Read Navajo JOSHUA 6 Bible Online

JOSHUA 6 - Navajo bible

JOSHUA 6

¹Íídą́ą́' Ízrel dine'é biniinaa Jériko kin haal'áhígíí yéego dá'deelkaal; doo ła'da ch'ígháhí da, doo ła'da yah iigháhí da.

²Bóhólníihii éí Jáshowa áyidííniid, Shoo, Jériko kin haal'áii áádóó aláahgo naat'áanii índa bisiláo dahayóii t'áá bił nílák'edíí'ą́.

³Diné anaa' da'ał'íinii danohłíinii t'áá ánółtso, díí kin haal'áhígíí t'ááłáhídi binínáhkah doo. Ákódaaht'į́įgo hastą́ą́h jį́ adooleeł.

⁴Áko nááda'iiłniihii tsosts'id yilt'éego éí deenásts'aa' bidee' bee í'dílzoołí éí tsits'aa' dílzinii yilą́ąjį' deíjáah dooleeł, áko tsosts'id jį́ aleeh góne' kin haal'áhígíí tsosts'idi binídoohkah, áádóó nááda'iiłniihii éí deenásts'aa' bidee' yee ádadidooniił.

⁵Áko kót'ée dooleeł: deenásts'aa' bidee' bee í'dílzoołí nízaadgóó yee ádadidooniił, áko yee ádadidooniiłígíí éí dasidoots'ą́ą'go diné ts'ídá t'áá ałtso hahodidoołdlałgo ayóó át'éego hahóó'áa doo, áádóó kin haal'áhígíí ditą́ągo binaa ahéé'ítł'inígíí naa'ahiłdaasgo éí bitis gó'ąą Ízrel dine'é t'ááłá'í nítínígo t'áá k'éhézdon yah adoojah.

⁶Áko Nan biye' Jáshowa éí nááda'iiłniihii hágo bizhdííniidgo ábizhdííniid, Tsits'aa' dílzinii éí bee aha'deet'áanii bii' sinilii nídadooh'aah áádóó háni' nááda'iiłniihii tsosts'id yilt'éego éí Bóhólníihii bitsits'aa' dílzinii bilą́ąjį' deenásts'aa' bidee' bee í'dílzoołí tsosts'idgo dayíjáah doo.

⁷Áádóó Ízrel dine'é ábizhdííniid, Nihílááh, díí kin haal'áhígíí bináhkááh, áko diné nidaabaahii éí Bóhólníihii bitsits'aa' dílzinii yilą́ąjį' yikah doo.

⁸Áko Jáshowa éí diné bich'į' hadzoodzíi'go nááda'iiłniihii tsosts'id yilt'éego éí deenásts'aa' bidee' bee í'dílzoołí tsosts'idgo dayíjáahgo Bóhólníihii binááł náásgóó yikahgo éí adee' bee í'dílzoołí yee ádaaní, áádóó Bóhólníihii bitsits'aa' dílzinii éí bee aha'deet'áanii bii' sinilii t'áá bikéé' yit'ááł.

⁹Áko diné nidaabaahii éí nááda'iiłniihii adee' bee í'dílzoołí yee ádaanínígíí yilą́ąjį' yikah, índa akéé'dóó hada'ídíl'į́'ígíí éí tsits'aa' dílzinii yikéé'dóó yikahgo nááda'iił niihii náás yikahgo éí adee' bee í'dílzoołí t'ááłáhígi át'éego yee ádaaní.

¹⁰Nidi Jáshowa éí diné bich'į' hadzoodzíi'go ájíní, T'áadoo dadołwoshí, doodaii' nihiinéé' t'áadoo dadoołts'a'í doo, doodaii' t'áadoo saad bee hadahohdziihí; hadadołgháásh nihidideeshniiłjį' ayííłką́ągo índa hadadidoołwosh.

¹¹Kót'éego Bóhólníihii bitsits'aa' dílzinii éí kin haal'áhígíí t'ááłáhídi binídadziz'ą́, índa dah oonéłíjį' níjíkaigo áadi dahwiiską́.

¹²Áko Jáshowa t'ah abínídą́ą́' nídii'na'go nááda'iiłniihii éí Bóhólníihii bitsits'aa' dílzinii nídeidii'ą́.

¹³Nááda'iiłniihii tsosts'id yilt'éego éí deenásts'aa' bidee' bee í'dílzoołí deíjáahgo Bóhólníihii bitsits'aa' dílzinii bilą́ąjį' t'ááłáhígi át'éego náásgóó yikahgo deenásts'aa' bidee' bee í'dílzoołí yee ádaaní, áko diné nidaabaahii éí bilą́ąjį' yikah áádóó akéé'dóó hada'ídíl'į́'ígíí éí Bóhólníihii bitsits'aa' dílzinii yikéé'dóó yikahgo nááda'iiłniihii náás yikahgo t'ááłáhígi át'éego adee' bee í'dílzoołí yee ádaaní.

¹⁴Áko naaki jį́ aleeh góne' kin haal'áhígíí binínáádzískaigo dah oonéłíjį' t'ą́ą́' nínáájíkai. Ákódajit'į́įgo hastą́ą́h jį́ azlį́į́'.

¹⁵Ákódzaago tsosts'id jį́ aleeh góne' t'óó hayííłką́ą́dą́ą́' nízhdiijéé' áádóó t'áá ádajit'į́į́ nít'éé' yę́ęgi át'éego kin haal'á tsosts'idi binínáádzískai; t'áá hazhó'ó éí bijį́ t'éí kin haal'áhígíí tsosts'idi binídzískai.

¹⁶Áko ákódadziidzaago tsosts'idi biníjíkááh góne' nááda'iiłniihii éí deenásts'aa' bidee' bee í'dílzoołí yee ádadííniidgo, Jáshowa éí diné áyidííniid, Hadadołgháásh, háálá Bóhólníihii díí kin haal'áhígíí nihaidiní'ą́.

¹⁷Díí kin haal'áhígi kéédahat'íinii índa t'áá ałtso bii' dahólónígíí t'áá bił Bóhólníihii bich'į' nideet'ą́; t'áá hazhó'ó Réíhab ałjiłnii nilíinii índa bighan góne' yił naháaztánígíí t'éiyá t'áá ałtso dahináa dooleeł, háálá díí asdzání éí naalchi'í adasiil'a'ígíí néidees'į́į́'.

¹⁸Nidi nihí t'áadoo le'é Bóhólníihii bich'į' nideet'ánígíí ts'ídá bits'ąą ádaa ádahołyą́ą doo, éí doodaii' nídadooláago t'áá nihí hóyée'ii biih ádidoohnił índa Ízrel dine'é dah yinéłígíí ałdó' hóyée'ii biih dadoohnił áádóó bich'į' dahodiyoołnááł.

¹⁹Nidi béésh łigaii áádóó óola t'áá át'é índa béésh łitsoii áádóó béésh nitł'izii bee łeets'aa' ádaalyaaígíí éí Bóhólníihii bich'į' dílzin, éí Bóhólníihii binaalye'é da'ílíinii ahi'níiłjį' nidahohjááh.

²⁰Áko nááda'iiłniihii éí deenásts'aa' bidee' bee í'dílzoołí yee ádadííniidgo Ízrel dine'é hadadeeshghaazh. Ákódzaago éí deenásts'aa' bidee' bee í'dílzoołí diists'ą́'ígíí deidiizts'ą́ą'go t'áá áko ayóó át'éego hadadeeshghaazhgo kin haal'áhígíí ditą́ągo binaa ahéé'ítł'inii naa'adahałdaasgo éí bitis gó'ąą Ízrel dine'é łá'í nítínígo t'áá k'éhézdon yah ííjéé', áko kin haal'áhígíí deisná.

²¹Áko kin haal'áhígi dahólónígíí, diné áádóó asdzání ániid nidaakaii áádóó hadaastihii, béégashiida, dibéda índa téliida ts'ídá ałtso diltłish yee ádeisdįįd.

²²Áko Jáshowa éí diné nidilt'éego kéyah hayíísidígíí ábizhdííniid, Nihílááh, asdzání ałjiłnii bighan góne' yah ooh'aashgo áádę́ę́' bił ch'ínóhkááh; bik'éí t'áá ałtso t'áá bił bich'į' bee ádee hadoohdzí'ígíí bi'ohłééh.

²³Áko dinééh naalchi'í nilį́į́ nít'é'ígíí yah íí'áazhgo áádę́ę́' Réíhab bił níjíkai, bizhé'é áádóó bimá áádóó yił háájéé' índa bik'éí t'áá ałtso bił níjíkai, áádóó bik'éí danilíinii t'áá ałtso dah deidii'eezhgo Ízrel dine'é dah yinéłígíí bíighahgi nideizh'eezh.

²⁴Áko kin haal'áhígíí áádóó bii' dahólónígíí ałtso adeideesk'ą́ą́'; t'áá hazhó'ó béésh łigaii áádóó óola áádóó béésh łitsoii índa béésh nitł'izii bee łeets'aa' ádaalyaii t'éiyá éí Bóhólníihii bikin biyi' naalye'é da'ílíinii ahi'nííł góne' yah adajizhjaa'.

²⁵Nidi Jáshowa éí Réíhab ałjiłnii nilíinii áádóó bizhé'é bighandóóígíí índa bik'éí t'áá ałtso dahináa doo biniyé yisdájíínil, áko díí jį́įjį' Ízrel dine'é bitahgi kéédahat'į́, háálá Jáshowa éí naalchi'í nidilt'éego Jériko kin haal'áii haidoosił biniyé nidzis'a'ígíí néidees'į́į́'.

²⁶Áko íídą́ą́' Jáshowa éí hazhó'ó diné bizhníłnii'go ábijiní, Bóhólníihii binááł hóyée'go diné ła' bá ha'doodzih, háálá díí Jériko kin haal'áii áńjídlééh. Éí díí kin haal'áhígíí bitł'ááh nástł'iní nídzíztł'ingo haye' alą́ąjį' yizhchínígíí hats'ą́ą́' dadootsaa ł, áádóó kin haal'áii bidáń'dítį́į́h áńjiidlaago haye' akéédę́'ígíí hats'ą́ą́' dadootsaał.

²⁷Áko Bóhólníihii éí Jáshowa yił hólǫ́ǫ́ nít'éé', áádóó éí kéyah biyi'góó t'áá át'éé nít'éé' bééhózínígo tádííyá.