné naakits'áadahgo nízhdiinilígíí bíká ázhdííniid; éí Ízrel dine'é bitahdóó t'ááłá'í nítínígo ał'ąą dóone'é danilį́.

⁵Áko Jáshowa éí áyidííniid, Bóhólníihii nihiDiyin God bitsits'aa' dílzinii bilą́ąjį' Jórdan tooh nílį́į́ nít'éé' yę́ęgóó dohkááh áádóó t'ááłá'í nootínígo nihiwos bee tsé hadahidoohjih; Ízrel dine'é ał'ąą dóone'é nohłínígíí éí bik'ehgo ákódaahnééh.

⁶Éí nihitahgóó bee ééhózinii át'ée doo; náás hodeeshzhiizhgóó nihada'áłchíní éí dabizhé'é nideídíłkidgo ádadidooniił, Díí tséshą', ha'át'íí biniyé át'é?

⁷Áko éí bee bił nídahołne' dooleeł, Bóhólníihii bitsits'aa' dílzinii éí bee aha'deet'áanii bii' sinilii bidáahgi Jórdan tooh dah néísk'ol; éí Jórdan tooh ha'naa niit'aahgo Jórdan tooh ał'ąą niilk'ol. Áko díí tséhígíí éí Ízrel dine'é bee ééhániihii át'éego ahóyéel'áa dooleeł.

⁸Áko Ízrel dine'é éí Jáshowa yee haadzí'ígíí yik'eh ádaadzaa; Jórdan tooh nílį́į́ nít'éé' yę́ęgi ałníí'dę́ę́' tsé naakits'áadahgo hadeizhjaa'; Bóhólníihii éí Jáshowa áyidííniidígi át'éego Ízrel dine'é éí ał'ąą dóone'é bik'ehgo dahwiidoołkáłíjį' tsé deizhjaa'go ákwii nideiznil.

⁹Áádóó Jáshowa éí tsé naakits'áadahgo Jórdan tooh nílį́į́ nít'éé' yę́ę ałníi'gi ałk'i dziztł'in; nááda'iiłniihii éí tsits'aa' dílzinii éí bee aha'deet'áanii bii' sinilii deí'aahígíí naazínígi niinínil, áko éí díí jį́į́góó t'ahdii t'áá ákwii sinil.

¹⁰Háálá nááda'ii łniihii éí tsits'aa' dílzinii deí'aahígíí Jórdan tooh nílį́į́ nít'éé' yę́ę ałníi'gi naazį́įgo Bóhólníihii éí Jáshowa yich'į' yee haadzíi'ii diné bich'į' ałtso bee hazdoodzih biniyé, Jáshowa éí Mózes hach'į' yee haadzíi'ii t'áá át'é bik'eh ádziidzaa. Haneetehee diné tsé'naa niildee'.

¹¹Áádóó ákódzaago diné t'áá át'é ałtso tsé'naa niikaigo Bóhólníihii bitsits'aa' dílzinii tsé'naa niit'ą́ índa nááda'iiłniihii diné dabinááł tsé'naa niikai.

¹²Rúben dine'é áádóó Géed dine'é índa Manáseh dine'é ałníí'dóóígíí Ízrel dine'é yilą́ąjį' anaa' yiniyé hasht'e'ádadiilyaago tsé'naa niikai; Mózes hach'į' yee haadzíi'ii bik'eh ída'jiilaa.

¹³Diné dízdiindi míilgo anaa' yiniyé hasht'e'ádadólzinígíí ha'naa nidahaaznáago Bóhólníihii binááł Jériko honíteeljigo adahaazbaa'.

¹⁴Éí bijį́į́dą́ą́' Ízrel dine'é t'áá ałtso dabinááł Bóhólníihii éí Jáshowa ayóó át'éii nilį́įgo áyiilaa, áádóó Jáshowa deidísin nít'éé'; Mózes deidísin yę́ęgi át'éego Jáshowa abíyííłką́ąjį' bił danilį́į́ nít'éé'.

¹⁵Áádóó Bóhólníihii éí Jáshowa áyidííniidgo ání,

¹⁶Nááda'iiłniihii bich'į' handziihgo éí tsits'aa' dílzinii éí neeznáago bik'eh ó'oo'níiłii bee bééhániihii bii' sinilii deí'aahgo Jórdan tooh nílį́į́ nít'éé' yę́ędę́ę́' tsíts'ádookah.

¹⁷Éí bąą Jáshowa éí nááda'iiłniihii bich'į' hadzoodzíi'go ájíní, Jórdan tooh nílį́į́ nít'éé' yę́ędóó wóshdę́ę́' tsíts'ánóhkááh.

¹⁸Áádóó nááda'iiłniihii éí Bóhólníihii bitsits'aa' dílzinii éí bee aha'deet'áanii bii' sinilii deí'aahígíí Jórdan tooh nílį́į́ nít'éé' yę́ędę́ę́' haaskaigo nááda'iiłniihii éí hóółtseijį' niikaigo Jórdan tooh t'ą́ąjį' anídahaazgo'go t'áá átséédą́ą́' nílį́į́ nít'éé' yę́ęgi át'éego náádląąd.

¹⁹Átsé nídízídígíí binih, neeznáá jį́į́ góne' Jórdan tooh ha'naa ninínáago Jériko bihoodzo ha'a'aahjígo Gílgal hoolyéegi niníná.

²⁰Áko tsé naakits'áadahgo Jórdan tooh nílį́į́ nít'éé' yę́ędóó hadajiizhjaa'ígíí Gílgalgi Jáshowa ałk'i yiztł'in.

²¹Áko Ízrel dine'é ábizhdííniid, Náás hodeeshzhiizhgóó nihada'áłchíní bizhé'é nideídíłkidgo ádadidooniił, Díí tséshą', ha'át'íí biniyé át'é?

²²Ákohgo díí nihada'áłchíní bee bił dahołne'go bił béédahodoozįįł, Ízrel dine'é bá díí Jórdan tooh ha'naa nihoníłtseiigo tsé'naa niníná.

²³Háálá Bóhólníihii nihiDiyin God éí Jórdan tooh nihilą́ąjį' nihá nihoníłtseiigo ha'naa ałtso ninooná; Bóhólníihii nihiDiyin God éí Tónteel Łichíí' siyínígíí nihá ha'naa niiníłtseiigo ha'naa ałtso ninii'nánígi áhoodzaa.

²⁴Ákohgo nihokáá' dine'é t'áá át'é bił béédahodoozįįł: Bóhólníihii bigaan ayóó ábóodziilii nilį́, áádóó Bóhólníihii nihiDiyin God dadíínóhsingo ahool'áa doo.