Read Navajo II THESSALONIANS 2 Bible Online

II THESSALONIANS 2 - Navajo bible

II THESSALONIANS 2

¹K'ad nihik'isóó danohłíinii, nihiBóhólníihii Jesus Christ náánádáhígíí áádóó bidááhdóó áłah diidleełígíí beiníit'į́įgo díí baa nídanihiikąąh:

²Bóhólníihii beidoołkáłígíí t'áá íídą́ą́' nádzá, daaníigo t'áá ádzaagóó nihił dahalne'ígíí t'áadoo bik'ee ch'į́į́góó nitsídanohkeesí, t'áadoo bik'ee ádił nídahodoołchiłí. Jó, diné ła', Shich'į' yit'íní ályaa, doodaii', Kót'éego shił hóóne', doodaii', Paul áádóó yił naakaígíí naaltsoos ádayiilaii kóní, nínígíí éí t'áadoo t'áá aaníí ání danohsiní.

³Diné ła' ts'ídá t'ááká ha'át'éegoda nihi'dóleeh lágo. Háálá diné bi'oodlą' yits'ą́ąjį' dínóojahígíí átsé ádoonííł, áádóó diné bąąhági át'éii yee sizíinii, í'doodįįłjį' bá nihoot'áanii yit'íní ádoolnííł, áadi índa Bóhólníihii nídoodáłígíí beidoołkááł.

⁴Diné bąąhági át'éii yee sizíinii, éí diyin dabidi'níinii áádóó bich'į' nidahadláii t'áá ałtso yik'ijį' nilį́įgo yiláahgo na'ádiiltée doo. Áko, Diyin God nishłį́, níigo, ádaa halne'go Diyin God bikin bii' sohodizin yii' dah dínóodaał!

⁵Shą́ą́', t'ah nihitah naashá yę́ędą́ą́' díí bee nihił dahweeshne' ni', t'áásh béédaałniih?

⁶Bąąhági át'éii yee sizíinii yit'íní ádoolníiłgo baa hodoolzhishígíí biná k'ad t'ą́ą́' ábósinii nihił béédahózin.

⁷Bee nahaz'áanii doo yik'ehgo át'éii doo bééhózin da yę́ę t'áá íídą́ą́' naalnish, k'ad t'ą́ą́' ábósinii t'áá nahjį' kóbi'diilyaaíjį' yilnish doo.

⁸Áko índa bąąhági át'éii yee sizíinii yit'íní ádoolnííł, áádóó Bóhólníihii Jesus nádzáago bits'ádi'nílíidii yee yit'íní ályaago, bizéé'dę́ę́' biyol yee bąąhági át'éii yee sizíinii yidiyoołhéełgo íidoołdįįł.

⁹Bąąhági át'éii yee sizíinii éí níłch'i bida'iiníziinii binanit'a'í Séítan wolyéii bibee adziilii yee ááníiłgo doogáałgo, wooch'íidgo bee éédahózinii índa bik'ee t'óó ił adahayóigo ádahooníiłii t'áá ałtso áyoolíił doo.

¹⁰Áádóó ádabidi'dooldįįłígíí doo t'áá ákogi át'éii ałtah ádaat'éii yee yina'alo'go doogááł. Háálá t'áá aaníinii ayóó'ádayó'níi dooleeł yę́ę doo deiniizį́į́'góó biniinaa doo yisdáhidookah da.

¹¹Éí biniinaa Diyin God éí wooch'ííd dajoodlą́ą doo biniyé na'nitin yóó'ahodoo'ishii hach'į' yi'iiłnííh.

¹²Áko t'áá aaníinii t'áadoo dadzoosdląądii, nidi doo ákwii ádaat'éii bąą hoł dahózhóonii hool'áágóó há nidahodiyoot'ááł.

¹³Nidi nihik'isóó danohłíinii, Bóhólníihii ayóó'ánihó'níinii, t'áá áłahjį' Diyin God bich'į' nihaa ahééh daniidzin dooleełgo yá'át'ééh. Háálá Níłch'i Diyinii bee diyingo ádanihidi'doolnííł índa t'áá aaníinii deidoohdląąłgo bee yisdáhidoohkah biniyé hodeeyáádę́ę́' Diyin God nánihiizláá'.

¹⁴Éidí biniyé hane' yá'át'éehii bee nihił dahwiilne'ígíí yee nihíká ádííniid, áko nihiBóhólníihii Jesus Christ yee ayóó át'éii ałts'ą́ą́' da'nołk'iiz doo.

¹⁵Áko nihik'isóó danohłíinii, bee nihich'į' hadahaadzí'ígíí índa nihich'į' naaltsoos ádeiilyaaígíí bee nidanihineetą́'ígíí yéego deínóhtą'go bee nisoozį́.

¹⁶NihiBóhólníihii Jesus Christ t'áá bí, índa Diyin God nihiTaa' ayóó'ánihó'níigo nihaa jooba'go bee ha'ahóní doo nídínéeshii índa ił chohoo'į́ niłdzilii nihaidiní'áanii,

¹⁷éí nihijéí hada'ólníigo áyóle', áádóó yá'át'ééh ádaahníiłgo índa saad yá'ádaat'éehii bee yádaałti'go nihidahoníłdzilgo ádanihóle'.