Read Navajo JOSHUA 7 Bible Online

JOSHUA 7 - Navajo bible

JOSHUA 7

¹Nidi Bóhólníihii bich'į' nideet'ánígíí Ízrel dine'é doo ákǫ́ǫ́ ádayííł'įįd da; jó, Éíkan éí Kármii biye' éí Zábdai biye' éí Zíírah biye' éí Júdah dine'é jílį́įgo, díí Bóhólníihii bich'į' nideet'ánígíí ła' nízhdiinilgo Bóhólníihii ts'ídá doo hasht'é'égóó Ízrel dine'é yich' į' báhóóchįįd.

²Áko Jáshowa éí Jériko kin haal'áádóó Éí'ai kin haal'áajį' diné ła' dah dahizhdiił'a'; Éí'ai éí Beth'éíven kin shijaa' bíighahgi Béthel ha'a'aahjígo kin haal'áhígóó dazdees'a'go ábizhdííniid, Nihílááh, kéyah hadaahsííd. Áko éí diné naalchi'í danilį́įgo Éí'aigóó eekaigo hada'íísid.

³Áko Jáshowa yaa nákaigo ádeidííniid, Háni'dii diné doo t'áá át'é ákǫ́ǫ́ dookah da, nidi diné naakidi mííl, doodaii' táadi míilgoda ákǫ́ǫ́ dookahgo Éí'ai hoolyéhígíí yaa tiih dookah. Diné doo t'áá át'é naanish biih doo'nił da, háálá t'áá díkwíí ákwii kéédahat'į́.

⁴Ákohgo diné táadi mííl yilt'éego daats'í ákǫ́ǫ́ dah diikai; nít'éé' Ízrel dine'é éí Éí'ai dine'é bits'ą́ąjį' dazhdínéezhchą́ą́'.

⁵Áko Éí'aidóó dine'é tádiindóó ba'aan hastą́ą́h daats'í Ízrel dine'é nideistseed, háálá kin haal'áhígíí bidáń'dítį́į́hdóó Shébarim hoolyéegi t'áá yaa náá'áhíjį' baa deíjeehgo deiníłtseed. Áko diné baa nidahwiiskaadgo t'áá íiyisí niseekai.

⁶Ákohgo Jáshowa ha'éé' ák'inijooldláadgo Bóhólníihii bitsits'aa' dílzinii bidáahjį' tsé'yaa jishjoolgo hwee i'íí'ą́; hó áádóó Ízrel dine'é aląąjį' naazíinii bił łeezh dibahí ák'ídajiilkaad.

⁷Áko Jáshowa ázhdííniid, Bóhólníihii Diyin God nílíinii, dooládó' yówéé át'ée da. Ha'át'íí biniyé díí dine'é éí Jórdan tooh ha'naa nííní'eezhígíí Ámor dine'é ádanihidoołdįįłgo baa nihidííní'ą́? Háni'dii t'áá Jórdan biláahdi kéédahoniit'į́į dooleeł nít'éé'.

⁸Bóhólníihii nílíinii, Ízrel dine'é bida'ana'í yits'ą́ąjį' nídadíníchéehgo ha'át'íí lá dishníi doo!

⁹Háálá Kéínan dine'é áádóó éí kéyahgi kéédahat'íinii t'áá ałtso díí yaa dahodidoots'į́įłgo nihinídoot'ihgo nihízhi' baa hodiyoo'nah, áko nishą', éí hait'éego nízhi' ayóó át'éii íínísin doo?

¹⁰Bóhólníihii éí Jáshowa áyidííniid, Nídiidááh, ha'át'íishą' biniyé tsé'yaa shíníjool?

¹¹Ízrel dine'é ádił da'asiih áádóó shibee aha'deet'áanii bich'į' bee haasdzíi'go bee haz'ánígíí k'ídeizti', áádóó ałdó' Bóhólníinii bich'į' nideet'áanii ła' deineez'į́į́', áádóó ch'aadeishchį́, índa dabiyooch'íidgo dabinaalye'é bitahdi nideiznil.

¹²Éí bąą Ízrel dine'é bida'ana'í doo yídaníłdzil da, nidi bida'ana'í t'óó yits'ą́ąjį' nídadíníchééh, háálá ádooldįįłii dadzizlį́į́'. Áko doo nihił nááhonishdlǫ́ǫ da doo; t'áá hazhó'ó ádadooldįįłgo nideet'áanii nihitahdóó ádasoołdįįdgo t'éiyá.

¹³Nídii'nééh, díí diné diyingo ánílééh áádóó ábididííniił, Yiską́ągo biniyé t'áá nihí doo nihąąh daachingóó diyingo ádadi'doołnííł, háálá Ízrel dine'é biBóhólníihii Diyin God ání, Ízrel dine'é danohłíinii, nihiníi'gi Bóhólníihii bich'į' nideet'áanii ła' hólǫ́; éí bąą nihida'ana'í doo bídanółdzilgo nidasoozį́į le' át'ée da; Bóhólníihii bich'į' nideet'áanii nihitahdóó nahgóó kódaahłaago t'éiyá.

¹⁴Éí bąą t'ah abínídą́ą́' t'ááłá'í dine'é danohłíinii bik'ehgo ahidahidoohkaigo nidahidoohkah, áko Bóhólníihii éí dine'é néidiinilígíí bitahdóó diné hada'áłchíní dah dají'éeshii bik'ehgo t'áá hoł nidahidookah, áádóó t'áá éí náábítahdóó ła' Bóhólníihii néidiinilígíí éí dabighandóóígíí bik'ehgo nihidookah, áko ła' hooghandóó Bóhólníihii néidiinilígíí éí diné t'ááłá'í nítínígo nidahidookah.

¹⁵Áko kót'ée doo: Bóhólníihii bich'į' nideet'áanii nízhdiinilii ahodi'doolk'ą́ą́ł áádóó hanaalye'é t'áá ałtso bił hwiih hodidoo'nił, háálá Bóhólníihii bibee aha'deet'áanii bee haz'ánígíí k'ízhníti' áádóó Ízrel dine'é bitahgi doo hóshkał baa nijiyá.

¹⁶Ákohgo t'ah abínídą́ą́' Jáshowa nídii'na'go Ízrel dabidine'é bik'ehgo nijiizh'eezh; nít'éé' Júdah dine'é nídii'nil.

¹⁷Áko Júdah dine'é niyiizh'eezh áádóó Zíírah ba'áłchíní néidiinil, áko Zíírah ba'áłchíní bitahdóó diné t'ááłá'í nítínígo niyiizh'eezh, áko Zábdai néidiiłtį́.

¹⁸Áko Jáshowa éí Zíírah bighandóóígíí diné t'ááłá'í nítínígo niyiizh'eezh índa Éíkan éí Kármii biye' éí Zábdai biye' éí Zíírah biye' éí Júdah dine'é jílį́įgo néidiiłtį́.

¹⁹Áko Jáshowa éí Éíkan áyidííniid, Shiye' nílíinii, Ízrel biBóhólníihii Diyin God baa ha'niihgo éí bich'į' ádaa hodíílnih. T'áadoo shits'ąą naníł'iní; íínít'įįdígíí k'ad bee shił hólne'.

²⁰Áko Éíkan éí Jáshowa ánéidoo'niidgo ání, T'áá aaníí Ízrel dine'é biBóhólníihii Diyin God bich'į' ádił asésiih, áko díigi íít'įįd.

²¹Jériko dine'é bindaalye'é bitahgi éénééz ayóó ánóolninii Bábilandę́'ígíí áádóó béésh łigaii naakidi neeznádiin shékel wolyéhígíí bíighahgo, índa óola éí shékel ashdladiin dah hidídlo' bíighahgo yiiłtsą́ągo bidáníshnihgo t'óó nídiinil. Jó, shiníbaal biyi' góne' łeeyi'di béésh łigaii atł'áahdi sinilgo nídees'į́į́'.

²²Ákohgo Jáshowa éí nidaal'a'í dah dazhdiił'a'go níbaal si'ánígóó níjéé'; nít'éé' haníbaal biyi' góne' béésh łigaii atł'áahdi sinilgo nídees'į́į́' lá.

²³Áko níbaal biyi'dóó ch'ídeizhjaa' áádóó Jáshowa índa Ízrel dine'é t'áá ałtso bich'į' nidajiizhjaa'go Bóhólníihii binááł ni' nidadziiznil.

²⁴Áko Jáshowa áádóó Ízrel dine'é t'áá ałtso bił Zíírah binálí Éíkan éí béésh łigaii áádóó éénééz, óolada, haye'kéda, hatsi'kéda, habéégashii áádóó hatélii índa hadibéda, áádóó haníbaal, índa hanaalye'é t'áá ałtso nídeidiinilgo yíldzis Éíkor hoolyéhígi áłah ádayiilaa.

²⁵Áko Jáshowa ádííniid, Ha'át'éegoshą' nihik'ijį' hwííníłchįįd? Díí jį́ Bóhólníihii nik'ijį' hodoołchįįł. Áko Ízrel dine'é t'áá ałtso tsé yee hoł nidadzisne', áko tsé yee hoł nidadziyiisne'dóó bik'ijį' adahodiyiisk'ą́ą́'.

²⁶Áko éí tsé ayóó át'éego hak'i yáádayiitsigo díí jį́į́góó ákót'é. Índa Bóhólníihii t'óó báhádzidgo báháchį'í łahgo ánáyiidlaa. Éí bąą díí jį́įjį' éí haz'ą́ągi yíldzisii Éíkor hoosye'.