Read Navajo I TIMOTHY 3 Bible Online

I TIMOTHY 3 - Navajo bible

I TIMOTHY 3

¹Kóhá'níinii éí t'áá aaníí: Diné ła' oodlání yá sizíinii deeshłeeł jinízingo, naanish t'áá íiyisí yá'át'éehii jinízingo át'é.

²Áko da'oodlání bá dzizíinii ts'ídá t'áadoo bee hak'íhót'ahí da doo, asdzání t'ááłá'íígíí bahastiin jílį́į doo, ádaa áhojilyą́ągo jiináa doo, hojíyą́ą doo, bohónéedzą́ągo jiináa doo, ha'ałk'ee nídaakahígíí bich'į' hoł ílį́į doo, na'nitin jiichįįh doo;

³wáin doo bee tsi'nijigháa da doo, doo ats'ííd ádąąh jit'į́į doo, na'adlo'go bee béeso ál'íinii doo bíchą́yízhdéelni' da doo, nidi ha'jólníi doo, doo saad íjí'áah da doo, índa doo adáninilníi da doo.

⁴Haghan haz'ą́ągi yá'át'éehgo dah ajoo'ish doo, ha'áłchíní hódahółníihgo t'áá ałtsojį' bił da'ílį́įgo ádzósin doo.

⁵Háálá haghan haz'ą́ągi yá'át'éehgo dah ajoo'ish dooleełgi doo bééhodzísingóó, haa yit'éegoshą' Diyin God dayoodlání áłah nádleehii bá dzizį́į dooleeł?

⁶Ániid oosdląądii éí dooda, jó, éí t'áá áko ádaa hodzódlí bide át'įįhgo biniinaa níłch'i bida'iiníziinii binanit'a'í bá nihoot'ánígi át'éego há nihodoot'áałgo át'é.

⁷Nidi yá'át'éehgo jiináago, doo da'oodlání danilíinii ts'ídá yá'át'éehgo haa dahalne' doo, doodaii' ni'jiisíhígíí bee hak'íhát'áahgo éí níłch'i bida'iiníziinii binanit'a'í biloh biishdoogááł.

⁸T'áá ákót'éego da'oodlání yaa ádahalyáanii ałdó' t'áadoo yíní ádahozhdildiní doo, doo naakidę́ę́' yádajiłti' da doo, wáin doo bee tsi'nijigháa da doo, na'adlo'go bee béeso ál'íinii doo bíchą́yízhdéelni' da doo,

⁹nidi t'áá ákogi ádajit'į́įgo bee ádaa ákodaznidzingo Diyin God bina'nitin woodláanii doo bééhózin da yę́ę dajótą' doo.

¹⁰Átsé nidaho'diskáa' doo, áko t'áadoo bee hak'ídahót'ahígóó hwéédahoozingo índa da'oodlání baa ádahojilyáanii dazhdooleeł.

¹¹T'áá ákót'éego hwe'asdzą́ą́ t'áadoo yíní ádahodildiní doo, t'áadoo aseezį́ ádeił'íní doo, ádaa ádahalyą́ą doo, t'áá ałtsojį' bada'ahódlíi doo.

¹²Da'oodlání baa ádahojilyáanii t'ááłá'í hwe'asdzą́ą doo, ha'áłchíní índa haghan haz'ą́ągi yá'át'éehgo dah da'jí'éesh doo.

¹³Háálá yá'át'éehgo nidajishnishgo bee da'jílíinii ádá shódadzoost'e' doo, índa t'áadoo dadzisti'í Christ Jesus woodláanii bee nidazhnitingo hwéédaho'dílzin doo.

¹⁴T'áá hahí naa deeshááł nisin, nidi díí bee nida'nitinígíí átsé bee nich'į' ak'e'ashchí.

¹⁵Áko shidi'neestł'ah ládą́ą́', Diyin God dayoodláanii áłah nádleehgi ádaa ádahalyą́ą dooleełgi t'áá nił bééhózin doo. Da'oodlání t'áá ła' bizhi'ee Diyin God hináanii bíhígíí éí t'áá aaníinii bá siláii índa bee niłdzilii át'é.

¹⁶Deiniidláanii bína'niltin doo bééhózin da yę́ę éí ts'ídá doo naaki nilį́į́góó ayóó át'éii át'é: Diyin God éí ats'íís silį́į'go yit'íní ályaa, Níłch'i Diyinii bee ts'ídá t'áá ákogi ájít'é ho'doo'niid, áádóó diyingo nidaal'a'ii dahoołtsą́, ał'ąą dine'é bitahgóó haa hóóne', nihokáa'gi ho'doosdląądgo ha'oosdlíí', yá'ąąshdi adinílííd biyi'jį' náho'diiltį́.