Read Navajo II THESSALONIANS 3 Bible Online

II THESSALONIANS 3 - Navajo bible

II THESSALONIANS 3

¹Áádóó nihik'isóó, nihá sodadołzin, t'áá nihitahgóó ádzaaígi át'éego Bóhólníihii bizaad náás yit'ihgo baa ha'niih doo.

²Áádóó diné doo yá'ádaashóonii índa bąąhági ádaat'éii bits'ąą nanihidi'nil doogo nihá sodadołzin. Háálá diné doo t'áá ałtso bi'oodlą' hólǫ́ǫ da.

³Nidi Bóhólníihii ba'ahódlí. Áko nihidahoníłdzilgo ánihidoolííł, áádóó bąąhági át'éii nilíinii yits'ąą nihaa áhályą́ą doo.

⁴Índa bee nihich'į' hadahaadzíi'ii baa nidaahkai áádóó baa nidadoohkahgi Bóhólníihii bee nihaa dadzííníidlí.

⁵Bóhólníihii nihá hoo'į́įgo Diyin God bibee ayóó'ó'ó'ni' índa Christ bibee ha'ahóníinii nihijéí bii' baa ákodanohsingo ádanihóle'.

⁶Nihik'isóó, nihiBóhólníihii Jesus Christ bízhi' bee ádanihidii'ní, Nihik'is t'áá háiida ák'eh dahal'ínígíí índa bee nidanihineetą́ą'ii doo yik'ehgo át'éhígíí t'áadoo bił naałdeehí.

⁷Nihida'oł'į́į dooleełgi t'áá nihí nihił béédahózin. Aají nihitahgi nideiikai yę́ędą́ą́' doo ák'eh dahoniil'į́į da nít'éé'.

⁸Diné ła' t'áá jíík'e t'áadoo bits'ą́ą́' da'iidą́ą' da, nidi doo nihaa naanish hasin da doo biniyé jį́įgo áádóó tł'ée'go nidi yéego nidashiilnish.

⁹Nihaa ádahołyą́ą doogo bee nihá haz'ą́ą nidi, t'áadoo nihídadí'níikeed da, nidi nihinááł ádeiit'įįdígíí bida'oł'į́į doo biniyé ákódeiidzaa.

¹⁰Háálá t'ahdii nihitahgi nideiikai yę́ędą́ą́', díí bee nihich'į' hadahaadzíí': diné ła'da doo t'áá k'ad naashnishgóogo éí t'áadoo ajiyání doo.

¹¹Háálá nihitahgi ła' ádadahodeeláago dahiná, t'óó aseezį́ ádeił'į́įgo baa nidahontł'ago, doo nidi nidaalnishgóó baa dahodiits'a'.

¹²Áko diné ákódaat'éhígíí, Hazhó'ó nidaałnishgo ák'inidadohkai, dabidii'níigo Bóhólníihii Jesus Christ bá yádeiilti'go bich'į' deiil'áago baa nídeiikąąh.

¹³Áádóó nihik'isóó danohłíinii, yá'át'éehgo ádaahníiłii t'áadoo ádadadoohłáhí.

¹⁴Díí naaltsoos biyi'dóó bee nihił dahwiilne'ígíí éí diné ła'da doo yik'eh hół'į́į́góogo éí baa ákodanohsin, áádóó éí dinéhígíí t'áadoo bił ahéédadoohkahí doo, áko ádaa yádínóodzįįł.

¹⁵Ákondi ana'í nilį́įgo éí t'áadoo baa nitsídaahkeesí, nidi ak'is nilį́įgo baa nitsídaahkeesgo hazhó'ó nidanohtin.

¹⁶K'ad Bóhólníihii, bee ach'į' hózhǫ́ náhásdlį́į'ii, t'áá áłahjį' áádóó t'áá ałtsojį' bee ach'į' hózhóonii nihaididoo'ááł. T'áá ánółtso Bóhólníihii nihił hólǫ́ǫ doo.

¹⁷Shí Paul, k'é nihidishníigo t'áá shí ak'e'ashchí. Díí shí shinaaltsoosígíí t'áá ałtso kót'éego bikáá' daasdzoh; éigi át'éego é'ésh'į́.

¹⁸T'áá ánółtso nihiBóhólníihii Jesus Christ bibee ajooba' nihił hólǫ́ǫ doo. [T'áá ákót'ée doo.]