Read Navajo II THESSALONIANS 1 Bible Online

II THESSALONIANS 1 - Navajo bible

II THESSALONIANS 1

¹Shí Paul áádóó Silvéínas índa Timothy, Thesalonáíkagi da'oodlání áłah nádleehii Diyin God nihiTaa' índa Bóhólníihii Jesus Christ bíí' danilíinii bich'į' naaltsoos ádeiilnééh:

²Diyin God nihiTaa' índa Bóhólníihii Jesus Christ bibee ajooba' áádóó bibee ach'į' hózhǫ́ náhásdlį́į'ii yee nihik'ijidlíi doo.

³Nihik'isóó, ts'ídá t'áá áłahjį' Diyin God bich'į' nihaa ahééh daniidzin dooleełgo yá'át'ééh, áko ákódeiit'į́. Háálá nihida'oodlą' t'áá íiyisí danéesééh, áádóó t'ááłá'í nootínígo bee ayóó'áda'ahíínóh'nínígíí hózhǫ́ bidziil yileeł.

⁴Azhą́ atídanihi'dil'į́ áádóó nihich'į' nidahwii'náa nidi hada'íínółníigo yéego nisoozį́įgo da'iinohdlą́. Éí bąą Diyin God dayoodláanii áłah nídaadleehgóó nihaa dahwii'niih.

⁵Diyin God bee bóhólníihgo bił haz'áanii bą́ą́h da'nohłį́įgo ánihidoolííł biniyé ti'dahoohnííh. Éí Diyin God ts'ídá t'áá ákogi át'éego ánihwii'aahgo bee bééhózin.

⁶Háálá Diyin God ts'ídá t'áá ákogi át'éego ádooníiłgo atídanihił'ínígíí ti'hoo'nííh yee k'ééhodidoodlííł.

⁷Áádóó nihich'į' nidaho'diilnáanii nihił háádadoołyįhgo nihaididoo'ááł, Bóhólníihii Jesus bidiyingo nidaal'a'í ayóó ádabóodziilii yił yá'ąąshdę́ę́' yit'íní áyiilaago índa ákóhodoonííł.

⁸Diyin God doo béédahodzísinii índa nihiBóhólníihii Jesus baa hane' yá'át'éehii doo bik'eh dahojíł'íinii kǫ' bits'áhodino'ii yee k'ééhodidoodlííł.

⁹Áko hool'áágóó atídaho'diilyaa doo, Bóhólníihii áádóó bibee adziil ayóó át'éii bits'áho'dee'nilgo ti'dahojooníih doo,

¹⁰Jesus nádzá bijį́įdi bidiyį́į́' ayóó át'éego bee baa ha'niih doo, índa dahoosdląądii t'áá ałtso hak'ee t'óó bił adahayói doo. Nihí ałdó' anohtah dooleeł, háálá bee nihił dahwiilne'ii deisoohdląąd.

¹¹Áko díí biniyé t'áá áłahjį' nihá sodadiilzin, éí nihiDiyin God yee nihá íinízinii yee nihíká ádííniidii bą́ą́h da'nohłį́įgo ánihidoolííł. Áádóó t'áá ałtsojį' yá'át'ééh ádaahníił dooleełígíí biniyé, índa oodlą' bee baa dadzíínóhłíigo baa nidaahkaígíí bibee adziilii yee nihá ła'yidoolííł.

¹²Áko nihiDiyin God áádóó Bóhólníihii Jesus Christ bibee ajooba' bik'ehgo nihiBóhólníihii Jesus nihee baa ha'niih doo, áádóó nihí bił łá'í danohłį́įgo nihaa ha'niih doo.